ഹലോ..അവിടെ നിന്ന് മാറി ഇരിക്കണം; പറ്റില്ലെന്ന് പറഞ്ഞതോടെ പ്രകോപനം; ഒരൊറ്റ ഇടിയിൽ എല്ലാം കലങ്ങി തെളിഞ്ഞു; ആശുപത്രി ജീവനക്കാരനെ ആക്രമിച്ച രണ്ട് പേർ പിടിയിൽ

കോഴിക്കോട്: കോട്ടപ്പറമ്പ് സർക്കാർ ആശുപത്രിയിലെ സുരക്ഷാ ജീവനക്കാരനെ രോഗിയുടെ കൂട്ടിരിപ്പുകാർ മർദിച്ചതായി പരാതി. പേരാമ്പ്ര സ്വദേശിയായ സുരേഷിനാണ് മർദനമേറ്റത്. കൈക്കും നെഞ്ചിനും പരിക്കേറ്റ സുരേഷിനെ കോഴിക്കോട് ബീച്ച് ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് രണ്ടുപേരെ ടൗൺ പോലീസ് കസ്റ്റഡിയിലെടുത്തു.

ഇന്ന് രാവിലെ ഒമ്പത് മണിയോടെയാണ് കോട്ടപ്പറമ്പ് സ്ത്രീകളുടേയും കുട്ടികളുടേയും ആശുപത്രിയിൽ സംഭവം നടന്നത്. ആശുപത്രിയിലെ സുരക്ഷാ ജീവനക്കാരനായ സുരേഷ്, ആംബുലൻസ് നിർത്തിയിടുന്ന സ്ഥലത്ത് ഇരുന്നിരുന്ന രോഗികളുടെ കൂട്ടിരിപ്പുകാരായ രണ്ടുപേരോട് അവിടെനിന്ന് മാറി ഇരിക്കാൻ ആവശ്യപ്പെട്ടതാണ് പ്രകോപനത്തിന് കാരണമായത്.

ആശുപത്രി വളപ്പിൽ പുരുഷന്മാർക്ക് ചില നിയന്ത്രണങ്ങളുണ്ടെന്നും, ഒപി കൗണ്ടറിന് സമീപമുള്ള ഇരിപ്പിടത്തിലേക്ക് മാറിയിരിക്കാൻ ആവശ്യപ്പെട്ടെങ്കിലും ഇവർ കൂട്ടാക്കിയില്ലെന്ന് സുരേഷ് മൊഴി നൽകി. തുടർന്നുണ്ടായ വാക്കുതർക്കമാണ് മർദനത്തിൽ കലാശിച്ചത്.

വിവരമറിഞ്ഞെത്തിയ ടൗൺ പോലീസ് മർദിച്ച രണ്ടുപേരെയും കസ്റ്റഡിയിലെടുക്കുകയായിരുന്നു. സുരേഷിന്റെ മൊഴി രേഖപ്പെടുത്തിയ ശേഷം തുടർനടപടികൾ സ്വീകരിക്കുമെന്ന് പോലീസ് അറിയിച്ചു. ആശുപത്രിയിലെ സുരക്ഷാ ജീവനക്കാരനെതിരെയുണ്ടായ ഈ അക്രമം പൊതുവിടങ്ങളിലെ സുരക്ഷാ വെല്ലുവിളികൾ വീണ്ടും ചർച്ചയാക്കിയിട്ടുണ്ട്.