പാളത്തിൽ ബൈക്ക് ഉപേക്ഷിച്ച് കടന്നുകളഞ്ഞു; പാഞ്ഞെത്തിയ വന്ദേ ഭാരത് ബൈക്കിനെ ഇടിച്ചുതെറിപ്പിച്ചു; നിലവിളിച്ച് യാത്രക്കാർ; ഒഴിവായത് വൻ ദുരന്തം; സംഭവം ലഖ്നൗവിൽ

ഉത്തർപ്രദേശ്: ചീറിപാഞ്ഞെത്തിയ വന്ദേ ഭാരത് ട്രെയിൻ പാളത്തിലിരുന്ന ബൈക്കിനെ ഇടിച്ചുതെറിപ്പിച്ചു. സംഭവത്തെ തുടർന്ന് ഏറെനേരമാണ് യാത്രക്കാരെ ഭീതിയുടെ മുൾമുനയിൽ നിർത്തിയത്. അട്ടിമറിക്കാൻ ശ്രമമെന്നാണ് അധികൃതർ സംശയിക്കുന്നത്. ട്രെയിൻ വരുന്ന സമയത്ത് ഒരാൾ പാളത്തിൽ ബൈക്ക് ഉപേക്ഷിച്ച് കടന്നുകളയുകയും ചെയ്തു.

ട്രെയിൻ ഈ ബൈക്കിൽ ഇടിക്കുകയും ഏറെ ദൂരം വലിച്ചിഴച്ച് കൊണ്ടുപോകുകയും ചെയ്തു. യുപി യിലെ പ്രയാഗ്‌രാജ് ജില്ലയിൽ വെള്ളിയാഴ്ച വൈകുന്നേരം 4:20 ഓടെയാണ് സംഭവം നടന്നത്.

ഒഴിവായത് വൻ ദുരന്തമെന്നാണ് അധികൃതർ പറയുന്നത്. പെട്ടെന്ന് ലോക്കോ പൈലറ്റ് എമർജൻസി ബ്രേക്കിട്ടാണ് ഒടുവിൽ ട്രെയിനിനെ നിർത്തിയത്. വാരണാസിയിൽ നിന്ന് പ്രയാഗ്‌രാജ് ജംഗ്ഷനിലേക്ക് പോവുകയായിരുന്ന വന്ദേ ഭാരത് ട്രെയിനിന് മുന്നിലാണ് ബൈക്ക് ഉപേക്ഷിച്ച് യുവാവ് കടന്നുകളഞ്ഞത്.

ഝാൻസി സ്റ്റേഷന് സമീപം ബന്ദ്വ താഹിർപൂർ റെയിൽവേ അടിപ്പാതയിലൂടെ ചില യുവാക്കൾ ബൈക്കുമായി റെയിൽവേ ട്രാക്ക് മുറിച്ചുകടക്കുകയായിരുന്നു. വന്ദേ ഭാരത് ട്രെയിൻ അടുത്തെത്തിയപ്പോൾ യുവാക്കൾ ബൈക്ക് ട്രാക്കിൽ ഉപേക്ഷിച്ച് കടന്ന് കളയുകയും ചെയ്തു.

അതിവേഗത്തിലെത്തിയ ട്രെയിൻ ബൈക്കുമായി ശക്തമായാണ് കൂട്ടിയിടിച്ചത്. ഒടുവിൽ ഇടിയുടെ ആഘാതത്തിൽ ട്രെയിനിനുള്ളിൽ വലിയ കുലുക്കം അനുഭവപ്പെടുകയും ബൈക്ക് വലിച്ചിഴയ്ക്കുന്ന ശബ്ദം കേൾക്കുകയും ചെയ്തെന്ന് യാത്രക്കാർ പറയുന്നു.