വിദേശത്ത് ജോലി വാഗ്ദാനം നൽകി തട്ടിപ്പ്; മെച്ചപ്പെട്ട ജീവിത സൗകര്യം ആഗ്രഹിച്ച് പറ്റിക്കപ്പെട്ടവരിൽ വാവ സുരേഷിന്റെ സുഹൃത്തും; കാശ് നൽകി ഒരു വർഷം കാത്തിരുന്നിട്ടും ജോലിയില്ല; ഒടുവിൽ കുടുംബം കടക്കെണിയിലായി; കൊല്ലത്ത് പിടിയിലായ പ്രതികൾ കബളിപ്പിച്ചത് 300 ഓളം ഉദ്യോഗാർത്ഥികളെ; സംഭവം ഇങ്ങനെ

കൊല്ലം: യൂറോപ്യൻ രാജ്യങ്ങളിൽ ജോലി വാഗ്ദാനം ചെയ്തു മുന്നൂറിലധികം പേരിൽ നിന്ന് പണം കബളിപ്പിച്ച കേസിൽ പുറത്ത് വരുന്നത് ഞെട്ടിക്കുന്ന വിവരങ്ങൾ. തട്ടിപ്പിൽ പെട്ടവരിൽ വാവ സുരേഷിന്റെ സുഹൃത്തും. അർജുൻ ശുചീന്ദ്രൻ എന്നയാളാണ് തട്ടിപ്പിനിരയായത്. ഇയാളുടെ പക്കൽ നിന്നും രണ്ടര ലക്ഷം രൂപയാണ് പ്രതികൾ സെൻറ് റാഫേൽസ് അക്കാദമി എന്ന സ്ഥാപനത്തിന്റെ പേരിൽ തട്ടിയത്. വിവിധ ജില്ലകളിലായി പല പേരിൽ സ്ഥാപനങ്ങൾ നടത്തി തട്ടിപ്പ് നടത്തിയിരുന്ന സംഘം പോലീസിന്റെ പിടിയിലായിരുന്നു.

300 ഓളം ഉദ്യോഗാർത്ഥികളെയാണ് വിദേശത്ത് ജോലി വാഗ്‌ദാനം ചെയ്ത് ഇവർ പണം തട്ടിയത്. കേസിൽ 3 പേരാണ് പിടിയിലായത്. കേസിലെ രണ്ടാം പ്രതി ഒളിവിലാണെന്ന് പോലീസ് വ്യക്തമാക്കി. കൊല്ലം ഈസ്റ്റ് പോലീസ് ജില്ലാ അതിർത്തിയായ കല്ലമ്പലത്തു നിന്നാണ് പ്രതികൾ പിടിയിലായത്. പിടിയിലായവരുടെ പേരിൽ ക്രൊയേഷ്യയിലേക്കു കൊണ്ടുപോകാമെന്നു പറഞ്ഞു മനുഷ്യക്കടത്തു നടത്തിയെന്നും പരാതിയുണ്ട്. തട്ടിപ്പ് നടത്തിയ കാശിൽ പ്രതികൾ ആഡംബര ജീവിതം നയിക്കുകയാണ്. ബെൻസു കാർ ഉൾപ്പെടെയുള്ള സൗകര്യങ്ങളുണ്ട്. കാഷ്യൂ ഫാക്ടറി തുടങ്ങാനുള്ള ശ്രമം നടത്തിയിരുന്നതായി പോലീസ് പറഞ്ഞു.

ഒന്നാം പ്രതി കോവൂർ അരിനല്ലൂർ മുക്കോടിയിൽ തെക്കേതിൽ ബാലു ജി. നാഥ്(31), മൂന്നാം പ്രതിയും ഒന്നാം പ്രതിയുടെ ഭാര്യാമാതാവുമായ അനിത കുമാരി(48), നാലാം പ്രതിയും ബാലുവിന്റെ ഭാര്യയുമായ അശ്വതി(26) എന്നിവരെയാണ് പോലീസ് അറസ്റ്റ് ചെയ്തത്. രണ്ടാം പ്രതി പരവൂർ സ്വദേശിയും കോട്ടയം രാമപുരം മഹാലക്ഷ്മി നിലയത്തിൽ താമസക്കാരനുമായ വേണു വിജയൻ എന്നയാളാണ് ഒളിവിലുള്ളത്.

2022 ഓഗസ്റ്റ് 25 നാണ് വിദേശത്ത് ജോലി വാഗ്‌ദാനം നൽകി അർജുൻ ശുചീന്ദ്രനിൽ നിന്നും ഇവർ കാശ് വാങ്ങിയത്. ഇടനിലക്കാരനായി നിന്നത് റോഷൻ എന്ന വക്കീലായിരുന്നു. ഇയാളുടെ ആവശ്യ പ്രകാരം ആനി മാർഗരറ്റ് മേഴ്‌സി എന്നയാളുടെ അക്കൗണ്ടിലേക്ക് രണ്ടര ലക്ഷം രൂപ അർജുൻ കൈമാറി. എന്നാൽ ഒരു വർഷം കഴിഞ്ഞിട്ടും ജോലി ലഭിക്കാതായതോടെ അർജുൻ നൽകിയ പണം തിരികെ ആവശ്യപ്പെടുകയായായിരുന്നു. എന്നാൽ റീഫണ്ടുമായുള്ള കാര്യങ്ങൾ കൈകാര്യം ചെയ്യുന്നത് റോഷനാണെന്ന് പ്രതികൾ പറയുകയായിരുന്നു.

