കേന്ദ്ര ഏജന്സികളെ ഉപയോഗിച്ചുള്ള പ്രതികാര രാഷ്ട്രീയം വീണ്ടും ചര്ച്ചകളില്; കെജ്രിവാളിന്റെ കുറ്റവിമുക്തി പ്രതിപക്ഷത്തിന് പുത്തന് പ്രതീക്ഷ; സിബിഐയെ കൂട്ടിലടച്ച തത്തയാക്കുന്ന വിധി; കെജ്രിവാളിനെ നേരിട്ട് കണ്ട് പിന്തുണ അറിയിക്കാന് പിണറായി; കേരളത്തിലും 'കെജ്രിവാള് ഫാക്ടര്' നിറയ്ക്കാന് സിപിഎം; മോദിക്കും അമിത് ഷായ്ക്കും വമ്പന് തിരിച്ചടി
ന്യൂഡല്ഹി: കേന്ദ്ര ഏജന്സികളെ ഉപയോഗിച്ചുള്ള 'പ്രതികാര രാഷ്ട്രീയം' ദേശീയതലത്തില് വീണ്ടും സജീവ ചര്ച്ചയാകുന്നു. മദ്യനയ അഴിമതിക്കേസില് ആം ആദ്മി പാര്ട്ടി അധ്യക്ഷന് അരവിന്ദ് കെജ്രിവാളിനെയും മനീഷ് സിസോദിയയെയും ഡല്ഹി റൂസ് അവന്യൂ കോടതി കുറ്റവിമുക്തരാക്കിയതോടെ, ബിജെപിക്കെതിരെ ആഞ്ഞടിക്കാന് പ്രതിപക്ഷത്തിന് വജ്രായുധം ലഭിച്ചിരിക്കുകയാണ്. അഞ്ച് നിയമസഭാ തിരഞ്ഞെടുപ്പുകള് പടിവാതില്ക്കല് നില്ക്കെ പുറത്തുവന്ന ഈ വിധി ബിജെപിക്ക് കനത്ത തിരിച്ചടിയാകും. കെജ്രിവാളിന്റെ തിരിച്ചുവരവ് ആം ആദ്മി പാര്ട്ടിയില് ഒരു പുതിയ യുഗപ്പിറവിക്കുള്ള സാധ്യതയാണ് തുറന്നിടുന്നത്.
വിധി കേട്ട് വികാരാധീനനായി പൊട്ടിക്കരഞ്ഞ കെജ്രിവാള്, തന്റെ പോരാട്ടം സത്യത്തിന് വേണ്ടിയായിരുന്നുവെന്ന് അടിവരയിട്ടു. സിബിഐ സമര്പ്പിച്ച ആയിരക്കണക്കിന് പേജുകളുള്ള കുറ്റപത്രത്തില് കൃത്യമായ തെളിവുകളോ സാക്ഷിമൊഴികളോ ഇല്ലെന്ന സ്പെഷ്യല് ജഡ്ജി ജിതേന്ദര് സിംഗിന്റെ നിരീക്ഷണം കേന്ദ്ര അന്വേഷണ ഏജന്സികളെ കടുത്ത പ്രതിസന്ധിയിലാക്കിയിട്ടുണ്ട്. 'കൂട്ടിലെ തത്ത' എന്ന വിശേഷണം ശരിവെക്കുന്ന രീതിയിലായിരുന്നു കോടതിയുടെ വിമര്ശനങ്ങള്. ഭരണഘടനാ പദവി വഹിക്കുന്ന വ്യക്തിയെ മതിയായ തെളിവുകളില്ലാതെ കേസില് കുടുക്കിയത് നിയമവാഴ്ചയ്ക്ക് നിരക്കാത്തതാണെന്ന് കോടതി ആഞ്ഞടിച്ചു.
കെജ്രിവാളിന്റെ കുറ്റവിമുക്തി കേരള രാഷ്ട്രീയത്തിലും വലിയ ചലനങ്ങള് സൃഷ്ടിക്കും. മുഖ്യമന്ത്രി പിണറായി വിജയനും അരവിന്ദ് കെജ്രിവാളും തമ്മിലുള്ള അടുത്ത ബന്ധം രാഷ്ട്രീയ കേന്ദ്രങ്ങള് ഉറ്റുനോക്കുകയാണ്. ഡല്ഹിയില് ഇന്ന് എത്തുന്ന മുഖ്യമന്ത്രി പിണറായി വിജയന് കെജ്രിവാളിനെ നേരില് കണ്ടേക്കും. കേന്ദ്ര ഏജന്സികളുടെ വേട്ടയാടലിനെതിരെ ഒരേ സ്വരത്തില് സംസാരിക്കുന്ന രണ്ട് നേതാക്കള് കൈകോര്ക്കുന്നത് ദേശീയ രാഷ്ട്രീയത്തിലും ശ്രദ്ധേയമാകും. പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കും വലിയ തിരിച്ചടിയാണ് ഈ കോടതി വിധി.
