മുംബൈ ലോക്കല്‍ ട്രെയിന്‍ പ്രമോഷനില്‍ മലയാളി താരം സൗബിന്‍ ഷാഹിറിന്റെ ചിത്രം; ആഘോഷമാക്കി മുംബൈ മലയാളികള്‍
മുംബൈ ലോക്കല്‍ ട്രെയിന്‍ പ്രമോഷനില്‍ മലയാളി താരം സൗബിന്‍ ഷാഹിറിന്റെ ചിത്രം
മുംബൈ: മുംബൈയിലെ ലോക്കല്‍ ട്രെയിന്‍ പ്രൊമോഷന്‍ പോസ്റ്റരുകളില്‍ ആദ്യമായി ഇടം നേടി മലയാളി താരം സൗബിന്‍ ഷാഹിര്‍. രജനീകാന്ത് നായകനായി എത്തിയ ബ്രഹ്‌മാണ്ഡചിത്രമായ കൂലിയുടെ പ്രചാരണത്തിന്റെ ഭാഗമായെത്തിയ സൗബിന്‍ ഷാഹിറിന്റെ ചിത്രം പതിച്ച പോസ്റ്ററുകളാണ് ഇപ്പോള്‍ ശ്രദ്ധേയമായിരിക്കുന്നത്.
പോസ്റ്ററുകള്‍ പതിച്ച ട്രെയിനുകളോടൊപ്പം സെല്‍ഫിയെടുത്ത് സമൂഹമാധ്യമങ്ങളില്‍ പങ്കുവെച്ച് ആഘോഷിക്കുകയാണ് മുംബൈ മലയാളികള്‍. ഒരു മലയാളി താരത്തിന് ബോളിവുഡിന്റെ തലസ്ഥാനത്ത് ഇത്തരത്തില്‍ ലഭിച്ച സ്വീകാര്യതയില്‍ ആവേശത്തിലാണ് മലയാളികള്‍. മുംബൈയിലെ വെസ്റ്റേണ്‍, സെന്‍ട്രല്‍ എസി ലോക്കല്‍ ട്രെയിനുകളില്‍ പോസ്റ്ററുകള്‍ നിറഞ്ഞിരുന്നു.
കൂലിയുടെ പ്രചാരണത്തിന് മുന്‍പെങ്ങും കണ്ടിട്ടില്ലാത്ത വിപുലമായ രീതികളാണ് നിര്‍മാതാക്കള്‍ സ്വീകരിച്ചത്. അമസോണ്‍ ഇന്ത്യ നടത്തിയ ഓണ്‍-പാക്കേജ് പരസ്യ കാമ്പെയ്ന്‍ വഴി ബംഗളൂരു, ഹൈദരാബാദ്, ദില്ലി, മുംബൈ, പൂനെ ഉള്‍പ്പെടെയുള്ള മെട്രോ നഗരങ്ങളിലെ 4 ലക്ഷത്തിലധികം ഡെലിവറി ബോക്സുകള്‍ സിനിമാറ്റിക് ടച്ച്‌പോയിന്റുകളാക്കി. ഉപഭോക്താക്കള്‍ക്കായി പ്രത്യേകമായി തയ്യാറാക്കിയ കൂലി ബാഡ്ജും ഉള്‍പ്പെടുത്തിയിരുന്നു.
രജനീകാന്തിന്റെ ബ്രഹ്‌മാണ്ഡചിത്രമായ കൂലി റിലീസ് ചെയ്ത് നാലാം ദിവസം പിന്നിടുമ്പോള്‍, ഇന്ത്യയില്‍ നിന്നും ചിത്രം മികച്ച കളക്ഷനാണ് നേടുന്നതെന്നാണ് ട്രേഡ് റിപ്പോര്‍ട്ടുകള്‍. ആദ്യ ദിവസം മികച്ച തുടക്കം കുറിച്ചെങ്കിലും തുടര്‍ന്ന് കളക്ഷനില്‍ ഗണ്യമായ ഇടിവ് രേഖപ്പെടുത്തിയതായും റിപ്പോര്‍ട്ടുകളുണ്ട്. നാല് ദിവസങ്ങളില്‍ സിനിമയുടെ ആകെ കളക്ഷന്‍ 194.25 കോടി രൂപയായി.