തുടർന്ന് പണം തിരിച്ചു ലഭിക്കുന്നതിനായി അർജുൻ റോഷനുമായി ബന്ധപ്പെടുകയായിരുന്നു. എന്നാൽ പല അവധികൾ പറഞ്ഞ് പണം തിരികെ നൽകാതായതോടെ അർജുന്റെ കുടുംബം കടുത്ത സാമ്പത്തിക പ്രതിസന്ധിയിലായി. ഇതിനിടെ അർജുന്റെ അച്ഛൻ പക്ഷാഘാതം സംഭവിച്ച് കിടപ്പിലായി. സംഭവുമായി ബന്ധപ്പെട്ട് പോലീസ് സ്റ്റേഷനുകളിൽ കയറി ഇറങ്ങിയിട്ടും ന്യായമായ നീതി ഇവർക്ക് ലഭിച്ചില്ല. ഇതിനിടെയാണ് തട്ടിപ്പിനിരയായ മറ്റൊരാളുടെ പരാതിയിൽ പ്രതികൾ പിടിയിലാകുന്നത്.

ക്ലീറ്റസ് ആന്റണി എന്നയാളുടെ പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതികൾ പിടിയിലായത്. ഫോർസൈറ്റ് ഓവർസീസ് എന്ന സ്ഥാപനത്തിന്റെ പേരിലായിരുന്നു ഇത്തവണ തട്ടിപ്പ് നടത്തിയിരുന്നതായി തെളിഞ്ഞത്. ദമ്പതികളായ ബാലുവും അശ്വതിയും ചേർന്നാണ് സ്ഥാപനം നടത്തിയിരുന്നത്. 2023 ഓഗസ്റ്റിലാണ് നീണ്ടകര മെർലിൻ ഭവനിൽ ക്ലീറ്റസ് ആന്റണി പരാതി നൽകിയത്. തുടർന്ന് പോലീസ് കേസ് രജിസ്റ്റർ ചെയ്തിരുന്നു.

പോലീസ് തങ്ങൾക്കായി അന്വേഷണം ആരംഭിച്ചെന്ന് മനസ്സിലാക്കിയതോടെ ഒളിവിൽ പോയ പ്രതികൾ നിയമ നടപടികളിലേക്ക് കടന്നു. ശേഷം പല വീടുകളിലായി മാറി മാറി വാടയ്ക്ക് താമസിക്കുകയായിരുന്നു. ഇതിനോടകം മൂന്നു വാടക വീടുകളിൽ ഇവർ താമസിച്ചു. പ്രതികൾ മുൻകൂർ ജാമ്യത്തിന് സെഷൻസ് കോടതിയെയും തുടർന്ന് ഹൈക്കോടതിയെയും സമീപിക്കുകയായിരുന്നു. എന്നാൽ ജാമ്യാപേക്ഷ തള്ളിയതോടെ ഇവരെ അറസ്റ്റ് ചെയ്യാൻ പോലീസിന് നിർദ്ദേശം ലഭിച്ചതിനെ തുടർന്നായിരുന്നു നടപടി. കഴിഞ്ഞയാഴ്ചയാണ് പ്രതികളെ അറസ്റ്റ് ചെയ്യാൻ ഈസ്റ്റ് പോലീസിന് നിർദേശം ലഭിച്ചത്.

തുടർന്നു നടത്തിയ അന്വേഷണത്തിലാണ് കല്ലമ്പലം ഭാഗത്ത് വാടകയ്ക്കു താമസിക്കുന്നെന്ന വിവരം ലഭിച്ചത്. കല്ലമ്പലം ഭാഗത്ത് പുതിയതായി വാടകയ്ക്ക് പുതിയതായി എത്തിയ 3 കുടുംബങ്ങളെ കുറിച്ചു അന്വേഷിച്ചു. ഏഴു ദിവസം മുൻപ് വാടകയ്ക്കു വീടെടുത്ത ഇവരെ ഇന്നലെ രാവിലെയാണ് ഈസ്റ്റ് സിഐ അനിൽകുമാറിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.

