ജീവനൊടുക്കാന്‍ പോകുന്നു എന്ന് പോലിസ് സ്റ്റേഷനില് വിളിച്ചറിയിച്ച് 30കാരി; കയറില്‍ തൂങ്ങിയാടിയ യുവതിയെ പാഞ്ഞെത്തി രക്ഷിച്ച് ബാലുശ്ശേരി പോലിസ്
ജീവനൊടുക്കാന്‍ പോകുന്നു എന്ന് 30കാരി; പാഞ്ഞെത്തി രക്ഷിച്ച് ബാലുശ്ശേരി പോലിസ്
കോഴിക്കോട്: ഭര്‍ത്താവുമായുള്ള പ്രശ്‌നത്തെ തുടര്‍ന്ന് തൂങ്ങിമരിക്കാന്‍ ശ്രമിച്ച യുവതിയെ പാഞ്ഞെത്തി രക്ഷിച്ച് കേരളാ പൊലീസ്. ജീവനൊടുക്കാന്‍ പോകുന്നു എന്ന് കോഴിക്കോട് പയ്യോളി സ്റ്റേഷനില് വിളിച്ചറിയിച്ച 3ദകാരിയെയാണ് ബാലുശ്ശേരി പോലിസ് എത്തി രക്ഷിച്ചത്. സംഭവ സ്ഥലത്തേക്ക് പാഞ്ഞെത്തിയ പൊലീസ് തൂങ്ങിയ നിലയില്‍ പെണ്‍കുട്ടിയെ കാണുകയും കെട്ടഴിച്ച് ആശുപത്രിയിലാക്കുകയും ആയിരുന്നു.
ബാലുശ്ശേരി കണ്ണാടിപ്പൊയില്‍ സ്വദേശിയായ യുവതിയെയാണ് ബാലുശ്ശേരി സിഐ ടിപി ദിനേശിന്റെ നേതൃത്വത്തില്‍ പൊലീസുകാര്‍ രക്ഷപെടുത്തിയത്. താന്‍ മരിക്കാന്‍ പോകുകയാണെന്ന് യുവതി പയ്യോളി പോലീസ് സ്റ്റേഷനില് അറിയിക്കുകയായിരുന്നു. ഇവിടെ നിന്നും ബാലുശ്ശേരി പോലീസിലേക്ക് വിവരം അറിയിച്ചു. പൊലീസ് എത്തുമ്പോഴേക്ക് യുവതി ആത്മഹത്യക്ക് ഒരുങ്ങിയിരുന്നു. കയറില്‍ തൂങ്ങിയിരുന്ന യുവതിയെ അഴിച്ചെടുത്ത് പൊലീസ് ആശുപത്രിയില്‍ എത്തിച്ചു. യുവതിയെ പിന്നീട് കോഴിക്കോട് മെഡിക്കല്‍ കോളേജിലേക്ക് മാറ്റി.