ഹിന്ദു വിശ്വാസികളുടെ പ്രധാന തീര്‍ത്ഥയാത്രകളിലൊന്നായ നാലമ്പല ദര്‍ശനം; വ്യാഴാഴ്ച മുതല്‍ പ്രത്യേക കെഎസ്ആര്‍ടിസി ബസ് സര്‍വീസ്
തൃശൂര്‍: ഹിന്ദു വിശ്വാസികളുടെ പ്രധാന തീര്‍ത്ഥയാത്രകളിലൊന്നായ നാലമ്പല ദര്‍ശനത്തിനായി കെഎസ്ആര്‍ടിസി പ്രത്യേക സര്‍വീസുകള്‍ ജൂലൈ 17 മുതലായി ആരംഭിക്കുന്നു. ഇരിങ്ങാലക്കുട യൂണിറ്റില്‍ നിന്നാണ് പ്രത്യേക സര്‍വീസുകളുടെ നടത്തിപ്പ്. രാവിലെ 6.00നും 6.30നും രണ്ടു പ്രത്യേക സര്‍വീസുകളാണ് ആരംഭിക്കുന്നത്. ഇരിങ്ങാലക്കുട കെഎസ്ആര്‍ടിസി സ്റ്റാന്‍ഡില്‍ നിന്നാണ് യാത്ര തുടങ്ങുന്നത്. ഭക്തജനങ്ങള്‍ക്ക് സൗകര്യപ്രദമായ യാത്രാ ക്രമീകരണങ്ങളോടെയാണ് സര്‍വീസുകള്‍ ഒരുക്കിയിട്ടുള്ളത്.
സര്‍വീസിന്റെ ഔദ്യോഗിക ഫ്ളാഗ് ഓഫ് ഉന്നത വിദ്യാഭ്യാസ മന്ത്രി ഡോ. ആര്‍ ബിന്ദു നിര്‍വഹിച്ചു. ചടങ്ങില്‍ ഇരിങ്ങാലക്കുട മുന്‍സിപ്പല്‍ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷയായിരുന്നു. കൂടല്‍മാണിക്യം ദേവസ്വം ബോര്‍ഡ് ചെയര്‍മാന്‍ അഡ്വ. ഗോപി, ചാലക്കുടി അസിസ്റ്റന്റ് ട്രാന്‍സ്‌പോര്‍ട്ട് ഓഫീസര്‍ കെ. ജെ. സുനില്‍, കൗണ്‍സിലര്‍മാരായ സ്മിത കൃഷ്ണകുമാര്‍, അമ്പിളി ജയന്‍, ദേവസ്വം അഡ്മിനിസ്‌ട്രേറ്റര്‍ ജിഎസ് രാധേഷ് തുടങ്ങിയവരും ചടങ്ങില്‍ പങ്കെടുത്തു.
നാലമ്പല ദര്‍ശനത്തിന് വേണ്ടി തൃശൂര്‍ ജില്ലയിലെ വിവിധ ഭാഗങ്ങളില്‍ നിന്നായി കൂടുതല്‍ കെഎസ്ആര്‍ടിസി സര്‍വീസുകള്‍ അനുവദിക്കാനാണ് സാധ്യത. ഭക്തജനങ്ങളുടെ തിരക്ക് കണക്കിലെടുത്ത് ഉപരിപഠന മന്ത്രാലയവും കെഎസ്ആര്‍ടിസിയും സംയുക്തമായി പ്രവര്‍ത്തിച്ചാണ് സംവിധാനം ഒരുക്കിയത്.