കൊല്ലത്ത് ഭാര്യയ്ക്ക് നേരെ ആസിഡ് ആക്രമണം; ആക്രമിച്ചത് വാടകവീട്ടില്‍ എത്തി; ഭര്‍ത്താവ് പിടിയില്‍; യുവതിയുടെ മുഖത്തും കൈക്കും പൊള്ളലേറ്റു

കൊല്ലം: ഭാര്യയ്ക്ക് നേരെ ആസിഡ് ആക്രമണം നടത്തി ഭര്‍ത്താവ്. കൊല്ലത്താണ് സംഭവം. കല്ലുവെട്ടാന്‍കുഴി സ്വദേശി കവിതയെയാണ് ഭര്‍ത്താവ് ബിജു ആക്രമിച്ചത്. യുവതിയുടെ മുഖത്തും കൈക്കും പൊള്ളലേറ്റിട്ടുണ്ട്. ബിജു കവിതയെ നിരന്തരം ശല്യം ചെയ്തിരുന്നു. വാടക വീട്ടില്‍ എത്തിയാണ് ഇയാള്‍ ആസിഡ് ആക്രമണം നടത്തിയത്. നിലവിളികേട്ട് ഓടിക്കൂടിയ നാട്ടുകാരാണ് യുവതിയെ കടയ്ക്കല്‍ താലൂക്ക് ആശുപത്രിയില്‍ പ്രവേശിപ്പിച്ചത്.

പഞ്ചായത്തില്‍ നിന്ന് വീട് വെയ്ക്കാന്‍ ബിജുവിന്റെ പേരില്‍ ഭൂമി അനുവദിച്ചിരുന്നു. ഈ വസ്തുവില്‍ ഷെഡ് കെട്ടിയാണ് ബിജുവും കവിതയും അമ്മയും താമസിച്ചിരുന്നത്. പലതവണ കവിതയെയും അമ്മയെയും ഷെഡില്‍ നിന്ന് ഇറക്കി വിടാന്‍ ബിജു ശ്രമിച്ചിരുന്നു. പ്രതിയുടെ ശല്യത്തെ തുടര്‍ന്ന് ഇരുവരും സമീപത്തായി വാടക വീട്ടിലേക്ക് താമസം മാറിയിരുന്നു. ഇയാളെ പൊലീസ് അറസ്റ്റ് ചെയ്തു.