കുടുംബപരമായ തര്‍ക്കങ്ങളുടെ പേരില്‍ വീട്ടില്‍ കയറി വയോധികനെ മര്‍ദ്ദിച്ച മകന്‍ അറസ്റ്റില്‍
കുടുംബപരമായ തര്‍ക്കങ്ങളുടെ പേരില്‍ വീട്ടില്‍ കയറി വയോധികനെ മര്‍ദ്ദിച്ച മകന്‍ അറസ്റ്റില്‍
പന്തളം: കുടുംബപ്രശ്നങ്ങള്‍ നിലനില്‍ക്കേ, മകന്‍ വീട്ടില്‍ കയറി അച്ഛനെ മര്‍ദ്ദിക്കുകയും വടികൊണ്ട് കൈ അടിച്ച് പരിക്കേല്‍പ്പിക്കുകയും ചെയ്തു. പന്തളം തെക്കേക്കര പറന്തല്‍ കൈരളി ജംഗ്ഷന് പ്രശാന്തി വീട്ടില്‍ പൊടിയനാ(73)ണ് മര്‍ദ്ദനമേറ്റത്. പന്തളം തെക്കേക്കര മന്നം നഗര്‍ പെരുമ്പുളിക്കല്‍ ധ്വനി (പ്രശാന്തി)വീട്ടില്‍ പി പ്രദീപ്കുമാര്‍(40) ആണ് പന്തളം പോലീസിന്റെ പിടിയിലായത്.ഇയാള്‍ കുടുംബമായി മറ്റൊരു വീട്ടില്‍ താമസിക്കുകയാണ്.
ഈ മാസം നാലിന് വൈകിട്ട് 7ന് വീട്ടില്‍ കുറ്റകരമായി അതിക്രമിച്ചുകടന്ന പ്രതി, പൊടിയനെ അസഭ്യം വിളിച്ചു. തടയാന്‍ ശ്രമിച്ചപ്പോള്‍ വടി കൊണ്ട് ഇടതു കൈക്കുഴക്ക് മുകളില്‍ അടിച്ചു, ഈ ഭാഗത്തെ അസ്ഥി പൊട്ടി. വീട് തന്റേതാണെന്ന് പറഞ്ഞ് വീട്ടിലേക്ക് കയറുന്ന വാതില്‍ പ്രതി ചവിട്ടിപ്പൊളിക്കുകയും ചെയ്തു. ആശുപത്രിയില്‍ പ്രവേശിക്കപ്പെട്ട പൊടിയന്‍, ചികിത്സയ്ക്ക് ശേഷം വീട്ടില്‍ വിശ്രമിക്കുന്ന വിവരം ലഭിച്ചതിനെ തുടര്‍ന്ന് പന്തളം പോലീസ് അവിടെയെത്തി മൊഴി രേഖപ്പെടുത്തി. എസ് ഐ ആര്‍ മനോജ് കുമാര്‍ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.
തുടര്‍ന്ന് ഇന്ന് രാവിലെ 8 15ന് കൈരളി ജംഗ്ഷന് സമീപത്തു നിന്നും പ്രതിയെ പോലീസ് സംഘം പിടികൂടി. വൈദ്യപരിശോധനക്ക് ശേഷം സ്റ്റേഷനില്‍ എത്തിച്ച് നിരീക്ഷണത്തില്‍ സൂക്ഷിച്ചു. വിശദമായി ചോദ്യം ചെയ്യുകയും സാക്ഷികളെ കാണിച്ചു തിരിച്ചറിയുകയും ചെയ്തു. പിന്നീട് 9 ന് അറസ്റ്റ് രേഖപ്പെടുത്തി. പന്തളം എസ് എച്ച് ഓ ടി ഡി പ്രജീഷിന്റെ മേല്‍നോട്ടത്തിലാണ് അന്വേഷണം നടക്കുന്നത്. എസ് സി പി ഓമാരായ എസ് അന്‍വര്‍ഷാ, വൈ ജയന്‍, അനീഷ് എന്നിവരാണ് എസ് ഐ യുടെ നേതൃത്വത്തിലുള്ള സംഘത്തില്‍ ഉണ്ടായിരുന്നത്. പ്രതിയെ കോടതിയില്‍ ഹാജരാക്കി.