വണ്ടികള് ജീവനേക്കാള് സ്നേഹിക്കുകയും പരിപാലിക്കുകയും ചെയ്യുന്നത് ഒരു കല; കേരളത്തിലെ വോട്ടര്മാരില് നിര്ണ്ണായക സ്വാധീനമുള്ള വണ്ടിപ്രാന്തന്മാരുടെ കൂട്ടായ്മ തിരഞ്ഞെടുപ്പ് ഫലത്തെ മാറ്റിമറിക്കാന് പോന്നത്; ജെന്സിക്കാരെ ഇളക്കി മറിച്ച് 'മോഡിഫിക്കേഷന്' റീല്സ്; സതീശന്റേത് 'അതിബുദ്ധിയോ?'; ഇന്സ്റ്റാ വീഡിയോയില് വിഡി വൈറല്
തിരുവനന്തപുരം: നിയമസഭാ തിരഞ്ഞെടുപ്പിന്റെ ആവേശം കൊടുമുടിയില് നില്ക്കെ, സോഷ്യല് മീഡിയയെയും യുവ വോട്ടര്മാരെയും ഒരുപോലെ ഇളക്കിമറിച്ച് പ്രതിപക്ഷ നേതാവ് വി.ഡി. സതീശന്റെ വൈറല് റീല്സ്. വാഹനങ്ങളുടെ രൂപമാറ്റവുമായി ബന്ധപ്പെട്ട് അദ്ദേഹം പങ്കുവെച്ച ഇന്സ്റ്റഗ്രാം വീഡിയോയ്ക്ക് റെക്കോര്ഡ് കാഴ്ചക്കാരാണ് ലഭിച്ചിരിക്കുന്നത്. ഇതുവരെ 58 ലക്ഷത്തിലധികം പേര് ഈ വീഡിയോ കണ്ടുകഴിഞ്ഞു. വരാനിരിക്കുന്ന തിരഞ്ഞെടുപ്പില് ഒരു വലിയ വിഭാഗം വോട്ടര്മാരെ സ്വാധീനിക്കാന് പോകുന്ന നിര്ണ്ണായക ഘടകമായി ഈ പ്രഖ്യാപനം മാറിക്കഴിഞ്ഞു.
വാഹനപ്രേമികളുടെയും യുവാക്കളുടെയും ചിരകാല ആവശ്യമായ 'മോഡിഫിക്കേഷന്' നിയമാനുസൃതമാക്കുമെന്ന യു.ഡി.എഫ് പ്രകടനപത്രികയിലെ വാഗ്ദാനമാണ് വീഡിയോയുടെ കാതല്. യു.ഡി.എഫ് അധികാരത്തിലെത്തിയാല് അപകടകരമല്ലാത്ത രീതിയില് വാഹനങ്ങള് മോഡിഫൈ ചെയ്യാന് അനുവദിക്കുമെന്ന് സതീശന് ഉറപ്പുനല്കുന്നു. പതിനായിരക്കണക്കിന് കമന്റുകളാണ് വീഡിയോയ്ക്ക് താഴെ പ്രത്യക്ഷപ്പെട്ടത്. ഇതിനുപുറമെ, ആയിരക്കണക്കിന് യുവാക്കള് സതീശന്റെ നിലപാടിനെ പിന്തുണച്ച് സ്വന്തം നിലയില് വീഡിയോകള് നിര്മ്മിച്ച് പങ്കുവെച്ചതോടെ സംഗതി സോഷ്യല് മീഡിയയില് വലിയൊരു ട്രെന്ഡായി മാറി.
ഈ നീക്കം നടപ്പാകുമോ ഇല്ലയോ എന്ന തര്ക്കങ്ങള് നിലനില്ക്കുമ്പോഴും, ലക്ഷക്കണക്കിന് വരുന്ന വാഹനപ്രേമികള് നേരിടുന്ന വലിയൊരു പ്രശ്നം തിരിച്ചറിയാന് യു.ഡി.എഫിന് സാധിച്ചു എന്നത് രാഷ്ട്രീയമായി അവര്ക്ക് വലിയ മുന്തൂക്കം നല്കുന്നു. ഗതാഗത നിയമങ്ങളുടെ പേരില് മോട്ടോര് വാഹന വകുപ്പും പോലീസും നടത്തുന്ന കര്ശനമായ പരിശോധനകളില് വലയുന്ന വണ്ടിപ്രാന്തന്മാരെ തങ്ങളിലേക്ക് അടുപ്പിക്കാന് ഈ ഒരൊറ്റ വീഡിയോയിലൂടെ പ്രതിപക്ഷ നേതാവിനായി. കൃത്യമായ പ്ലാനിങ്ങോടെ യുവാക്കളുടെ പള്സ് അറിഞ്ഞുള്ള നീക്കമാണിതെന്ന് രാഷ്ട്രീയ നിരീക്ഷകര് വിലയിരുത്തുന്നു.
