ജിമ്മില്‍ പരിശീലിക്കുന്നതിനിടെ കുഴഞ്ഞുവീണു; ബംഗാള്‍ ക്രിക്കറ്റ് താരം 22ാം വയസ്സില്‍ ഹൃദയാഘാതത്താല്‍ മരിച്ചു
ജിമ്മില്‍ പരിശീലിക്കുന്നതിനിടെ കുഴഞ്ഞുവീണു; ബംഗാള്‍ ക്രിക്കറ്റ് താരം 22ാം വയസ്സില്‍ ഹൃദയാഘാതത്താല്‍ മരിച്ചു
കൊല്‍ക്കത്ത: ജിമ്മില്‍ പരിശീലിക്കുന്നതിനിടെ ബംഗാളിന്റെ യുവ ക്രിക്കറ്റ് താരം ഹൃദയാഘാതത്താല്‍ മരിച്ചു. 22 വയസ്സുകാരനായ പ്രിയജിത് ഘോഷാണ് ജിമ്മില്‍ വ്യായാമം ചെയ്യുന്നതിനിടെ ഹൃദയാഘാതമുണ്ടായി മരിച്ചത്. താരത്തെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല. ബംഗാളിലെ ജില്ലാതല ടൂര്‍ണമെന്റുകളില്‍ തിളങ്ങിയ പ്രിയജിത് രഞ്ജി ടീമില്‍ ഇടം ലഭിക്കുമെന്ന പ്രതീക്ഷയിലായിരുന്നു.
ബംഗാള്‍ ക്രിക്കറ്റ് അസോസിയേഷന്‍ സംഘടിപ്പിച്ച ജില്ലാ അണ്ടര്‍ 16 ക്രിക്കറ്റ് ടൂര്‍ണമെന്റിന്റെ 201819 സീസണില്‍ ടോപ് സ്‌കോററായിരുന്നു പ്രിയജിത്. ജന്മനാടായ ഭോല്‍പുരിലെ ഒരു ജിമ്മില്‍ പരിശീലിക്കുന്നതിനിടെ കഴിഞ്ഞ ദിവസമാണ് താരത്തിന് ശാരീരിക ബുദ്ധിമുട്ടുകള്‍ അനുഭവപ്പെട്ടത്. പിന്നാലെ കുഴഞ്ഞുവീണ് മരിക്കുകയായിരുന്നു. വരാനിരിക്കുന്ന ആഭ്യന്തര ക്രിക്കറ്റ് സീസണിനു വേണ്ടിയുള്ള തയാറെടുപ്പുകള്‍ക്കിടെയായിരുന്നു മരണം.
പ്രിയജിത്തിന്റെ വിയോഗത്തില്‍ ബംഗാള്‍ ക്രിക്കറ്റ് അസോസിയേഷന്‍ അനുശോചനം രേഖപ്പെടുത്തി. ബുദ്ധിമുട്ടേറിയ സമയത്ത് പ്രിയജിത്തിന്റെ കുടുംബത്തിനൊപ്പം നില്‍ക്കേണ്ട സമയമാണിതെന്ന് ബംഗാള്‍ പ്രോ ട്വന്റി20 ലീഗ് എക്‌സ് പ്ലാറ്റ്‌ഫോമില്‍ കുറിച്ചു.