വീട്ടിലേക്ക് പോകാൻ ഓട്ടോയിൽ കയറിയ വയോധികൻ; ലക്ഷ്യസ്ഥാനത്ത് എത്തിയതും കൈയ്യിൽ ഉണ്ടായിരുന്ന ഫോൺ കാണാനില്ല; ബാങ്കിൽ പോയപ്പോൾ അക്കൗണ്ടിലെ പണവും കാലി..; പോലീസിന്റെ വരവിൽ ട്വിസ്റ്റ്

ഹൈദരാബാദ്: ഷെയേർഡ് ഓട്ടോറിക്ഷയിൽ യാത്ര ചെയ്ത 68-കാരനായ വയോധികന്റെ മൊബൈൽ ഫോൺ മോഷ്ടിച്ച്, തുടർന്ന് അദ്ദേഹത്തിന്റെ ബാങ്ക് അക്കൗണ്ടിൽ നിന്ന് 1.95 ലക്ഷം രൂപയോളം തട്ടിയെടുത്ത സംഭവത്തിൽ മൂന്നുപേരെ ഹൈദരാബാദ് സൈബർ ക്രൈം യൂണിറ്റ് അറസ്റ്റ് ചെയ്തു. ഓട്ടോ ഡ്രൈവർ മുഹമ്മദ് മൊയിൻ ഉദ്ദീൻ, കാർ ഡ്രൈവർ മുഹമ്മദ് സയ്യിദ് സൽമാൻ , പച്ചക്കറി കച്ചവടക്കാരൻ മുഹമ്മദ് ഹുസൈൻ എന്നിവരാണ് പിടിയിലായത്.

സെപ്റ്റംബർ 17-ന് ഉപ്പലിൽ നിന്ന് തർനകയിലേക്ക് ഷെയേർഡ് ഓട്ടോറിക്ഷയിൽ യാത്ര ചെയ്യുകയായിരുന്ന വയോധികൻ, ഇറങ്ങിയതിന് ശേഷം തന്റെ മൊബൈൽ ഫോൺ കാണാതായതായി കണ്ടെത്തുകയായിരുന്നു. പിന്നീട് അദ്ദേഹം സിം കാർഡ് ബ്ലോക്ക് ചെയ്ത് പുതിയത് കരസ്ഥമാക്കി. എന്നാൽ, സെപ്റ്റംബർ 20-ന് യൂണിയൻ ബാങ്ക് ഓഫ് ഇന്ത്യയിലുള്ള അദ്ദേഹത്തിന്റെ അക്കൗണ്ടിൽ നിന്ന് 1,95,001 രൂപ നഷ്ടപ്പെട്ടതായി കണ്ടെത്തുകയായിരുന്നു. തുടർന്ന്, ഐടി നിയമത്തിലെയും ഭാരതീയ ന്യായ സംഹിതയിലെയും (ബിഎൻഎസ്) പ്രസക്തമായ വകുപ്പുകൾ പ്രകാരം സൈബർ ക്രൈം യൂണിറ്റ് കേസെടുത്ത് അന്വേഷണം ആരംഭിച്ചു.

അന്വേഷണത്തിൽ, ഓട്ടോ ഡ്രൈവർ, കാർ ഡ്രൈവർ, കച്ചവടക്കാരൻ എന്നിവർ ഉൾപ്പെട്ട സംഘടിതമായ കുറ്റകൃത്യമാണ് നടന്നതെന്ന് പോലീസ് കണ്ടെത്തുകയായിരുന്നു. ഓട്ടോ ഡ്രൈവറായ മൊയിൻ ഉദ്ദീൻ വയോധികനെ ഓട്ടോയിൽ കയറ്റുകയും, ഓട്ടോക്കൂലിയായി ചെറിയ തുക ഫോൺപേ വഴി അയക്കാൻ ആവശ്യപ്പെടുകയുമായിരുന്നു. പണം കൈമാറ്റം നടക്കുന്നതിനിടയിൽ, സൽമാൻ എന്നയാളെത്തി വയോധികന്റെ ശ്രദ്ധതിരിക്കുകയും, ഈ സമയം ഫോൺ അൺലോക്ക് ചെയ്ത് മോഷ്ടിക്കുകയുമായിരുന്നു. പിന്നീട്, തന്ത്രപരമായി ഫോൺ മോഷ്ടിച്ച ശേഷം വയോധികനെ ലക്ഷ്യസ്ഥാനത്ത് ഇറക്കിവിട്ടു.

തുടർന്ന്, പ്രതികൾ വയോധികന്റെ അക്കൗണ്ടിൽ നിന്ന് പണം കൈമാറ്റം ചെയ്യാനായി വിവിധ പെട്രോൾ പമ്പുകളിലും മറ്റ് കടകളിലും ക്യുആർ കോഡുകൾ സ്കാൻ ചെയ്യാൻ തുടങ്ങി. ഇതിനായി മൊബൈലിലെ ഫോൺപേ ആപ്ലിക്കേഷൻ ഉപയോഗിച്ചു. ഇടപാടുകൾ നടത്തിയ സ്ഥലങ്ങളിൽ നിന്ന് പ്രതികൾ പണമായി തുക ശേഖരിക്കുകയായിരുന്നു. തട്ടിയെടുത്ത 1,95,000 രൂപ ഇവർ മൂന്നുപേരും വീതിച്ചെടുക്കുകയും ചെയ്തു. സംഭവവുമായി ബന്ധപ്പെട്ട് മൂന്നു മൊബൈൽ ഫോണുകൾ പോലീസ് പിടിച്ചെടുത്തു.

ഈ സംഭവം വർധിച്ചുവരുന്ന ഓൺലൈൻ തട്ടിപ്പുകളുടെ ഗൗരവം അടിവരയിടുന്നു. ഷെയേർഡ് ഓട്ടോകൾ പോലുള്ള പൊതുഗതാഗത സംവിധാനങ്ങളിൽ യാത്ര ചെയ്യുമ്പോൾ ഡിജിറ്റൽ പേയ്‌മെന്റ് സേവനങ്ങൾ ഉപയോഗിക്കുന്നതിൽ അതീവ ജാഗ്രത പാലിക്കണമെന്ന് ഹൈദരാബാദ് സൈബർ ക്രൈം ഡെപ്യൂട്ടി പോലീസ് കമ്മീഷണർ മുന്നറിയിപ്പ് നൽകി. ഇത്തരം സംഭവങ്ങളിൽ കൂടുതൽപേർ ഇരയാകുന്നത് തടയാൻ പൊതുജനങ്ങൾ ജാഗ്രതയോടെയിരിക്കേണ്ടത് അത്യാവശ്യമാണെന്നും അദ്ദേഹം കൂട്ടിച്ചേർത്തു.