അമിത വേഗതയിൽ കുതിച്ചെത്തിയ ഊബർ കാർ ബൈക്കിലേക്ക് ഇടിച്ചുകയറി വൻ അപകടം; കൊച്ചിയിൽ യുവാവിന് ദാരുണാന്ത്യം; ഒപ്പമുണ്ടായിരുന്ന ആൾക്ക് ഗുരുതര പരിക്ക്

കൊച്ചി: ആലുവ പത്തടിപ്പാലത്ത് അമിതവേഗത്തിലെത്തിയ ഊബർ ടാക്സി കാർ ബൈക്കിന് പിന്നിലിടിച്ച് ബൈക്ക് യാത്രികൻ മരിച്ചു. കളമശ്ശേരി സ്വദേശി സാജു ആണ് മരിച്ചത്. അപകടത്തിൽ സാജുവിനൊപ്പമുണ്ടായിരുന്ന ബന്ധു ആശിഷിന് ഗുരുതരമായി പരിക്കേറ്റു. കഴിഞ്ഞ രാത്രി പതിനൊന്നരയോടെയാണ് ദാരുണമായ അപകടം സംഭവിച്ചത്.

ഊബർ ടാക്സി ഡ്രൈവറായ പട്ടാമ്പി സ്വദേശി നവാസിനെ പോലീസ് കസ്റ്റഡിയിലെടുക്കുകയും മനപ്പൂർവമല്ലാത്ത നരഹത്യക്ക് കേസെടുക്കുകയും ചെയ്തിട്ടുണ്ട്. സാജു സംഭവസ്ഥലത്ത് വെച്ചുതന്നെ മരണപ്പെട്ടു. ഗുരുതരമായി പരിക്കേറ്റ ആശിഷിനെ, കാലിനടക്കം പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്.

അമിതവേഗതയിൽ മുന്നിൽ പോവുകയായിരുന്ന ബൈക്കിൽ ഇടിച്ച കാർ, ബൈക്കുമായി നിരങ്ങി നീങ്ങി റോഡരികിൽ പാർക്ക് ചെയ്തിരുന്ന മറ്റൊരു കാറിലിടിക്കുകയായിരുന്നു. ഇതോടെ ബൈക്ക് രണ്ട് കാറുകൾക്കും ഇടയിൽ കുടുങ്ങി. അപകടത്തിൽ ബൈക്ക് പൂർണ്ണമായും തകരുകയും കാറിന് ഭാഗികമായ കേടുപാടുകൾ സംഭവിക്കുകയും ചെയ്തു. മൃതദേഹം പോസ്റ്റ്‌മോർട്ടം പൂർത്തിയാക്കി ബന്ധുക്കൾക്ക് വിട്ടുകൊടുത്തിട്ടുണ്ട്. സംഭവത്തിൽ വിശദമായ അന്വേഷണം നടത്തുമെന്ന് പോലീസ് അറിയിച്ചു.