കാര്‍ നിയന്ത്രണം വിട്ട് താഴ്ചയിലേക്ക് വീണ് അപകടം; രണ്ട് പേർക്ക് പരിക്ക്; സംഭവം ശബരിമലയിൽ ജോലി കഴിഞ്ഞ് മടങ്ങവേ

പത്തനംതിട്ട: ശബരിമലയിൽ ജോലിയ്ക്ക് പോയി തിരിച്ചുവരികെ കാര്‍ നിയന്ത്രണം വിട്ട് താഴ്ചയിലേക്ക് വീണ് അപകടം. തൊഴിലാളികള്‍ സഞ്ചരിച്ചിരുന്ന കാറാണ് അപകടത്തിൽപ്പെട്ടത്. സംഭവത്തിൽ രണ്ടു പേര്‍ക്ക് പരിക്കേറ്റു. ഇന്ന് വൈകിട്ട് അഞ്ചോടെ പത്തനംതിട്ട ചിറ്റാര്‍ കൊച്ചുകോയിക്കൽ എംഎം മാത്യു എന്നയാളുടെ വീട്ടുമുറ്റത്തേക്കാണ് കാര്‍ മറിഞ്ഞത്. കൊല്ലം സ്വദേശികളായ നാലു തൊഴിലാളികളാണ് കാറിലുണ്ടായിരുന്നത്. വീഴ്ചയിൽ കാര്‍ ഭാഗികമായി തകര്‍ന്നു.

റോഡിൽ നിന്ന് നിയന്ത്രണം വിട്ട കാര്‍ താഴ്ചയിലുള്ള വീടിന്‍റെ മുറ്റത്തേക്കാണ് വീണത്. വീടിന്‍റെ മതിലിനോട് ചേര്‍ന്ന് തൂങ്ങിനിന്നിരുന്ന കാറിൽ നിന്നും തൊഴിലാളികളെ നാട്ടുകാരും വീട്ടുകാരും ചേര്‍ന്നാണ് രക്ഷപ്പെടുത്തിയത്. അപകടത്തിൽ ആർക്കും കാര്യമായ പരിക്കുകളില്ല.