റിലീസ് ചെയ്ത് രണ്ട് വർഷങ്ങൾക്ക് ശേഷം വീണ്ടും പ്രേക്ഷകർക്ക് മുന്നിലേക്ക്; 'അടിത്തട്ട്' ഒടിടിയിലേക്ക്; സണ്ണി വെയ്ന്‍, ഷൈന്‍ ടോം ചാക്കോ ചിത്രം നവംബർ 15 ന് സ്‌ട്രീമിംഗ്‌ ആരംഭിക്കും
തീയേറ്ററുകളിൽ എത്തി മികച്ച നിരൂപക പ്രശംസ പിടിച്ചു പറ്റിയിട്ടും അധികം ആരും ശ്രദ്ധിക്കാതെ പോയ ഒരു ചിത്രമായിരുന്നു 'അടിത്തട്ട്'. സണ്ണി വെയ്ന്‍, ഷൈന്‍ ടോം ചാക്കോ എന്നിവരെ പ്രധാന കഥാപാത്രങ്ങളാക്കി ജിജോ ആന്‍റണിയാണ് ചിത്രം സംവിധാനം ചെയ്തത്. ഒടുവിൽ 53-ാമത് കേരള സംസ്ഥാന ചലച്ചിത്ര അവാർഡിൽ മികച്ച രണ്ടാമത്തെ ചിത്രമായി തിരഞ്ഞെടുക്കപ്പെട്ടതോടെയാണ് 'അടിത്തട്ട്' വീണ്ടും ചർച്ചയായത്.
2022 ജൂലൈയിൽ തിയറ്ററുകളിലെത്തിയ ചിത്രത്തിന്റെ ഒടിടി റിലീസ് തീയതി ഇപ്പോൾ പ്രഖ്യാപിച്ചിരിക്കുകയാണ്. രണ്ട് വര്‍ഷങ്ങള്‍ക്കിപ്പുറമാണ് ചിത്രം ഒടിടി പ്ലാറ്റ്ഫോമിലേക്ക് എത്തുന്നത്. പ്രമുഖ പ്ലാറ്റ്‍ഫോം ആയ ആമസോണ്‍ പ്രൈം വീഡിയോയിലൂടെ ചിത്രം നവംബർ 15 പ്രേക്ഷകർക്ക് മുന്നിലെത്തും.
ഖൈസ് മില്ലനാണ് ചിത്രത്തിന്റെ തിരക്കഥയെഴുതിയത്. കൊന്തയും പൂണൂലും (2014), ഡാർവിൻ്റെ പരിണാമം (2016), പോക്കിരി സൈമൺ (2017) തുടങ്ങിയ ചിത്രങ്ങൾക്ക് ശേഷം ജിജോ ആൻ്റണി ഒരുക്കിയ ചിത്രമാണ് 'അടിത്തട്ട്'. 90 ശതമാനവും കടലില്‍ ചിത്രീകരിച്ച ചിത്രമായിരുന്നു ഇത്.
കടലിലെ മത്സ്യബന്ധന രംഗങ്ങളൊക്കെ ഡ്യൂപ്പ് ഇല്ലാതെയാണ് അഭിനേതാക്കള്‍ ചെയ്തിരിക്കുന്നത്. മിഡില്‍ മാര്‍ച്ച് സ്റ്റുഡിയോസ്, കാനായില്‍ ഫിലിംസ് എന്നീ ബാനറുകളില്‍ സൂസന്‍ ജോസഫ്, സിന്‍ ട്രീസ എന്നിവരാണ് ചിത്രത്തിന്റെ നിര്‍മ്മാണം. ജയപാലന്‍, അലക്സാണ്ടര്‍ പ്രശാന്ത്, മുരുകല്‍ മാര്‍ട്ടിന്‍, ജോസഫ് യേശുദാസ്, മുള്ളന്‍, സാബുമോന്‍ അബ്ദുസമദ് തുടങ്ങിയവരാണ് മറ്റു കഥാപാത്രങ്ങളെ അവതരിപ്പിക്കുന്നത്. ഛായാഗ്രഹണം പാപ്പിനു ആണ്.
എക്സിക്യൂട്ടീവ് പ്രൊഡ്യൂസര്‍ വിനീഷ് വിജയന്‍, സംഗീതം നെസെര്‍ അഹമ്മദ്, എഡിറ്റിംഗ് നൌഫല്‍ അബ്ദുള്ള, സൌണ്ട് ഡിസൈന്‍ സിങ്ക് സിനിമ, സൌണ്ട് മിക്സിംഗ് സിനോയ് ജോസഫ്, സംഘട്ടന സംവിധാനം ഫിനിക്സ് പ്രഭു, കലാസംവിധാനം അഖില്‍രാജ് ചിറയില്‍, വസ്ത്രാലങ്കാരം സ്റ്റെഫി സേവ്യര്‍, മേക്കപ്പ് രഞ്ജിത്ത് മണലിപ്പറമ്പില്‍, പ്രൊഡക്ഷന്‍ കണ്‍ട്രോളര്‍ ദീപക് പരമേശ്വര്‍, വിതരണം ക്യാപിറ്റല്‍ സ്റ്റുഡിയോസ്. എ സര്‍ട്ടിഫിക്കറ്റ് ആയിരുന്നു ചിത്രത്തിന്.