കല്യാണം കഴിഞ്ഞിട്ട് വർഷങ്ങളായി; ഇൻസ്റ്റ റീൽസ് കാണാൻ തുടങ്ങിയത് മുതൽ യുവതിയുടെ സ്വഭാവത്തിൽ ആകെ മാറ്റം; പതിയെ പതിയെ പ്രണയം മൊട്ടിട്ട നാളുകൾ; ഒരു സുപ്രഭാതത്തിൽ എല്ലാം മറന്ന് പോലീസുകാരനോടൊപ്പം ഒളിച്ചോട്ടം; പിന്നാലെ യഥാർത്ഥ ഭർത്താവിന്റെ വെളിപ്പെടുത്തലിൽ അമ്പരപ്പ്!

ബെംഗളൂരു: ഇൻസ്റ്റാഗ്രാം വഴി പരിചയപ്പെട്ട പോലീസ് കോൺസ്റ്റബിളിനൊപ്പം 15 വർഷം നീണ്ട ദാമ്പത്യബന്ധം ഉപേക്ഷിച്ച് യുവതി ഒളിച്ചോടിയതായി പരാതി. 160 ഗ്രാം സ്വർണ്ണാഭരണങ്ങളും 1.80 ലക്ഷം രൂപയും എടുത്താണ് യുവതി പോയതെന്ന് ഭർത്താവ് പോലീസിൽ നൽകിയ പരാതിയിൽ പറയുന്നു. കേസിനെത്തുടർന്ന്, യുവതിക്കൊപ്പം ഒളിച്ചോടിയ കോൺസ്റ്റബിളിനെ സർവീസിൽ നിന്ന് സസ്‌പെൻഡ് ചെയ്യാൻ മുതിർന്ന പോലീസ് ഉദ്യോഗസ്ഥർ ഉത്തരവിട്ടു. പൊതുസമൂഹത്തിൽ വലിയ ചർച്ചാവിഷയമായി മാറിയ ഈ സംഭവം നഗരത്തിലെ പോലീസ് സേനയ്ക്ക് തന്നെ നാണക്കേടുണ്ടാക്കിയിരിക്കുകയാണ്.

ബെംഗളൂരുവിൽ താമസിക്കുന്ന യുവതിയുടെ ഭർത്താവാണ് ചന്ദ്ര ലേഔട്ട് പോലീസ് സ്റ്റേഷനിൽ പരാതിയുമായി എത്തിയത്. മൈസൂരു സ്വദേശിനിയായ മോണിക്ക എന്ന യുവതിയാണ് എച്ച്.എസ്.ആർ. ലേഔട്ട് പോലീസ് സ്റ്റേഷനിലെ കോൺസ്റ്റബിളായ രാഘവേന്ദ്രയുടെ കൂടെ ഒളിച്ചോടിയതെന്നാണ് പരാതിയിൽ പറയുന്നത്. പതിനഞ്ച് വർഷം മുമ്പായിരുന്നു ഇവരുടെ വിവാഹം. ഈ ബന്ധത്തിൽ ഇവർക്ക് 12 വയസ്സുള്ള ഒരു മകനുണ്ട്. മോണിക്കയുടെ ആദ്യ വിവാഹബന്ധം വേർപെടുത്തിയ ശേഷമാണ് തന്നെ വിവാഹം കഴിച്ചതെന്നും ഭർത്താവ് പോലീസിനോട് വ്യക്തമാക്കി.

