'പെട്ടെന്ന് പിന്നില്‍ നിന്ന് തള്ളലുണ്ടായതോടെ ഞങ്ങള്‍ കുടുങ്ങി; പലരും നിലത്തുവീണു; സ്ത്രീകള്‍ക്കും കുട്ടികള്‍ക്കും അടക്കം ശ്വാസ തടസ്സമുണ്ടായി': അമൃത് സ്‌നാനത്തിനായി ബാരിക്കേഡ് ഭേദിച്ച് തീര്‍ഥാടകര്‍ കുതിച്ചതോടെ മഹാകുംഭമേളയ്ക്കിടെ 30 പേര്‍ മരിച്ചതായി സ്ഥിരീകരണം; അറുപത് പേര്‍ക്ക് പരിക്കേറ്റു
ഹാകുംഭമേളയ്ക്കിടെ 30 പേര്‍ മരിച്ചതായി സ്ഥിരീകരണം
പ്രയാഗ് രാജ്: മഹാകുംഭമേളയോട് അനുബന്ധിച്ചുണ്ടായ തിക്കിലും തിരക്കിലും പെട്ട് 30 പേര്‍ മരിച്ചു. 25 മൃതദേഹങ്ങള്‍ തിരിച്ചറിഞ്ഞതായി സുരക്ഷാ ചുമതലയുള്ള പൊലീസ് ഓഫീസര്‍ ഡിഐജി വൈഭവ് കൃഷ്ണ അറിയിച്ചു. 60 പേര്‍ക്ക് പരിക്കേറ്റിട്ടുണ്ട്. അനവധി പേരെ ആശുപത്രിയില്‍ പ്രവേശിപ്പിച്ചു.
നേരത്തെ പ്രാദേശിക മാധ്യമങ്ങളില്‍ മരണവുമായി ബന്ധപ്പെട്ട നിരവധി റിപ്പോര്‍ട്ടുകള്‍ വന്നിരുന്നെങ്കിലും, ഭരണകൂടത്തിന്റെ ഔദ്യോഗിക അറിയിപ്പാണിത്. വിശേഷദിവസമായ മൗനി അമാവാസി ദിനത്തില്‍ ത്രിവേണി സംഗമത്തില്‍ പുണ്യസ്‌നാനം നടത്താന്‍ എത്തിയ തീര്‍ഥാടകര്‍ തിക്കി തിരക്കിയതോടെയാണ് ദുരന്തം സംഭവിച്ചത്.
സംഭവത്തിന് തൊട്ടുമുമ്പ് തീര്‍ഥാടകര്‍ ബാരിക്കേഡ് ഭേദിച്ച് കുതിച്ചതായി പൊലീസ് പറഞ്ഞു.' ഞങ്ങള്‍ രണ്ടുബസുകളിലായി 60 പേരാണ് വന്നത്. ഞങ്ങളുടെ ഗ്രൂപ്പില്‍ 9 പേരുണ്ടായിരുന്നു, പെട്ടെന്ന് പിന്നില്‍ നിന്ന് തളളലുണ്ടായി. ഞങ്ങള്‍ കുടുങ്ങി. പലരും തിരക്കില്‍ പെട്ട് നിലത്തുവീണു. ആള്‍ക്കൂട്ടത്തെ നിയന്ത്രിക്കാനായില്ല', കര്‍ണാടകയില്‍ നിന്ന് വന്ന സരോജിനി പിടിഐയോട് പറഞ്ഞു.
'ഞങ്ങളെ തള്ളിയ ചിലര്‍ ചിരിക്കുകയായിരുന്നു. കുട്ടികളോട് കരുണ കാണിക്കണമെന്ന് ഞങ്ങള്‍ അവരോടു കേണപേക്ഷിച്ചു', കുട്ടിക്ക് പരിക്കേറ്റ സ്ത്രീ പ്രാദേശിക ആശുപത്രിയില്‍ വച്ച് പറഞ്ഞു. വന്‍ആള്‍ക്കൂട്ടം തിക്കി തിരക്കാന്‍ തുടങ്ങിയതോടെ എങ്ങോട്ടും പോകാന്‍ ഇടമില്ലാതായെന്നും അവര്‍ പറഞ്ഞു.
