കോഴിക്കോട് ബൈക്കുകള്‍ കൂട്ടിയിടിച്ച്‌ അപകടം; മൂന്ന് പേര്‍ക്ക് പരിക്ക്; ഒരാളുടെ നില അതീവഗുരുതരം

കോഴിക്കോട്: എടവണ്ണ-കൊയിലാണ്ടി സംസ്ഥാന പാതയില്‍ മുക്കത്തിനടുത്ത് കറുത്തപറമ്പില്‍ ബൈക്കുകള്‍ കൂട്ടിയിടിച്ച് വൻ അപകടം. അപകടത്തില്‍ ഒരു സ്ത്രീ ഉള്‍പ്പടെ മൂന്ന് പേര്‍ക്ക് ഗുരുതരമായി പരിക്കേറ്റിട്ടുണ്ട്. അമിതവേഗതയും അശ്രദ്ധയുമാണ് അപകടത്തിന് കാരണമെന്ന് നാട്ടുകാർ പറഞ്ഞു.

അമിതവേഗതയില്‍ വന്ന ബൈക്ക് എതിര്‍ദിശയില്‍ വന്ന മറ്റൊരു ബൈക്കില്‍ വന്ന് ഇടിക്കുകയായിരുന്നു. അപകടത്തെ തുടര്‍ന്ന് മറ്റൊരു സ്‌കൂട്ടറിലും ബൈക്കിടിച്ചു.

പരിക്കേറ്റവരെ മുക്കത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ഇതില്‍ ഒരാളുടെ നില ഗുരുതരമാണെന്നും വിവരങ്ങൾ ഉണ്ട്. അപകടം നടന്ന ഉടനെ തന്നെ നാട്ടുകാർ രക്ഷാപ്രവർത്തനം നടത്തി. പരിക്കേറ്റവരെ അടുത്തുള്ള ആശുപത്രികളിൽ എത്തിച്ചു. പിന്നാലെ പോലീസെത്തി മേൽ നടപടികൾ സ്വീകരിച്ചു.