ഡ്രൈവർ വളയം പിടിച്ചത് ഒരു ശ്രദ്ധയുമില്ലാതെ; ടയറുകൾ തേഞ്ഞ് തീർന്നതും അപകടത്തിന്റെ ആഘാതം കൂട്ടി; തലപ്പാടിയെ ഞെട്ടിച്ച ബസ് ദുരന്തത്തിൽ ഡ്രൈവർക്കെതിരെ കേസെടുക്കുമ്പോൾ

കാസർകോട്: കേരള-കർണാടക അതിർത്തിയായ തലപ്പാടിയിൽ ആറുപേരുടെ മരണത്തിനിടയാക്കിയ ബസ് അപകടത്തിൽ കർണാടക ട്രാൻസ്പോർട്ട് കോർപ്പറേഷൻ ബസ് അമിത വേഗതയിലായിരുന്നുവെന്ന് മോട്ടോർ വാഹന വകുപ്പിന്റെ കണ്ടെത്തൽ. കാസർകോട് റോഡ് ട്രാൻസ്പോർട്ട് ഓഫീസിലെ സംഘമാണ് അന്വേഷണം നടത്തി റിപ്പോർട്ട് സമർപ്പിച്ചത്. ബസിന്റെ ടയറുകൾ തേഞ്ഞുതീർന്നത് അപകടത്തിന്റെ ആഘാതം വർദ്ധിപ്പിച്ചതായും പരിശോധനയിൽ വ്യക്തമായി. ബസ്സിന്റെ ബ്രേക്കിന് തകരാറുകളൊന്നും കണ്ടെത്താനായിട്ടില്ല.

അപകടത്തെത്തുടർന്ന് ബസ് ഡ്രൈവർ നിജലിംഗപ്പക്കെതിരെ മനഃപൂർവമല്ലാത്ത നരഹത്യയ്ക്ക് കേസെടുത്തിട്ടുണ്ട്. 14 വർഷമായി കർണാടക ആർടിസിയിൽ ഡ്രൈവറായി ജോലി ചെയ്യുന്ന ഇയാൾ കഴിഞ്ഞ മൂന്നു വർഷമായി കാസർകോട്-മംഗളൂരു റൂട്ടിലാണ് സർവീസ് നടത്തിയിരുന്നത്. ഓഗസ്റ്റ് എട്ടിനുണ്ടായ അപകടത്തിൽപ്പെട്ട ബസ്സിന്റെ ഫിറ്റ്നസ് പരിശോധനകൾ കൃത്യമായി നടത്തിയിരുന്നതായും സാങ്കേതിക പ്രശ്നങ്ങൾ ഉണ്ടാകാൻ സാധ്യതയില്ലെന്നും അധികൃതർ അറിയിച്ചു.

ബസിന്റെ അമിത വേഗതയും ഡ്രൈവറുടെ ശ്രദ്ധക്കുറവുമാണ് അപകടത്തിന് കാരണമായതെന്ന് കർണാടക ആർടിസി എംഡി ഇന്നലെ പുറത്തിറക്കിയ കുറിപ്പിലും വ്യക്തമാക്കിയിരുന്നു. പരിക്കേറ്റവരുടെ ചികിത്സാച്ചെലവുകൾ കർണാടക ട്രാൻസ്പോർട്ട് കോർപ്പറേഷൻ വഹിക്കുമെന്നും അദ്ദേഹം അറിയിച്ചിട്ടുണ്ട്.

വ്യാഴാഴ്ച ഉച്ചയോടെയാണ് നാടിനെ നടുക്കിയ അപകടം നടന്നത്. മംഗളൂരുവിൽ നിന്ന് കാസർകോഡേക്ക് അമിത വേഗതയിലെത്തിയ ബസ് ആദ്യം ഓട്ടോറിക്ഷയിലും പിന്നീട് ബസ് കാത്തിരിപ്പ് കേന്ദ്രത്തിലും ഇടിച്ചുകയറുകയായിരുന്നു. ഓട്ടോറിക്ഷ ഡ്രൈവറും യാത്രക്കാരായ യുവതിയും രണ്ട് സ്ത്രീകളും ബസ് സ്റ്റോപ്പിൽ നിന്നിരുന്ന രണ്ടു സ്ത്രീകളുമാണ് അപകടത്തിൽ മരിച്ചത്.