നിലവില്‍ സാഹചര്യങ്ങള്‍ നിയന്ത്രണവിധേയമാണെന്ന് ഡിഐജി കൃഷ്ണ അറിയിച്ചു. തിരക്കിനിടിയില്‍പ്പെട്ട് നിരവധി സ്ത്രീകള്‍ക്കും കുട്ടികള്‍ക്കും ശ്വാസതടസ്സം അനുഭവപ്പെട്ടതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്തിരുന്നു. അപകടമുണ്ടായ ഉടന്‍ തന്നെ ആംബുലന്‍സുകള്‍ അയക്കുകയും ഒട്ടേറെപേരെ ആശുപത്രിയിലേക്ക് മാറ്റുകയും ചെയ്തു. ബാരിക്കേഡ് തകര്‍ന്നതാണ് അപകടത്തിനു കാരണം. 1920 എന്ന ഹെല്‍പ്ലൈന്‍ നമ്പര്‍ പ്രവര്‍ത്തനം ആരംഭിച്ചിട്ടുണ്ടെന്നും ഡിഐജി പറഞ്ഞു.
അമൃതസ്‌നാനത്തിനായി പോകുന്ന തങ്ങള്‍ വളരെ വേഗം സ്‌നാനം നടത്തി മടങ്ങുമെന്നും മറ്റുളള തീര്‍ഥാടകര്‍ക്ക് വഴിയൊരുക്കുമെന്നും അഖില ഭാരതീയ അഖാര പരിഷത്ത് പ്രസിഡന്റ് മഹന്ത് രവീന്ദ്ര പുരി പറഞ്ഞു. നിരഞ്ജനി അഖാരയില്‍ നിന്നുള്ള വളരെ കുറച്ചു സാധുക്കളാണ് പുണ്യസ്‌നാനത്തിനായി എത്തുന്നതെന്ന് പഞ്ചായത്തി നിരഞ്ജനി അഖാരയിലെ ദിഗംബര്‍ നാഗ ബാബ ചിദാനന്ദ് പുരി അറിയിച്ചു. ദുരന്തത്തില്‍ പ്രധാനമന്ത്രി നരേന്ദ്ര മോദി അനുശോചനം അറിയിച്ചു. പരിക്കേറ്റ് ചികിത്സയില്‍ കഴിയുവര്‍ എത്രയും വേഗം സുഖം പ്രാപിക്കട്ടെ എന്ന് അദ്ദേഹം പ്രത്യാശിച്ചു.
മൗനി അമാവാസിയിലെ അമൃത് സ്‌നാന്‍ മഹാ കുംഭമേളയിലെ ഏറ്റവും പ്രധാനപ്പെട്ട ചടങ്ങാണ്. 144 വര്‍ഷത്തിലൊരിക്കല്‍ സംഭവിക്കുന്ന 'ത്രിവേണി യോഗ്' എന്നറിയപ്പെടുന്ന അപൂര്‍വ ആകാശ വിന്യാസം കൂടി സംഭവിക്കുന്നതിനാല്‍ ചടങ്ങിന് ഭക്തര്‍ക്കിടയില്‍ വലിയ ആത്മീയ പ്രാധാന്യമുണ്ട്. ഈമാസം 25 മുതല്‍ 30 വരെയുള്ള മൗനി അമാവാസി കാലത്ത് 5 കോടി ഭക്തരെയാണു പ്രതീക്ഷിക്കുന്നത്.
പൂര്‍ണ കുംഭമേള, അര്‍ധ കുംഭമേള, മാഘ കുംഭമേള,മഹാകുംഭമേള എന്നിങ്ങനെ കുംഭമേളകള്‍ പലതുണ്ട്. മൂന്നുവര്‍ഷം കൂടുമ്പോള്‍ ഹരിദ്വാര്‍, പ്രയാഗ്രാജ്, നാസിക്, ഉജ്ജയിനി എന്നിവിടങ്ങളിലെ നദീതീരങ്ങളിലാണ് കുംഭമേളകള്‍ നടത്താറുള്ളത്. അര്‍ധകുംഭമേള 6 വര്‍ഷത്തിനിടെ ഹരിദ്വാറിലും പ്രയാഗ്രാജിലും നടക്കും. മഹാകുംഭമേള പ്രയാഗ്രാജില്‍ മാത്രമാണ് നടക്കുന്നത്.