2021ൽ ക്ലീറ്റസിന്റെ മകനു വേണ്ടിയാണ് ഈ ഏജൻസിയെ സമീപിച്ചത്. 3 ലക്ഷം രൂപ അനിതകുമാരിയുടെ അക്കൗണ്ടിലേക്ക് കൈമാറി. ക്ലീറ്റസിന്റെ മറ്റ് രണ്ടു ബന്ധുക്കളിൽ നിന്നു മൂന്നു ലക്ഷം രൂപ വീതം കൈമാറി. വീസ ഉടൻ വരുമെന്നു പറഞ്ഞു കുറച്ചു കാലം പറ്റിച്ചെന്നു പരാതിക്കാരിൽ ഒരാളായ ജാൻസി ജസ്റ്റസ് പറഞ്ഞു. പിന്നീട് ഫോർസൈറ്റ് ഓവർസീസ് ഓഫിസിൽ എത്തിയപ്പോൾ കോട്ടയത്തെ വേണുവിന്റെ അടുത്തേക്ക് പറഞ്ഞു വിട്ടു.

ബാലു മുഴുവൻ പണം നൽകിയില്ലെന്നും ഇനി പണത്തിനായി ഇങ്ങോട്ടു വരണ്ടെന്നും പറഞ്ഞ് വേണുപരാതിക്കാരെ മടക്കി അയച്ചു. ഏഴര ലക്ഷം രൂപ വരെ ഏജൻസിക്കു പലരും കൈമാറിയിട്ടുണ്ട്. യുകെയിലെ ഏജൻസിയുമായുള്ള കരാർ വേണുവിന്റെ പേരിലാണെന്നാണ് ബാലു പറയുന്നത്. ലഭിച്ച പണം വേണുവിനു കൈമാറിയെന്നും പറയുന്നു.

അതേസമയം പിടിയിലായ പ്രതികളുടെ വൈദ്യ പരിശോധന നടത്തി ഇന്നു കോടതിയിൽ ഹാജരാക്കി കസ്റ്റഡിയിൽ വാങ്ങും. വൈദ്യ പരിശോധനയ്ക്കിടെ ബിപി കൂടിയതിനെ തുടർന്ന് അനിത കുമാരിയെ ജില്ലാ ആശുപത്രിയിൽ പ്രവേശിപ്പിച്ചെങ്കിലും വൈകുന്നേരത്തോടെ സ്റ്റേഷനിൽ എത്തിച്ചു.

ആദ്യഘട്ടത്തിൽ 25 പേരുടെ സംഘത്തെയാണ് യുകെയിൽ ജോലി നൽകാമെന്നു വാഗ്ദാനം നൽകി കയറ്റിവിട്ടത്. ബിടെക് ബിരുദം നേടിയവരടക്കമാണ് അവിടെ എത്തിയത്. എന്നാൽ, 25 അംഗ സംഘവും ജോലി ലഭിച്ച കമ്പനിയിൽ നിന്നു രാജിവച്ചതോടെ ഫോർസൈറ്റിന്റെ കരാർ യുകെ അധികൃതർ റദ്ദാക്കി. കരാർ റദ്ദായെങ്കിലും തുടർന്നു റിക്രൂട്മെന്റ് നടത്തിയാണ് തട്ടിപ്പു നടത്തിയത്

ആദ്യഘട്ടത്തിൽ പോയവരിൽ ബാലുവിന്റെ ഓഫിസ് ജീവനക്കാരിയുമുണ്ടായിരുന്നു. യുകെയിലെ മെച്ചപ്പെട്ട ജീവിത സൗകര്യം സംബന്ധിച്ച വിഡിയോകൾ അവർ അയച്ചു കൊടുത്തു. ഇതു പ്രചരിച്ചതോടെയാണ് കൂടുതൽ പേർ സ്ഥാപനത്തെ സമീപിച്ചത്.

മനുഷ്യക്കടത്തിനിരയായവരും പരാതിക്കാരിലുണ്ടായിരുന്നു. കൊല്ലം സ്വദേശിയായ വിഷ്ണുവിനു നഷ്ടമായത് നാലര ലക്ഷം രൂപ. ക്രൊയേഷ്യയിൽ ജോലി വാഗ്ദാനം ചെയ്തായിരുന്നു തട്ടിപ്പ്. വിഷ്ണു ഉൾപ്പെടെയുള്ള സംഘത്തെ സെർബിയയിൽ എത്തിച്ചു. തുടർന്ന് അനധികൃതമായി ക്രൊയേഷ്യയിലേക്ക് കടക്കാൻ നിർബന്ധിച്ചു. ഇതിനു വഴങ്ങാതെ വിഷ്ണു ഉൾപ്പെടെയുള്ളവർ സെർബിയയിൽ ഒരാഴ്ച തങ്ങി. സ്വന്തം പണം മുടക്കി ടിക്കറ്റു വാങ്ങി കേരളത്തിലേക്ക് തിരികെ വന്നുവെന്നും വിഷ്ണു പറഞ്ഞു. സംഘം പിടിയിലായെന്ന വാർത്ത പുറത്ത് വന്നതോടെ നിരവധി പേരാണ് പരാതിയുമായി എത്തുന്നത്.