ചെറുപൊതികളിലാക്കി കഞ്ചാവ് വില്‍പ്പന; രഹസ്യ വിവരത്തിന്റെ അടിസ്ഥാനത്തില്‍ വാടക വീട് കേന്ദ്രീകരിച്ച് അന്വേഷണം; യുവാക്കളില്‍ കഞ്ചാവ് വില്‍പ്പന നടത്തിയ പ്രതി ബാലുശ്ശേരിയില്‍ പിടിയില്‍; 210 ഗ്രാം കഞ്ചാവ് പിടികൂടി
കോഴിക്കോട്: ബാലുശ്ശേരി, കോക്കല്ലൂര്‍, വട്ടോളി മേഖലകളില്‍ യുവാക്കളിലേക്ക് കഞ്ചാവ് വിതരണം ചെയ്ത് വന്നിരുന്ന പ്രതിയെ പോലീസ് അറസ്റ്റ് ചെയ്തു. തുരുത്വാട് നാളേരിക്കുഴി സ്വദേശിയായ ശിവദാസനെയാണ് ബാലുശ്ശേരി പോലീസ് അറസ്റ്റ് ചെയ്തത്. പ്രതിയുടെ വാടകവീട്ടില്‍ നടത്തിയ പരിശോധനയില്‍ 210 ഗ്രാം കഞ്ചാവ് പിടികൂടിയതോടെ അദ്ദേഹത്തെ കസ്റ്റഡിയിലെടുക്കുകയായിരുന്നു.
പുത്തൂര്‍വട്ടത്തിലെ വാടകവീട് കേന്ദ്രീകരിച്ചായിരുന്നു കഞ്ചാവ് വിതരണം. ചെറു പൊതികളാക്കിയ കഞ്ചാവാണ് ഇയാള്‍ വില്‍പ്പന നടത്തി വന്നിരുന്നതെന്ന് പോലീസ് പറഞ്ഞു. രഹസ്യവിവരം ലഭിച്ചതിനെ തുടര്‍ന്ന് ബാലുശ്ശേരി പോലീസ് ഇന്‍സ്പെക്ടര്‍ ടി.പി. ദിനേശിന്റെ നിര്‍ദേശപ്രകാരം എസ്.ഐ സുജിലേഷ് നേതൃത്വം നല്‍കിയ സംഘമാണ് റെയ്ഡ് നടത്തിയത്.
സംഘത്തില്‍ എസ്.ഐയോടൊപ്പം പോലീസുകാരായ മഞ്ജു വിനു, ഫൈസല്‍ കേളോത്ത്, ജില്ലാ ഡാന്‍സാഫ് സ്‌ക്വാഡ് അംഗം ഷാഫി എന്നിവരും ഉള്‍പ്പെട്ടിരുന്നു. പ്രതിക്കെതിരേ നര്‍കോട്ടിക്സ് ആക്ട് പ്രകാരമുള്ള വകുപ്പുകള്‍ ചുമത്തിയാണ് നടപടി. യുവാക്കളുടെ ഭാവിയെ തകര്‍ക്കുന്ന ലഹരിമരുന്ന് വിതരണത്തിന് എതിരായ പൊലീസ് നടപടി ശക്തമാക്കുമെന്ന് ഉദ്യോഗസ്ഥര്‍ വ്യക്തമാക്കി.