കടുത്ത പുറം വേദന അലട്ടുന്നു; റെഡ് ബോള്‍ ക്രിക്കറ്റില്‍ നിന്ന് ഇടവേള വേണം; ഓസ്‌ട്രേലിയന്‍ പര്യടനത്തിനിടെ ഇന്ത്യയിലേക്ക് മടങ്ങിയ ശ്രേയസ് അയ്യര്‍ ബിസിസിഐക്ക് മുന്നില്‍ ആവശ്യവുമായി രംഗത്ത്
കടുത്ത പുറം വേദന അലട്ടുന്നു; റെഡ് ബോള്‍ ക്രിക്കറ്റില്‍ നിന്ന് ഇടവേള വേണം
മുംബൈ: റെഡ് ബോള്‍ ക്രിക്കറ്റില്‍ നിന്ന് ഇടവേളയെടുക്കുകയാണെന്ന് ബിസിസിഐയെ അറിയിച്ച് ഇന്ത്യന്‍ താരം ശ്രേയസ് അയ്യര്‍. കടുത്ത പുറം വേദനയും ക്ഷീണവും കാരണമാണ് ഈ തീരുമാനം എന്നും ശ്രേയസ് അയ്യര്‍ ബിസിസിഐയ്ക്ക് അയച്ച കത്തില്‍ വ്യക്തമാക്കിയിരിക്കുന്നത്. വെസ്റ്റ് ഇന്‍ഡീസിന് എതിരായ പരമ്പരയ്ക്ക് മുന്‍പായാണ് ശ്രേയസ് റെഡ് ബോള്‍ ക്രിക്കറ്റില്‍ നിന്ന് ഇടവേള ആവശ്യപ്പെട്ടിരിക്കുന്നത്.
ഇപ്പോള്‍ ഓസ്‌ട്രേലിയയ്‌ക്കെതിരെ പുരോഗമിച്ചുകൊണ്ടിരിക്കുന്ന പരമ്പരയില്‍ ഇന്ത്യ എ ടീമിന്റെ ക്യാപ്റ്റനായിരുന്നു ശ്രേയസ്. എന്നാല്‍ ഓസ്ട്രേലിയ എ ടീമിനെതിരായ രണ്ടാം ടെസ്റ്റ് ആരംഭിക്കുന്നതിന് മണിക്കൂറുകള്‍ക്ക് മാത്രം മുമ്പ് ശ്രേയസ് ക്യാപ്റ്റന്‍സി ഒഴിഞ്ഞ് നാട്ടിലേക്ക് മടങ്ങിയിരുന്നു. നാല് ദിവസം തുടരെ ഫീല്‍ഡില്‍ നില്‍ക്കാന്‍ ബുദ്ധിമുട്ടുണ്ടെന്ന് ശ്രേയസ് ബിസിസിഐയെ അറിയിച്ചതായാണ് പിടിഐ റിപ്പോര്‍ട്ട് ചെയ്തത്.
അതേസമയം ശ്രേയസ് അയ്യര്‍ ഇന്ത്യ എയുടെ ക്യാപ്റ്റന്‍ സ്ഥാനം ഒഴിഞ്ഞതോടെ ധ്രുവ് ജുറെലാണ് ടീമിനെ നയിക്കുന്നത്. ഓസ്ട്രേലിയ എ ടീമിനെതിരായ ആദ്യ ടെസ്റ്റില്‍ ശ്രേയസിനു തിളങ്ങാന്‍ സാധിച്ചിരുന്നില്ല. രണ്ട് ഇന്നിങ്സുകളിലുമായി എട്ട്, 13 റണ്‍സുകളാണ് ശ്രേയസ് സ്വന്തമാക്കിയത്. വെസ്റ്റ് ഇന്‍ഡീസിനെതിരെ രണ്ട് ടെസ്റ്റുകളുടെ പരമ്പരയാണ് ഇന്ത്യ കളിക്കുന്നത്. ഇന്ത്യന്‍ ടെസ്റ്റ് ടീമിലേക്ക് ശ്രേയസ് അയ്യര്‍ ഈ പരമ്പരയിലൂടെ തിരികെയെത്തും എന്നാണ് പ്രതീക്ഷിക്കുന്നത്. 2024 ഫെബ്രുവരിയിലാണ് ശ്രേയസ് അവസാനമായി ഇന്ത്യയ്ക്ക് വേണ്ടി ടെസ്റ്റ് കളിച്ചത്.