ഐ ആം സീരിയസിലി സര്‍പ്രൈസ്ഡ്... ഷോക്കിംഗ്..! കേസ് എത്തിയത് താരസംഘടനയിലെ മത്സരത്തിന്റെ ഭാഗമെന്ന് കരുതുന്നു; പിന്നില്‍ ആരെങ്കിലും ഉണ്ട്; പരാതിക്കാരനെയും എന്താണ് പരാതിയെന്നും തനിക്ക് അറിയില്ല; ഞാന്‍ ക്രിമിനല്‍ പ്രവര്‍ത്തി ചെയ്‌തെങ്കില്‍ നേരത്തെ കേസ് എടുക്കണ്ടേ; വിവാദ കേസിനെ കുറിച്ച് ശ്വേത മേനോന്‍ മറുനാടനോട്
ഐ ആം സീരിയസിലി സര്‍പ്രൈസ്ഡ്... ഷോക്കിംഗ്..!
കൊച്ചി: അശ്ലീല ചിത്രങ്ങളില്‍ അഭിനയിച്ചു പണം സമ്പാദിക്കുന്നു എന്ന പരാതിയില്‍ തനിക്കെതിരെ കേസെടുത്തതിന് കുറിച്ച് ഒന്നുമറിയില്ലെന്ന് നടി ശ്വേത മേനോന്‍. ഇപ്പോള്‍ തനിക്കെതിരെ ഇത്തരമൊരു കേസ് വന്നെങ്കില്‍ അത് താരസംഘടനയിലെ മത്സരത്തിന്റെ ഭാഗമാണെന്ന് കരുതുന്നുവെന്നും ശ്വേത മറുനാടന്‍ മലയാളിയോട് പ്രതികരിച്ചു.
താരസംഘടനെ ഒരു ചെറിയ ബോഡിയാണ്. അഞ്ഞൂറോളം ആളുകളുടെ ബോഡിയിലാണല്ലോ.. എല്ലവരെയും വിളിച്ചു വോട്ടു ചോദിക്കുകയായിരുന്നു ഞാന്‍. ഇങ്ങനെ ഒരു കേസ് പ്രതീക്ഷിച്ചില്ല. ജാമ്യമില്ലാ വകുപ്പില്‍ കേസെടുത്തതില്‍ ഐ ആം സീരിയസിലി സര്‍പ്രൈസ്ഡ്. ശരിക്കും ഷോക്കിംഗായ കാര്യമാണിത്. ഞാന്‍ ക്രിമിനലായ ഒരു കാര്യം ചെയ്തുവെങ്കില്‍ ഇപ്പോഴാണോ കേസെടുക്കുന്നത്, നേരത്തെ കേസെടുക്കേണ്ടേ- ശ്വേത ചോദിക്കുന്നു.
കുക്കു പരമേശ്വരനും തനിക്കെതിരെയും മാത്രമാണ് പരാതികള്‍ വരുന്നത്. മറ്റാര്‍ക്കെതിരെയും ഇത്തരം പരാതികള്‍ വരുന്നില്ലെന്നും ശ്വേത ചൂണ്ടിക്കാട്ടി. അതുകൊണ്ട് ഈ കേസും മത്സരത്തിന്റെ ഭാഗമായേ എടുത്തിട്ടുള്ളൂ. എനിക്കെതിരായ പരാതി എന്താണെന്ന് വായിച്ചു നോക്കിയിട്ടില്ല, പരാതിക്കാരനെയും അറിയില്ലെന്നും ശ്വേത പറഞ്ഞു.
മാര്‍ട്ടിന്‍ മേനാച്ചേരി എന്നയാളുടെ പരാതിയിലാണ് എറണാകുളം സെന്‍ട്രല്‍ പോലീസ് ശ്വേതക്കെതിരെ കേസെടുത്തിരിക്കുന്നത്. കതോടതി ഉത്തരവ് പ്രകാരമാണ് കേസെടുത്തിരിക്കുന്നത്. അശ്ലീല ചിത്രങ്ങളില്‍ അഭിനയിച്ച് പണം സമ്പാദിച്ചുവെന്ന പരാതിയില്‍ കൊച്ചി സെന്‍ട്രല്‍ പൊലീസ് ആണ് നടിക്കെതിരെ കേസ് എടുത്തിരിക്കുന്നത്.
