നെയ്യാറ്റിൻകരയിൽ വിദ്യാർത്ഥികളെ കേന്ദ്രീകരിച്ച് ലഹരി വില്പന; എക്സൈസ് നടത്തിയ അന്വേഷണത്തിൽ രണ്ട് യുവാക്കൾ പിടിയിൽ; മൂന്ന് ഗ്രാം എംഡിഎംഎയും പിടിച്ചെടുത്തു

തിരുവനന്തപുരം: നെയ്യാറ്റിൻകരയിൽ വിദ്യാർത്ഥികളെ കേന്ദ്രീകരിച്ച് ലഹരി വില്പന നടത്തുന്ന യുവാക്കൾ എക്സൈസിന്റെ പിടിയിൽ. എംഡിഎംഎയുമായി രണ്ട് യുവാക്കളെയാണ് എക്സൈസ് സംഘം അറസ്റ്റ് ചെയ്തു. കരിമം സ്വദേശി രാഹുൽ (22), കാലടി സ്വദേശി മിഥുൻ രാജ് (29) എന്നിവരാണ് പിടിയിലായത്. ഇവരുടെ പക്കൽ നിന്നും വിൽപ്പനയ്ക്കായി കടത്തിക്കൊണ്ട് വന്ന മയക്കുമരുന്നുമായി മൂന്ന് ഗ്രാം എംഡിഎംഎയും എക്സൈസ് സംഘം പിടിച്ചെടുത്തു.

പ്രാവച്ചമ്പലം, പള്ളിച്ചൽ, ബാലരാമപുരം ഭാഗങ്ങളിൽ വിദ്യാർത്ഥികൾക്കും ചെറുപ്പക്കാർക്കും മയക്കുമരുന്ന് കച്ചവടം നടക്കുന്നതായും പരാതി ഉയർന്നിരുന്നു. തുടർന്ന് എക്സൈസ് നടത്തിയ അന്വേഷണത്തിലാണ് യുവാക്കൾ പിടിയിലായത്. നെയ്യാറ്റിൻകര എക്സൈസ് സർക്കിൾ ഓഫീസിലെ എക്സൈസ് ഇൻസ്പെക്ടർ എ.കെ.അജയകുമാറിന്റെ നേതൃത്വത്തിലുള്ള സംഘമാണ് പരിശോധന നടത്തിയത്.