ഡല്‍ഹിയില്‍ പത്തുവയസ്സുകാരിയുടെ മൃതദേഹം അടച്ചിട്ട ഫ്ളാറ്റിലെ സ്യൂട്ട്കേസിനുള്ളില്; ലൈംഗികാതിക്രമത്തിന് ഇരയായ പെണ്‍കുട്ടിയുടെ ശരീരത്തില്‍ പരിക്കുകള്‍: പീഡനത്തിനിരയായത് ബന്ധുവീട്ടിലേക്ക് ഐസുമായി പോയ പെണ്‍കുട്ടി
ഡല്‍ഹിയില്‍ പത്തുവയസ്സുകാരിയുടെ മൃതദേഹം സ്യൂട്ട്കേസിനുള്ളില്
ന്യൂഡല്‍ഹി: ഡല്‍ഹിയില്‍ ലൈംഗിക പീഡനത്തിന് ഇരയായ പത്തുവയസ്സുകാരിയുടെ മൃതദേഹം സ്യൂട്ട്കേസിനുള്ളില് ഒളിപ്പിച്ച നിലയില്‍ കണ്ടെത്തി. അടച്ചിട്ട ഫ്ളാറ്റ് മുറിയില്‍ നിന്നാണ് കുഞ്ഞിന്റെ ജീവനറ്റ ശരീരം കണ്ടെത്തിയത്. വടക്കുകിഴക്കന്‍ ഡല്‍ഹിയിലെ നെഹ്റു വിഹാര്‍ പ്രദേശത്ത് ശനിയാഴ്ച രാത്രി എട്ടേമുക്കാലോടെയാണ് സംഭവം. സ്യൂട്ട്കേസിനുള്ളില് അബോധാവസ്ഥയില്‍ കണ്ടെത്തിയ പെണ്‍കുട്ടിയെ ഉടന്‍തന്നെ ആശുപത്രിയിലെത്തിച്ചെങ്കിലും ഡോക്ടര്‍മാര്‍ മരണം സ്ഥിരീകരിക്കുകയായിരുന്നു. കുട്ടിയെ കാണാതായതിനെ തുടര്‍ന്ന് വീട്ടുകാര്‍ നടത്തിയ തിരച്ചിലിലാണ് ആളൊഴിഞ്ഞ ഫ്‌ളാറ്റില്‍ നിന്നും മൃതദേഹം കണ്ടെത്തിയത്.
പെണ്‍കുട്ടി ലൈംഗികാതിക്രമത്തിന് ഇരയായതായും മുഖത്ത് പരിക്കുകളുണ്ടെന്നും പോലീസ് അറിയിച്ചു. പ്രതിക്കായുള്ള അന്വേഷണം ഊര്‍ജിതമാക്കി. ശനിയാഴ്ച രാത്രി ഐസ് കൊടുക്കാനായി ബന്ധുവീട്ടിലേക്ക് പോയതായിരുന്നു പെണ്‍കുട്ടി. രണ്ട് മണിക്കൂര്‍ കഴിഞ്ഞിട്ടും കുട്ടി തിരിച്ചുവരാത്തതിനെത്തുടര്‍ന്ന് ബന്ധുവീട്ടില്‍ വിളിച്ച് അന്വേഷിച്ചു.മ കള്‍ അവിടെയെത്തിയിട്ടില്ലെന്നാണ് അവര്‍ പറഞ്ഞത്. തുടര്‍ന്ന് തിരച്ചില്‍ നടത്തുകയായിരുന്നു.
ഇതിനിടെ പെണ്‍കുട്ടി സ്വന്തം വീട്ടില്‍നിന്ന് 200 മീറ്റര്‍ അകലെയുള്ള ഫ്‌ളാറ്റിലേക്ക് പോകുന്നത് കണ്ടതായി ഒരു ദൃക്സാക്ഷി പിതാവിനെ അറിയിച്ചു. തുടര്‍ന്ന് അവിടെയെത്തിയപ്പോള്‍ രണ്ടാംനിലയിലെ ഒരു ഫ്ളാറ്റിന്റെ വാതില്‍ പുറത്തുനിന്ന് പൂട്ടിയനിലയില്‍ കണ്ടെത്തി. വാതില്‍ തകര്‍ത്ത് അകത്തു കയറിയപ്പോള്‍ സ്യൂട്ട്കേസിനകത്ത് മകളെ വിവസ്ത്രമായ നിലയില്‍ കണ്ടെത്തുകയായിരുന്നു. ഉടന്‍തന്നെ അടുത്തുള്ള ആശുപത്രിയിലെത്തിച്ചെങ്കിലും ഡോക്ടര്‍മാര്‍ മരണം സ്ഥിരീകരിക്കുക ആയിരുന്നു.
ബന്ധുവീട്ടില്‍ പോകും വഴി അടുത്തുള്ള ഒരു ഫ്ളാറ്റിലെ ആരോ വിളിച്ചതോടെ അവള്‍ അങ്ങോട്ട് പോയിരുന്നതായി ഒരാള്‍ തന്നെ അറിയിച്ചതായും പെണ്‍കുട്ടിയുടെ പിതാവ് പറഞ്ഞു. ഉടമയെ വിളിച്ചപ്പോള്‍ ഫ്ളാറ്റ് പൂട്ടിയിട്ടിരിക്കുകയാണെന്നും താക്കോല്‍ സഹോദരന്റെ കൈവശമുണ്ടെന്നും അദ്ദേഹം പറഞ്ഞു. പെണ്‍കുട്ടി അവിടെനിന്ന് പോയിട്ടുണ്ടെന്നും വേണമെങ്കില്‍ പരിശോധിക്കാമെന്നും വ്യക്തമാക്കി. അതുപ്രകാരം പരിശോധിക്കാന്‍ തീരുമാനിച്ചതോടെ ഫ്ളാറ്റുടമ ഓടി രക്ഷപ്പെടുകയായിരുന്നെന്നും പെണ്‍കുട്ടിയുടെ പിതാവ് അറിയിച്ചു. തുടര്‍ന്ന് വാതില്‍ തകര്‍ത്ത് അകത്തു കയറിയപ്പോഴാണ് പെണ്‍കുട്ടിയെ സ്യൂട്ട് കേസില്‍ ഒളിപ്പിച്ച നിലയില്‍ കണ്ടെത്തിയത്.