എല്ലാം മറന്ന് ഭയങ്കര സന്തോഷത്തിൽ നൃത്തം ചെയ്തു കൊണ്ടിരുന്ന വയോധിക; കലി തുള്ളിയെത്തിയ ഒരു യുവാവിന്റെ വരവിൽ ചിരി കരച്ചിലായി; ഒടുവിൽ സംഭവിച്ചത്
ബാർമർ: രാജസ്ഥാനിലെ ബാർമർ ജില്ലയിൽ ഒരു പൊതു ഡിജെ പരിപാടിക്കിടെ നൃത്തം ചെയ്യുകയായിരുന്ന വൃദ്ധയെ പിന്നിൽ നിന്ന് ചവിട്ടി വീഴ്ത്തിയ സംഭവത്തിൽ യുവാവ് അറസ്റ്റിൽ. ദീപാറാം എന്ന് പേരുള്ളയാളാണ് പോലീസ് പിടിയിലായത്.
ബഖാസർ പോലീസ് സ്റ്റേഷൻ പരിധിയിലെ ജതോൺ കാ ബേര സർല ഗ്രാമത്തിൽ നടന്ന പ്രാദേശിക പരിപാടിക്കിടെയാണ് മനുഷ്യത്വരഹിതമായ ഈ സംഭവം അരങ്ങേറിയത്. സ്പീക്കറിലൂടെ കേൾപ്പിച്ച ഡിജെ സംഗീതത്തിനൊപ്പം ചുവടുവെച്ച വൃദ്ധയെ ദീപാറാം യാതൊരു പ്രകോപനവുമില്ലാതെ പിന്നിൽ നിന്ന് ചവിട്ടിവീഴ്ത്തുകയായിരുന്നു. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ അതിവേഗം പ്രചരിക്കുകയും വൻ പ്രതിഷേധത്തിന് കാരണമാവുകയും ചെയ്തു.
ഈ ക്രൂരമായ ആക്രമണത്തിനെതിരെ സമൂഹമാധ്യമങ്ങളിൽ വലിയ വിമർശനമാണ് ഉയർന്നത്. സ്ത്രീകൾക്കെതിരായ അതിക്രമങ്ങളെ അപലപിച്ച് നിരവധി പേർ രംഗത്തെത്തി. പ്രതിക്കെതിരെ കർശന നടപടി വേണമെന്ന് ആവശ്യമുയർന്നു. "മനുഷ്യത്വരഹിതമായ പെരുമാറ്റം", "ക്രൂരത", "രാജസ്ഥാൻ സ്ത്രീകൾക്ക് നരകമാണ്" തുടങ്ങിയ പരാമർശങ്ങൾ സാമൂഹിക മാധ്യമങ്ങളിൽ നിറഞ്ഞു. സംസ്ഥാനത്തെ സ്ത്രീ സുരക്ഷയെക്കുറിച്ചും ഇത് വ്യാപകമായ ആശങ്കകൾക്ക് വഴിവെച്ചു.
സമൂഹമാധ്യമങ്ങളിലെ പ്രതിഷേധം ശക്തമായതിനെത്തുടർന്നാണ് ബഖാസർ പോലീസ് ദീപാറാമിനെ അറസ്റ്റ് ചെയ്തത്. പൊതുസ്ഥലത്ത് ഒരു സ്ത്രീയെ ആക്രമിക്കുന്നത് ഒരു കുറ്റകൃത്യമാണെന്നും, ഈ സംഭവം സ്ത്രീകളുടെ സുരക്ഷയെക്കുറിച്ചുള്ള ആശങ്കകൾ വീണ്ടും വർദ്ധിപ്പിക്കുന്നുവെന്നും നിരീക്ഷകർ ചൂണ്ടിക്കാട്ടുന്നു.