ബലാത്സംഗ ശ്രമം ചെറുത്ത യുവതിയെ യുവാവ് ട്രെയിനിന് മുന്നിലേക്ക് തള്ളിയിട്ട് കൊന്നു; സംഭവം താനെ ദിവ റെയില്‍വേ സ്റ്റേഷനില്‍
ബലാത്സംഗ ശ്രമം ചെറുത്ത യുവതിയെ യുവാവ് ട്രെയിനിന് മുന്നിലേക്ക് തള്ളിയിട്ട് കൊന്നു
മുംബൈ: റെയില്‍വേ സ്റ്റേഷനില്‍ ബലാത്സംഗ ശ്രമം ചെറുത്ത യുവതിയെ 30കാരന്‍ ട്രെയിനിന് മുന്നിലേക്ക് തള്ളിയിട്ട് കൊന്നു. മുംബൈയിലെ താനെ ദിവ റെയില്‍വേ സ്റ്റേഷനിലാണ് സംഭവം. 39 കാരനായ രാജന്‍ സിങ് എന്നയാള്‍ അറസ്റ്റിലായതായി താനെ റെയില്‍വേ പൊലീസ് അറിയിച്ചു.
ശുചീകരണ തൊഴിലാളികള്‍ സംഭവത്തിന് ദൃസാക്ഷികളാണ്. യുവാവിന്റെ ആക്രമണത്തില്‍നിന്ന് രക്ഷപ്പെടാന്‍ യുവതി ഏറെ ശ്രമിച്ചു. ഈ സമയം എത്തിയ ഗുഡ്‌സ് ട്രെയിനിന് മുന്നിലേക്ക് യുവതിയെ തള്ളിയിടുകയായിരുന്നുവെന്ന് തൊഴിലാളികള്‍ പറയുന്നു. തങ്ങള്‍ ഇടപെടാന്‍ ശ്രമിച്ചപ്പോഴേക്കും എല്ലാം കഴിഞ്ഞിരുന്നുവെന്നും ഇവര്‍ പറഞ്ഞു. ട്രെയിനിന് മുന്നില്‍ വീണ സ്ത്രീ തല്‍ക്ഷണം മരിച്ചു. ഇവരെ തിരിച്ചറിഞ്ഞിട്ടില്ല.
സ്ഥലത്തുനിന്ന് അക്രമി രക്ഷപ്പെടാന്‍ ശ്രമിച്ചെങ്കിലും റെയില്‍വേ പൊലീസ് ഇയാളെ പിടികൂടി. യുവതിയെ ഇയാള്‍ക്ക് നേരത്തെ പരിചയമില്ല. യുവതിയെ പിന്തുടര്‍ന്ന് ഇയാള്‍ റെയില്‍വേ സ്റ്റേഷനിലെത്തുകയായിരുന്നു. തുടര്‍ന്ന് ബലാത്സംഗത്തിന് മുതിരുകയായിരുന്നു. അക്രമിക്കെതിരെ കൊലപാതക കുറ്റം ചുമത്തിയാണ് കേസെടുത്തിരിക്കുന്നത്.