മനാച്ചേരിയുടെ പരാതിയിലാണ് കേസ്. ഐടി നിയമത്തിലെ 67 (എ) വകുപ്പ് പ്രകാരവും അനാശാസ്യ പ്രവര്‍ത്തന നിരോധന നിയമ പ്രകാരവുമാണ് കേസ്. 'സാമ്പത്തിക ലാഭത്തിന് വേണ്ടി നഗ്നത പ്രചരിപ്പിച്ചു' എന്നാണ് എഫ്.ഐ.ആറില്‍ രേഖപ്പെടുത്തിരിക്കുന്നത്. പ്രതി സാമ്പത്തിക ലാഭത്തിനുവേണ്ടി ഗൂഢ ഉദ്ദേശ്യത്തോടെ സിനിമയിലും പരസ്യങ്ങളിലും ഉള്‍പ്പെടെ നഗ്നത പ്രദര്‍ശിപ്പിച്ച് അഭിനയിച്ചു, സോഷ്യല്‍ മീഡിയയിലൂടെയും പോണ്‍ സൈറ്റുകളിലൂടെയും ദൃശ്യങ്ങള്‍ പ്രചരിപ്പിച്ച് വരുമാനം നേടി തുടങ്ങിയ ആരോപണങ്ങളാണ് പോലീസ് എഫ്‌ഐആറില്‍ രേഖപ്പെടുത്തിയിരിക്കുന്നത്.
വര്‍ഷങ്ങള്‍ക്ക് മുമ്പ് ശ്വേത അഭിനയിച്ച പരസ്യചിത്രങ്ങളിലെയും സിനിമകളിലെയും ഇന്റിമേറ്റ് രംഗങ്ങള്‍ സോഷ്യല്‍ മീഡിയയിലും അശ്ലീല വെബ് സൈറ്റുകളിലും ചിലര്‍ പ്രചരിപ്പിക്കുന്നുണ്ടായിരുന്നു. അഭിനേത്രി എന്ന നിലയില്‍ ശ്വേത മേനോന്‍ സിനിമയില്‍ തന്റെ ജോലി ചെയ്തത് ചിലര്‍ ക്ലിപ്പുകളാക്കി പ്രചരിപ്പിക്കുകയാണ് ചെയ്തത്. ശ്വേതയുടേത് കൂടാതെ മറ്റു നടിമാരുടെയും രംഗങ്ങള്‍ ഇത്തരത്തില്‍ സൈബറിടത്തില്‍ പ്രചരിക്കുന്നുണ്ട്.
എറണാകുളം സെന്‍ട്രല്‍ പോലീസിനാണ് അന്വേഷണ ചുമതല. അശ്ലീല വേഷങ്ങള്‍ ഇനിയും ചെയ്യുമെന്ന് ശ്വേതാ മേനോന്‍ സ്വയം പ്രഖ്യാപിച്ചിട്ടുണ്ടെന്നും കാമസൂത്ര പരസ്യം കണ്ടത് കോടിയോളം ആളുകള്‍ ആണെന്ന് നടി തന്നെ ഒരു അഭിമുഖത്തില്‍ പറഞ്ഞിട്ടുണ്ടെന്നും പരാതിക്കാരന്‍ ആരോപിച്ചത്. കാമസൂത്രയുടെ പരസ്യം കൂടാതെ രതിനിര്‍വേദം, പാലേരി മാണിക്ക്യം, കളിമണ്ണ് തുടങ്ങിയ സിനിമകളില്‍ നടി ഇന്റിമേറ്റായി അഭിനയിച്ച രംഗങ്ങളുമാണ് പരാതിക്കാരന്‍ ചൂണ്ടിക്കാട്ടിയത്.
ഇപ്പോഴത്തെ പരാതിക്ക് പിന്നില്‍ അമ്മ തെരഞ്ഞെടുപ്പുമായി ബന്ധപ്പെട്ട നീക്കങ്ങളാണ് എന്നാണ് കരുതുന്നത്. ശ്വേത അമ്മയുടെ പ്രസിഡന്റ് സ്ഥാനത്തേക്ക് വിജയിക്കുന്നത് തടയാന്‍ വേണ്ടി ആസൂത്രിത നീക്കം ഒരു വിഭാഗം ആളുകള്‍ കുറച്ചു ദിവസങ്ങളായി നടത്തുന്നുണ്ട്. ഇതിനിടെയാണ് മാര്‍ട്ടിന്‍ എറണാകുളം സിജെഎം കോടതിയെ കേസെടുക്കണം എന്നാവശ്യപ്പെട്ട് ഹര്‍ജി സമര്‍പ്പിച്ചത്. ജൂലൈ 30നാണ് കോടതിയില്‍ പരാതി എത്തിയത്. കോടതിയുടെ നിര്‍ദേശത്തെ തുടര്‍ന്നാണ് പോലീസ് നടിക്കെതിരെ കേസ് രജിസ്റ്റര്‍ ചെയ്തിരിക്കുന്നത്. അനാശാസ്യ നിരോധന നിയമപ്രകാരവും ഐടി ആക്ട് പ്രകാരവുമാണ് കേസെടുത്തിരിക്കുന്നത്.