വരാനിരിക്കുന്ന തിരഞ്ഞെടുപ്പുകളില് കെജ്രിവാളിനെ കേരളത്തില് പ്രചാരണത്തിന് എത്തിക്കാനും ഇടതുമുന്നണി നീക്കം നടത്തുന്നുണ്ട്. കേരളത്തില് ആം ആദ്മി പാര്ട്ടിക്ക് കാര്യമായ സ്വാധീനമില്ലെങ്കിലും, കെജ്രിവാളിന്റെ വ്യക്തിപ്രഭാവവും അഴിമതി വിരുദ്ധ പ്രതിച്ഛായയും വോട്ടര്മാരെ സ്വാധീനിക്കുമെന്ന് സിപിഎം കണക്കുകൂട്ടുന്നു. കേന്ദ്ര സര്ക്കാരിന്റെ പ്രതികാര രാഷ്ട്രീയത്തിനെതിരായ പോരാട്ടത്തില് കെജ്രിവാളിനെ മുന്നിര്ത്തിയുള്ള പ്രചാരണം കേരളത്തിലും ബിജെപിക്കും വെല്ലുവിളിയാകും. കെജ്രിവാള് വീണ്ടും സജീവമാകുന്നതോടെ ഇന്ത്യാ സഖ്യത്തിലും പുതിയ സമവാക്യങ്ങള് രൂപപ്പെട്ടേക്കാം. ഇതിനെല്ലാം ഉള്ള അവസരമാണ് ഈ വിധി.
മദ്യനയക്കേസില് ഡല്ഹി മുന് മുഖ്യമന്ത്രി അരവിന്ദ് കെജ്രിവാളിനെയും മനീഷ് സിസോദിയയെയും റൂസ് അവന്യൂ കോടതി കുറ്റവിമുക്തരാക്കിയതോടെ, ബിജെപിക്കെതിരെ ആഞ്ഞടിക്കാന് പ്രതിപക്ഷത്തിന് കൈവന്നത് വജ്രായുധമാണ്. അഞ്ച് സംസ്ഥാനങ്ങളില് നിയമസഭാ തിരഞ്ഞെടുപ്പ് പടിവാതില്ക്കല് നില്ക്കെ പുറത്തുവന്ന വിധി മോദിഅമിത് ഷാ നേതൃത്വത്തിന് രാഷ്ട്രീയമായി കനത്ത പ്രഹരമാണ്. കേന്ദ്രത്തിന്റെ വേട്ടയാടല് രാഷ്ട്രീയത്തിനെതിരെ പ്രതിപക്ഷ നിരയില് പുതിയൊരു ഊര്ജ്ജമായി കെജ്രിവാള് മാറുമെന്ന സൂചനയാണ് ആം ആദ്മി പാര്ട്ടിയുടെ 'രണ്ടാം പിറവി'യായി വിശേഷിപ്പിക്കപ്പെടുന്ന ഈ വിധി നല്കുന്നത്.
ഈ ചരിത്രവിജയത്തിന് പിന്നാലെ അരവിന്ദ് കെജ്രിവാളിനെ നേരിട്ടു കണ്ടു പിന്തുണ അറിയിക്കാന് കേരള മുഖ്യമന്ത്രി പിണറായി വിജയന് ഇന്ന് ഡല്ഹിയിലെത്തും. കെജ്രിവാളിനെ കാണുമെന്നാണ് സൂചന. അങ്ങനെ എങ്കില് കേന്ദ്ര ഏജന്സികളുടെ വേട്ടയാടലിനെതിരെ ഒരേ സ്വരത്തില് സംസാരിക്കുന്ന പിണറായിയും കെജ്രിവാളും തമ്മിലുള്ള കൂടിക്കാഴ്ച ദേശീയ രാഷ്ട്രീയത്തില് പുതിയ സമവാക്യങ്ങള്ക്കും 'ഇന്ത്യാ' സഖ്യത്തിലെ ഐക്യത്തിനും വഴിയൊരുക്കും. കേരള മുഖ്യമന്ത്രിയും കെജ്രിവാളും തമ്മിലുള്ള ഗാഢമായ സൗഹൃദം വരുംദിവസങ്ങളില് കേരള രാഷ്ട്രീയത്തിലും പ്രധാന ചര്ച്ചാവിഷയമാകും. കേരളത്തിലും സജീവമായ കേന്ദ്ര ഏജന്സികളുടെ അന്വേഷണങ്ങള്ക്ക് ഈ വിധി ഒരു മറുപടിയായി ഉയര്ത്തിക്കാട്ടാനാണ് സി.പി.എം ലക്ഷ്യമിടുന്നത്.
