52-ാം സെഞ്ചുറിയുമായി കോഹ്ലി; രോഹിത് ശർമ്മയ്ക്കും കെ.എൽ. രാഹുലിനും ഫിഫ്റ്റി; അവസാന ഓവറുകളിൽ കസറി ജഡേജ; റാഞ്ചി ഏകദിനത്തിൽ ദക്ഷിണാഫ്രിക്കയ്ക്ക് 350 റൺസ് വിജയലക്ഷ്യം

റാഞ്ചി: ദക്ഷിണാഫ്രിക്കക്കെതിരായ ആദ്യ ഏകദിനത്തിൽ ഇന്ത്യയ്ക്ക് മികച്ച സ്കോർ. വിരാട് കോലിയുടെ തകർപ്പൻ സെഞ്ചുറിയുടെയും രോഹിത് ശർമ, കെ എൽ രാഹുൽ എന്നിവരുടെ അർദ്ധ സെഞ്ചുറികളുടെയും ബലത്തിൽ എട്ട് വിക്കറ്റ് നഷ്ടത്തിൽ 349 റൺസാണ് ഇന്ത്യ നേടിയത്. ഇതോടെ ദക്ഷിണാഫ്രിക്കയ്ക്ക് 350 റൺസ് വിജയലക്ഷ്യം. റാഞ്ചിയിൽ നടന്ന മത്സരത്തിൽ ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യക്കായി കോലി 120 പന്തിൽ 135 റൺസ് നേടി. ഇത് താരത്തിന്റെ 52-ാം ഏകദിന സെഞ്ചുറിയാണ്.

ഇന്ത്യക്ക് മികച്ച തുടക്കമായിരുന്നില്ല ലഭിച്ചത്. സ്കോർബോർഡിൽ 25 റൺസുള്ളപ്പോൾ യശസ്വി ജയ്‌സ്വാൾ (18) പുറത്തായി. നാലാം ഓവറിൽ നന്ദ്രേ ബർഗറിന്റെ പന്തിൽ വിക്കറ്റ് കീപ്പർ ക്വിന്റൺ ഡി കോക്കിന് ക്യാച്ച് നൽകിയാണ് ജയ്‌സ്വാൾ മടങ്ങിയത്. പിന്നീട് ക്രീസിലെത്തിയ രോഹിത് ശർമയും (51 പന്തിൽ 57 റൺസ്) കോലിയും ചേർന്ന് മൂന്നാം വിക്കറ്റിൽ 136 റൺസിന്റെ കൂട്ടുകെട്ടുണ്ടാക്കി. രോഹിത്തിനെ 22-ാം ഓവറിൽ മാർകോ യാൻസൻ പുറത്താക്കി. തുടർന്നെത്തിയ റുതുരാജ് ഗെയ്കവാദിന് (8) കാര്യമായ സംഭാവന നൽകാനായില്ല. വാഷിംഗ്ടൺ സുന്ദറും (13) നിരാശപ്പെടുത്തിയതോടെ ഇന്ത്യ നാലിന് 200 എന്ന നിലയിലായി.

തുടർന്ന് രാഹുലുമായി (56 പന്തിൽ 60) ചേർന്ന് കോലി ഇന്നിംഗ്സ് മുന്നോട്ട് കൊണ്ടുപോയി. 101 പന്തിൽ നിന്നാണ് കോലി സെഞ്ചുറി തികച്ചത്. ഏഴ് സിക്സറുകളും 11 ഫോറുകളും അടങ്ങുന്നതായിരുന്നു കോലിയുടെ ഇന്നിംഗ്‌സ്. രാഹുലുമായി 76 റൺസ് കൂട്ടിച്ചേർത്ത ശേഷം 43-ാം ഓവറിൽ കോലി പുറത്തായി. രവിന്ദ്ര ജഡേജയും (20 പന്തിൽ 32) രാഹുലും ചേർന്ന് 65 റൺസ് കൂടി നേടി. രാഹുൽ 49-ാം ഓവറിലും ജഡേജ അവസാന ഓവറിലും പുറത്തായി. ദക്ഷിണാഫ്രിക്കയ്ക്ക് വേണ്ടി മാർകോ യാൻസൻ, നന്ദ്രേ ബർഗർ, ഒട്ട്‌നീൽ ബാർട്ട്മാൻ, കോർബിൻ ബോഷ് എന്നിവർ രണ്ട് വിക്കറ്റ് വീതം വീഴ്ത്തി. റിഷഭ് പന്ത്, തിലക് വർമ എന്നിവരെ പുറത്തിരുത്തിയാണ് ഇന്ത്യ ഇറങ്ങിയത്.