മദ്യപിച്ച് വഴക്ക് പതിവ്; ഉറങ്ങിക്കിടന്ന ഭര്‍ത്താവിനെ തിളച്ചെണ്ണ ഒഴിച്ച കൊലപ്പെടുത്തി: ഭാര്യ റിമാന്‍ഡില്‍

ചെന്നൈ: ഉറങ്ങിക്കിടന്ന ഭര്‍ത്താവിന്റെ മേത്ത് തിളച്ച എണ്ണ ഒഴിച്ചു കൊലപ്പെടുത്തിയ കേസില്‍ വീട്ടമ്മ പിടിയിലായി. കൊളത്തൂരിനടുത്തുള്ള ലക്ഷ്മിപുരം സ്വദേശി കാദര്‍ ബാഷ (42) കൊല്ലപ്പെട്ട സംഭവത്തില്‍ ഭാര്യ നിലവര്‍ നിഷ(48)യാണ് അറസ്റ്റിലായത്. കാദര്‍ ബാഷ ഇടയ്ക്കിടെ മദ്യപിച്ച് വീട്ടില്‍ വരാറുണ്ടെന്നും നിഷയുമായി പതിവായി വഴക്കുണ്ടാകാറുണ്ടെന്നും പൊലീസ് കണ്ടെത്തി.

കഴിഞ്ഞ ഒന്‍പതാം തിയതിയും ഇരുവരും തമ്മില്‍ സമാനമായ വഴക്കുണ്ടായി. തുടര്‍ന്ന് കാദര്‍ ബാഷ ഭാര്യയെ ആക്രമിച്ചു. പിറ്റേന്നു പുലര്‍ച്ചെ എണ്ണ ചൂടാക്കി, ഉറങ്ങിക്കിടക്കുകയായിരുന്ന ഭര്‍ത്താവിന്റെ മേല്‍ ഒഴിക്കുകയായിരുന്നു. നിലവിളി കേട്ടെത്തിയ അയല്‍ക്കാരാണ് ഇയാളെ ആശുപത്രിയിലെത്തിച്ചത്. ചികിത്സയിലിരിക്കെ മരിച്ചു. ഭാര്യയെ റിമാന്‍ഡ് ചെയ്തു.