വീഡിയോ വൈറലായതോടെ ഈ നീക്കത്തെ എതിര്ത്ത് ഗതാഗത മന്ത്രി കെ.ബി. ഗണേഷ് കുമാര് രംഗത്തെത്തിയിട്ടുണ്ട്. എന്നാല്, തിരഞ്ഞെടുപ്പ് വേളയില് ഇത്തരം എതിര്പ്പുകള് തിരിച്ചടിക്കുമെന്നാണ് സൂചന. വാഹന പരിഷ്കരണത്തെ തടയുന്ന നിലപാടുകള്ക്ക് പകരം, അവരെ ചേര്ത്തുപിടിക്കുന്ന സമീപനമായിരുന്നു ഗണേഷ് കുമാര് സ്വീകരിക്കേണ്ടിയിരുന്ന ബുദ്ധി എന്ന് സോഷ്യല് മീഡിയയില് വിമര്ശനം ഉയരുന്നുണ്ട്. 'ഞങ്ങള് ചെയ്യുന്നതേ പറയൂ' എന്ന പതിവ് ശൈലിയേക്കാള്, ജനങ്ങളുടെ താല്പര്യങ്ങള്ക്കൊപ്പം നില്ക്കുന്ന വാഗ്ദാനങ്ങള്ക്കാണ് തിരഞ്ഞെടുപ്പില് മുന്തൂക്കം ലഭിക്കാറുള്ളത്.
വാഹനപ്രേമികളെയും അവരുടെ പരിഷ്കരിച്ച വാഹനങ്ങളെയും എല്ലാ രാഷ്ട്രീയ പാര്ട്ടികള്ക്കും ആവശ്യമാണ് എന്നതാണ് മറ്റൊരു വൈരുദ്ധ്യം. പ്രളയസമയത്തും തിരഞ്ഞെടുപ്പ് പ്രചാരണങ്ങളിലും കലാശക്കൊട്ടുകളിലും വലിയ ഓഫ് റോഡ് വാഹനങ്ങളും മോഡിഫൈഡ് വണ്ടികളും ആവേശമായി മുന്നിലുണ്ടാകും. എന്നാല് ആവശ്യങ്ങള് കഴിയുമ്പോള് അവ വീട്ടിലെ ഷെഡ്ഡില് തന്നെ വയ്ക്കണമെന്നും പുറത്തിറക്കിയാല് കനത്ത പിഴ ചുമത്തുമെന്നും പറയുന്നത് എന്തു ന്യായമാണെന്ന് യുവാക്കള് ചോദിക്കുന്നു. വണ്ടികള് ജീവനേക്കാള് സ്നേഹിക്കുകയും പരിപാലിക്കുകയും ചെയ്യുന്നത് ഒരു കലയാണെന്ന് അവര് വാദിക്കുന്നു.
വാഹനങ്ങളുടെ സൗന്ദര്യം വര്ദ്ധിപ്പിക്കുന്നത് സുരക്ഷയെ ബാധിക്കാത്ത തരത്തിലാണെങ്കില് അതിന് അനുമതി നല്കേണ്ടത് അനിവാര്യമാണെന്ന ചിന്താഗതിക്ക് ഇപ്പോള് വലിയ പിന്തുണയാണ് ലഭിക്കുന്നത്. എത്രത്തോളം മാറ്റങ്ങള് വരുത്താം എന്നതിനെക്കുറിച്ച് കൃത്യമായ മാനദണ്ഡങ്ങള് നിശ്ചയിച്ച് നിയമത്തില് കാലോചിതമായ മാറ്റം വരുത്താന് സര്ക്കാര് തയ്യാറാകണം. ഈ ആഗ്രഹം വോട്ടായി മാറുമെന്ന പ്രതീക്ഷയിലാണ് യു.ഡി.എഫ് ക്യാമ്പ്.
മോട്ടോര് വാഹന വകുപ്പ് ഉദ്യോഗസ്ഥരുടെ നിരന്തരമായ പീഡനങ്ങളില് നിന്ന് മോചനം ലഭിക്കുമെന്ന പ്രതീക്ഷയില് ലക്ഷക്കണക്കിന് വാഹന ഉടമകളാണ് ഇപ്പോള് സതീശന്റെ വീഡിയോയ്ക്ക് താഴെ അണിനിരന്നിരിക്കുന്നത്. കേരളത്തിലെ വോട്ടര്മാരില് നിര്ണ്ണായക സ്വാധീനമുള്ള വണ്ടിപ്രാന്തന്മാരുടെ കൂട്ടായ്മ തിരഞ്ഞെടുപ്പ് ഫലത്തെ മാറ്റിമറിക്കാന് പോന്നതാണ്. ഒരു ചെറിയ റീല്സ് വീഡിയോ എങ്ങനെ വലിയൊരു രാഷ്ട്രീയ ചര്ച്ചയായി മാറാമെന്നതിന് തെളിവാണ് വി.ഡി. സതീശന്റെ ഈ സോഷ്യല് മീഡിയ ഹിറ്റ്.
