ധനുഷിന്റെ 'കുബേര' ഒ.ടി.ടിയിലേക്ക്; ആമസോണ്‍ പ്രൈം വീഡിയോ വഴി ജൂലൈ 18ന് സ്ട്രീമിങ് ആരംഭിക്കും
ചെന്നൈ: ധനുഷിനെ നായകനാക്കി ശേഖര്‍ കമ്മൂല സംവിധാനം ചെയ്ത കുബേര ഒ.ടി.ടിയിലേക്ക്. ആമസോണ്‍ പ്രൈം വിഡിയോയാണ് സിനിമയുടെ ഒ.ടി.ടി റൈറ്റ്‌സ് നേടിയിരിക്കുന്നത്. ജൂലൈ 18നായിരിക്കും സ്ട്രീമിങ് ആരംഭിക്കുന്നതെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.
ദുല്‍ഖറിന്റെ വേഫെറര്‍ ഫിലിംസ് ആണ് ചിത്രം കേരളത്തില്‍ എത്തിച്ചത്. ധനുഷിന്റെ കരിയറിലെ തന്നെ ഏറ്റവും വലിയ ബോക്സ് ഓഫീസ് ഓപ്പണിങ് ആണ് ചിത്രം ആദ്യ ദിനം സ്വന്തമാക്കിയത്. ആദ്യ ദിനം ആഗോള ഗ്രോസ് ആയി 30 കോടിയോളം സ്വന്തമാക്കിയ ചിത്രം, രണ്ടാം ദിനം കൊണ്ട് തന്നെ 50 കോടി ക്ലബിലും ഇടം പിടിച്ചിരുന്നു. കുബേര ആഗോള ബോക്സ് ഓഫീസില്‍ നിന്ന് 16 ദിവസം കൊണ്ട് 132 കോടിയാണ് നേടിയിരിക്കുന്നത് എന്നാണ് ഒഫിഷ്യല്‍ റിപ്പോര്‍ട്ട്. ചിത്രത്തിന് തെലുങ്കിലും ഓവര്‍സീസ് മാര്‍ക്കറ്റിലും മികച്ച നേട്ടം ഉണ്ടാക്കാനായപ്പോള്‍ തമിഴില്‍ കളക്ഷനില്‍ പിന്നോട്ടുപോയി. കേരളത്തിലും ചലനമുണ്ടാക്കാന്‍ സാധിച്ചിരുന്നില്ല.
തമിഴിലും തെലുങ്കിലുമായി ഒരുക്കിയ ചിത്രം ഇന്ത്യക്ക് പുറമെ വിദേശത്തും മികച്ച പ്രതികരണമാണ് നേടുന്നത്. നോര്‍ത്ത് അമേരിക്കയില്‍ ധനുഷിന്റെ കരിയറിലെ തന്നെ ഏറ്റവും വലിയ ഗ്രോസ്സര്‍ ആയി കുബേര മാറിയെന്നാണ് റിപ്പോര്‍ട്ട്. ആദ്യ ദിനത്തേക്കാള്‍ കൂടുതല്‍ ടിക്കറ്റുകളാണ് ചിത്രത്തിന് രണ്ടാം ദിനം ബുക്ക് മൈ ഷോയിലൂടെ വിറ്റു പോയത്. ധനുഷിനൊപ്പം തെലുങ്ക് സൂപ്പര്‍താരം നാഗാര്‍ജുനയും രശ്മിക മന്ദാനയും എത്തുന്നുണ്ട്.
ഈ വര്‍ഷം ഇറങ്ങുന്ന ധനുഷിന്റെ രണ്ടാമത്തെ ചിത്രമാണ് കുബേര. ആദ്യ ചിത്രമായ 'നിലാവ്ക്ക് എന്‍ മേല്‍ എന്നടി കോപം' തിയേറ്ററില്‍ സമ്മിശ്ര പ്രതികരണമായിരുന്നു നേടിയിരുന്നത്. സുനില്‍ നാരംഗ്, പുസ്‌കര്‍ റാം മോഹന്‍ റാവു എന്നിവര്‍ ചേര്‍ന്ന് ശ്രീ വെങ്കടേശ്വര സിനിമാസ് എല്‍എല്‍പി, അമിഗോസ് ക്രിയേഷന്‍സ് പ്രൈവറ്റ് ലിമിറ്റഡ് എന്നിവയുടെ ബാനറില്‍ നിര്‍മിച്ച കുബേര അവതരിപ്പിക്കുന്നത് സോണാലി നാരംഗ് ആണ്.