ടോക്സികിൽ അണിനിരക്കുന്നത് വമ്പൻ താരനിര; ഗംഗയായി ലേഡി സൂപ്പർ സ്റ്റാർ; യാഷ് ചിത്രത്തിലെ നയൻതാരയുടെ ക്യാരക്ടർ പോസ്റ്റർ പുറത്ത്

കൊച്ചി: ഗീതു മോഹൻദാസ് സംവിധാനം ചെയ്യുന്ന യാഷ് ചിത്രം 'ടോക്സിക്'-ലെ നയൻതാരയുടെ ക്യാരക്ടർ പോസ്റ്റർ പുറത്തിറങ്ങി. 'ഗംഗ' എന്ന കഥാപാത്രത്തെയാണ് നയൻതാര ചിത്രത്തിൽ അവതരിപ്പിക്കുന്നത്. വൻ താരനിര അണിനിരക്കുന്ന ഈ ചിത്രത്തിനായി പ്രേക്ഷകർ ആകാംഷയോടെ കാത്തിരിക്കുകയാണ്. നേരത്തെ ചിത്രത്തിൽ കിയാര അദ്വാനിയുടെ ക്യാരക്ടർ പോസ്റ്ററും അണിയറപ്രവർത്തകർ പുറത്തുവിട്ടിരുന്നു. 'നാദിയ' എന്ന കഥാപാത്രമായാണ് കിയാര അദ്വാനി എത്തുന്നത്.

ചിത്രത്തിന്റെ ഫസ്റ്റ് ലുക്ക് പോസ്റ്ററിന് വമ്പൻ സ്വീകാര്യതയായിരുന്നു ലഭിച്ചിരുന്നത്. രക്തം പുരണ്ട ബാത്ത് ടബ്ബിൽ പരുക്കൻ ഭാവത്തിൽ, മുഖം ദൃശ്യമല്ലെങ്കിലും ഒരു പ്രകാശരേഖയാൽ പ്രകാശിച്ചുകൊണ്ട് പുറത്തേക്ക് നോക്കുന്ന യാഷിനെയാണ് പോസ്റ്ററിൽ കണ്ടത്. ടാറ്റൂകളാൽ അലങ്കരിച്ച അദ്ദേഹത്തിന്റെ ശരീരം കഥാപാത്രത്തിന് ഒരു 'ബാഡാസ്' മാനം നൽകി. ചിത്രം മാർച്ച് 19-ന് തിയേറ്ററുകളിൽ എത്തും. ദേശീയ അവാർഡ് ജേതാവ് രാജീവ് രവിയാണ് 'ടോക്സിക്'-ന്റെ ഛായാഗ്രഹണം നിർവഹിക്കുന്നത്.

'കെജിഎഫ്' ചിത്രത്തിൽ യാഷുമായി മുൻപ് സഹകരിച്ച രവി ബസ്രൂർ സംഗീതവും, ഉജ്വൽ കുൽക്കർണി എഡിറ്റിംഗും, ടി.പി. ആബിദ് പ്രൊഡക്ഷൻ ഡിസൈനും കൈകാര്യം ചെയ്യുന്നു. 'ജോൺ വിക്ക്' പരമ്പരയിലെ പ്രവർത്തനങ്ങളിലൂടെ പ്രശസ്തനായ ഹോളിവുഡ് ആക്ഷൻ ഡയറക്ടർ ജെ.ജെ. പെറിയും ദേശീയ അവാർഡ് ജേതാവായ അൻബറിവും ചേർന്നാണ് ചിത്രത്തിലെ പ്രധാനപ്പെട്ട ആക്ഷൻ രംഗങ്ങൾ ഒരുക്കിയിരിക്കുന്നത്.

ഗീതു മോഹൻദാസ് സംവിധാനം ചെയ്യുന്ന മൂന്നാമത്തെ ചിത്രമാണ് 'ടോക്സിക്'. നിവിൻ പോളിയെ നായകനാക്കി ഒരുക്കിയ 'മൂത്തോൻ' മികച്ച നിരൂപക പ്രശംസ നേടുകയും അന്താരാഷ്ട്ര ചലച്ചിത്രമേളകളിൽ പ്രദർശിപ്പിക്കുകയും ചെയ്തിരുന്നു. 2014-ൽ നവാസുദ്ദീൻ സിദ്ധിഖി, ഗീതാഞ്ജലി ഥാപ്പ എന്നിവരെ പ്രധാന കഥാപാത്രങ്ങളാക്കി ഒരുക്കിയ 'ലയേഴ്‌സ് ഡൈസ്' ആയിരുന്നു അവരുടെ ആദ്യ ഫീച്ചർ സിനിമ.