ഏഷ്യാകപ്പ് നേടിയ ഇന്ത്യന്‍ ടീമുമായി സൂര്യകുമാര്‍ ഓസിസ് പര്യടനത്തിന്; ഹാര്‍ദിക്കിന് പകരം പേസ് ഓള്‍റൗണ്ടറായി നിതീഷ് കുമാര്‍ റെഡ്ഡി; വാഷിംഗ്ടണ്‍ സുന്ദറും ടീമില്‍; ട്വന്റി 20 ലോകകപ്പിനുള്ള മുന്നൊരുക്കം തുടങ്ങി ടീം ഇന്ത്യ
ഏഷ്യാകപ്പ് നേടിയ ഇന്ത്യന്‍ ടീമുമായി സൂര്യകുമാര്‍ ഓസിസ് പര്യടനത്തിന്
അഹമ്മദാബാദ്: അടുത്ത വര്‍ഷം നടക്കുന്ന ട്വന്റി 20 ലോകകപ്പിനുള്ള മുന്നൊരുക്കവുമായി ഇന്ത്യന്‍ ക്രിക്കറ്റ് ടീം. ഏഷ്യാകപ്പ് നേടിയ ഇന്ത്യന്‍ ടീമിനെ അതേപടി നിലനിര്‍ത്തിയാണ് ഓസ്ട്രേലിയന് പര്യടനത്തിന് ഇന്ത്യ തയ്യാറെടുക്കുന്നത്. ടീമില്‍ വരുത്തിയ ഏക മാറ്റം പരിക്കേറ്റ ഹാര്‍ദിക് പാണ്ഡ്യയുടെ അഭാവമാണ്. പകരക്കാരനായി പേസ് ഓള്‍റൗണ്ടറായ നിതീഷ് കുമാര്‍ റെഡ്ഡി ടീമിലെത്തി. ഓസ്ട്രേലിയന് പര്യടനത്തിനുള്ള ഏകദിന ടീമില്‍ നിന്ന് സഞ്ജു സാംസണിനെ തഴഞ്ഞെങ്കിലും ട്വന്റി 20 ടീമില്‍ താരത്തെ നിലനിര്‍ത്തി.
പതിനാറംഗ ടീമിനെ നയിക്കുന്ന സൂര്യകുമാര്‍ യാദവാണ്. ശുഭ്മാന്‍ ഗില്‍ വൈസ് ക്യാപ്റ്റനായി തുടരും. പരിക്കിനെ തുടര്‍ന്ന് ഹാര്‍ദിക് ഏഷ്യാ കപ്പ് ഫൈനല്‍ മത്സരം കളിച്ചിരുന്നില്ല. വാഷിംഗ്ടണ്‍ സുന്ദറിനേയും ടീമിലേക്ക് തിരിച്ചുവിളിച്ചു. ജസ്പ്രിത് ബുമ്ര പേസ് ഡിപ്പാര്‍ട്ട്മെന്റ് നയിക്കുമ്പോള്‍ വിന്‍ഡിസിനെതിരെ മികച്ച പ്രകടനം പുറത്തെടുത്ത മുഹമ്മദ് സിറാജിനെ പരിഗണിച്ചില്ല.
ബുമ്രയ്ക്ക് പുറമെ ഹര്‍ഷിത് റാണ, അര്‍ഷ്ദീപ് സിംഗ് എന്നിവരാണ് ടീമിലെ മറ്റു പേസര്‍മാര്‍. ശിവം ദുബെ, നിതീഷ് കുമാര്‍ റെഡ്ഡി എന്നിവര്‍ പേസ് ഓള്‍റൗണ്ടര്‍മാരും. വാഷിംഗ്ടണ്‍ സുന്ദര്‍, കുല്‍ദീപ് യാദവ്, വരുണ്‍ ചക്രവര്‍ക്കി, അക്സര്‍ പട്ടേല്‍ എന്നിവരാണ് ടീമിലെ സ്പിന്നര്‍മാര്‍. സഞ്ജുവിനൊപ്പം വിക്കറ്റ് കീപ്പറായി ജിതേഷ് ശര്‍മയും ടീമില്‍ ഇടം നേടി. ഗില്‍, നിതീഷ് കുമാര്‍ റെഡ്ഡി, അക്സര്‍ പട്ടേല്‍, ഹര്‍ഷിത് റാണ, വാഷിംഗ്ടണ്‍ സുന്ദര്‍ എന്നിവരാണ് രണ്ട് ഫോര്‍മാറ്റിനുള്ള ടീമിലും ഉള്‍പ്പെട്ട താരങ്ങള്‍.
ഓസ്ട്രേലിയന് പര്യടനത്തിനുള്ള ഇന്ത്യയുടെ ടി20 ടീം: സൂര്യകുമാര്‍ യാദവ് (ക്യാപ്റ്റന്‍), അഭിഷേക് ശര്‍മ, ശുഭ്മാന്‍ ഗില്‍ (വൈസ് ക്യാപ്റ്റന്‍), നിതീഷ് കുമാര്‍ റെഡ്ഡി, ശിവം ദുബെ, അക്സര്‍ പട്ടേല്‍, ജിതേഷ് ശര്‍മ (വിക്കറ്റ് കീപ്പര്‍), വരുണ്‍ ചക്രവര്‍ത്തി, ജസ്പ്രിത് ബുമ്ര, അര്‍ഷ്ദീപ് സിംഗ്, കുല്‍ദീപ് യാദവ്, ഹര്‍ഷിത് റാണ, സഞ്ജു സാംസണ്‍ (വിക്കറ്റ് കീപ്പര്‍), റിങ്കു സിംഗ്, വാഷിംഗ്ടണ്‍ സുന്ദര്‍.