കായിക പരിശീലനത്തിനിടെ വിദ്യാർത്ഥിനിയോട് മോശമായി പെരുമാറി; പീഡിപ്പിക്കാനും ശ്രമം; പോക്സോ കേസിൽ കായിക അധ്യാപകൻ പിടിയിൽ; സംഭവം ആലപ്പുഴയിൽ
മാന്നാർ: പ്രായപൂർത്തിയാകാത്ത വിദ്യാർത്ഥിനിയെ പീഡിപ്പിക്കാൻ ശ്രമിച്ച കേസുമായി ബന്ധപ്പെട്ട് കായിക അധ്യാപകൻ അറസ്റ്റിൽ. ആലപ്പുഴയിലാണ് സംഭവം നടന്നത്. മാന്നാർ കുട്ടംപേരൂർ എസ് എൻ സദനം വീട്ടിൽ എസ് സുരേഷ് കുമാറിനെ (കുമാർ 43) യാണ് പോക്സോ വകുപ്പ് ചുമത്തി പോലീസ് പിടികൂടിയത്.പ്രദേശത്തെ സ്കൂളുകളിൽ താൽക്കാലിക കായിക അധ്യാപകനായി ജോലിചെയ്ത് വരികയായിരുന്നു പ്രതി സുരേഷ് കുമാർ.
സ്കൂളിൽ കുട്ടികൾക്ക് കായിക പരിശീലനം നൽകുന്നതിനിടയിലാണ് അധ്യാപകൻ വിദ്യാർത്ഥിനിയോട് മോശമായി പെരുമാറുകയും പീഡിപ്പിക്കാൻ ശ്രമിക്കുകയും ചെയ്തത്. പെൺകുട്ടി സംഭവം വീട്ടിലറിയിച്ചതിന്റെ അടിസ്ഥാനത്തിൽ മാതാപിതാക്കൾ പോലീസിൽ പരാതി നൽകി. പിന്നാലെ പോലീസ് കേസ് എടുത്തതോടെ പ്രതി ഒളിവിൽ പോയി.
ഒരാഴ്ചയായി പലയിടങ്ങളിലായി ഒളിവിൽ കഴിഞ്ഞു വന്നിരുന്ന പ്രതിയെ മാന്നാർ പോലീസ് ഇൻസ്പെക്ടർ എ അനീഷിന്റെ നേതൃത്വത്തിൽ നടത്തിയ അന്വേഷണത്തിനൊടുവിലാണ് പ്രതിയെ പോലീസ് വലയിൽ കുടുക്കിയത്.