ഭർത്താവിൻ്റെ പരാതി പ്രകാരം, വടക്കൻ കർണാടക സ്വദേശിയായ കോൺസ്റ്റബിൾ രാഘവേന്ദ്രയെ മോണിക്ക പരിചയപ്പെട്ടത് ഈ വർഷം ജൂണിലാണ്. ഇൻസ്റ്റാഗ്രാമിലൂടെയുള്ള പരിചയം റീൽസുകൾക്ക് കമൻ്റ് ചെയ്യുന്നതിലും ലൈക്കടിക്കുന്നതിലും തുടങ്ങി. തുടർന്ന് ഇരുവരും ഫോൺ നമ്പറുകൾ കൈമാറുകയും പതിവായി ആശയവിനിമയം നടത്താൻ തുടങ്ങുകയും ചെയ്തു. വെറും രണ്ട് മാസത്തിനുള്ളിൽ ഇവരുടെ സൗഹൃദം തീവ്രമായ പ്രണയബന്ധത്തിലേക്ക് വഴിമാറുകയായിരുന്നുവെന്ന് പോലീസ് വൃത്തങ്ങൾ സ്ഥിരീകരിക്കുന്നു. ഈ രഹസ്യബന്ധം ആരും അറിയാതെ മുന്നോട്ട് പോകവെയാണ് മോണിക്ക ഭർത്താവിനെയും മകനെയും ഉപേക്ഷിച്ച് കോൺസ്റ്റബിളിനൊപ്പം ഒളിച്ചോടിയത്.

യുവതിയെ കാണാതായതോടെ വീട്ടിൽ നടത്തിയ പരിശോധനയിലാണ് 160 ഗ്രാം സ്വർണ്ണാഭരണങ്ങളും 1.80 ലക്ഷം രൂപയും കാണാനില്ലെന്ന് ഭർത്താവിന് മനസ്സിലായത്. ഇത് മോണിക്ക ഒളിച്ചോടുമ്പോൾ കൈവശം എടുത്തുകൊണ്ടുപോയതാണെന്നാണ് ഭർത്താവിൻ്റെ ആരോപണം. കോൺസ്റ്റബിൾ രാഘവേന്ദ്രയും വിവാഹിതനാണെന്നും ഒരു കുട്ടിയുണ്ടെന്നും പോലീസ് അന്വേഷണത്തിൽ വ്യക്തമായിട്ടുണ്ട്.

അതേസമയം, മോണിക്കയുടെ ഭാഗത്തുനിന്നും ചില നാടകീയ നീക്കങ്ങൾ നേരത്തെ ഉണ്ടായതായി പോലീസ് പറയുന്നു. ഒളിച്ചോടുന്നതിന് ഏകദേശം മൂന്ന് മാസം മുമ്പ് മോണിക്ക ചന്ദ്ര ലേഔട്ട് പോലീസ് സ്റ്റേഷനിൽ സഹായം തേടി എത്തിയിരുന്നു. തൻ്റെ ദാമ്പത്യ ജീവിതത്തിൽ പ്രശ്നങ്ങളുണ്ടെന്നും, ഭർത്താവിന് കൗൺസിലിംഗ് നൽകി പ്രശ്നങ്ങൾ പരിഹരിക്കാൻ പോലീസ് സഹായിക്കണമെന്നുമായിരുന്നു മോണിക്കയുടെ അപേക്ഷ. ഇതനുസരിച്ച് പോലീസ് ഭർത്താവിനെ സ്റ്റേഷനിലേക്ക് വിളിപ്പിച്ച് കൗൺസിലിംഗ് നൽകുകയും ചെയ്തിരുന്നു. എന്നാൽ, ഈ കൗൺസിലിംഗ് നടന്നു വരുന്ന കാലയളവിലാണ് മോണിക്ക ഒളിച്ചോടിയതെന്നാണ് ഭർത്താവിൻ്റെ പരാതി. ഭാര്യ ദിവസങ്ങളായി വീട്ടിലേക്ക് വരാതായതോടെയാണ് ഭർത്താവ് യഥാർത്ഥ പരാതിയുമായി പോലീസിനെ സമീപിക്കുന്നത്.

പരാതിയുടെ ഗൗരവം കണക്കിലെടുത്ത് മുതിർന്ന പോലീസ് ഉദ്യോഗസ്ഥർ കോൺസ്റ്റബിൾ രാഘവേന്ദ്രയെ ഉടൻ തന്നെ സസ്‌പെൻഡ് ചെയ്യാൻ ഉത്തരവിട്ടു. നിലവിൽ ഇരുവരെയും കണ്ടെത്താനുള്ള ഊർജിതമായ അന്വേഷണത്തിലാണ് പോലീസ്.