ഭീതി വേണ്ട, എയര്‍ ഇന്ത്യ ഡ്രീംലൈനറിലെ ഇന്ധന നിയന്ത്രണ സ്വിച്ചുകള്‍ സുരക്ഷിതം; വിമാനം നിലത്തിറക്കി നടത്തിയ പരിശോധനയില്‍ പിഴവുകളില്ലെന്ന് മന്ത്രാലയം; തെറ്റായ രീതിയില്‍ അമര്‍ത്തിയാല്‍ സ്വിച്ച് തെന്നിമാറാന്‍ സാധ്യത; കൈകാര്യം ചെയ്യുന്നതില്‍ ജാഗ്രത വേണമെന്ന് ഡിജിസിഎ

ന്യൂഡല്‍ഹി: എയര്‍ ഇന്ത്യയുടെ ബോയിംഗ് 787 ഡ്രീംലൈനര്‍ വിമാനത്തിലെ ഇന്ധന നിയന്ത്രണ സ്വിച്ചുകളില്‍ (fuel control switches) നടത്തിയ പരിശോധനയില്‍ തകരാറുകള്‍ ഒന്നും കണ്ടെത്തിയില്ലെന്ന് വ്യോമയാന മന്ത്രാലയം ചൊവ്വാഴ്ച അറിയിച്ചു. എന്‍ജിന്‍ സ്റ്റാര്‍ട്ട് ചെയ്യുന്ന സമയത്ത് സ്വിച്ച് കൃത്യമായി 'RUN' പൊസിഷനില്‍ ഉറച്ചുനില്‍ക്കുന്നില്ലെന്ന് പൈലറ്റ് റിപ്പോര്‍ട്ട് ചെയ്തതിനെത്തുടര്‍ന്നാണ് വിമാനം നിലത്തിറക്കി വിശദമായ പരിശോധന നടത്തിയത്.

വിമാന നിര്‍മ്മാതാക്കളായ ബോയിംഗിന്റെ നിര്‍ദ്ദേശപ്രകാരം എയര്‍ ഇന്ത്യയുടെ എഞ്ചിനീയറിംഗ് ടീം, ഡിജിസിഎ (DGCA) ഉദ്യോഗസ്ഥരുടെ സാന്നിധ്യത്തിലാണ് പരിശോധന പൂര്‍ത്തിയാക്കിയത്. സ്വിച്ചുകള്‍ കൈകാര്യം ചെയ്യുന്നതിലെ അപാകത അത് 'RUN', 'CUTOFF' പൊസിഷനുകള്‍ക്കിടയില്‍ തെന്നിമാറാന്‍ കാരണമായേക്കാമെന്ന് റെഗുലേറ്റര്‍ മുന്നറിയിപ്പ് നല്‍കി.

2025 ജൂണില്‍ അഹമ്മദാബാദിലുണ്ടായ എയര്‍ ഇന്ത്യ ഡ്രീംലൈനര്‍ അപകടത്തിന്റെ പശ്ചാത്തലത്തിലാണ് ഈ വിഷയം അതീവ ഗൗരവത്തോടെ കാണുന്നത്. 260 പേരുടെ മരണത്തിനിടയാക്കിയ ആ അപകടത്തില്‍, വിമാനം പറന്നുയര്‍ന്ന ഉടന്‍ തന്നെ എന്‍ജിന്‍ ഫ്യൂവല്‍ കണ്‍ട്രോള്‍ സ്വിച്ചുകള്‍ 'RUN'-ല്‍ നിന്ന് 'CUTOFF' ലേക്ക് മാറിയതായി അന്വേഷണത്തില്‍ കണ്ടെത്തിയിരുന്നു.

എഞ്ചിനീയറിംഗ് പരിശോധനയും കണ്ടെത്തലുകളും

ബോയിംഗ് ശുപാര്‍ശ ചെയ്ത മാനദണ്ഡങ്ങള്‍ അനുസരിച്ച് എയര്‍ ഇന്ത്യ എഞ്ചിനീയര്‍മാര്‍ വിമാനത്തിന്റെ ഇടത്, വലത് വശങ്ങളിലെ സ്വിച്ചുകള്‍ പരിശോധിച്ചു. രണ്ട് സ്വിച്ചുകളും തൃപ്തികരമാണെന്നും അവ 'RUN'-ല്‍ നിന്ന് 'CUTOFF'-ലേക്ക് തെന്നി മാറുന്നില്ലെന്നും എയര്‍ ഇന്ത്യ റിപ്പോര്‍ട്ട് ചെയ്തു.

എന്നിരുന്നാലും, തെറ്റായ ദിശയില്‍ സമ്മര്‍ദ്ദം ചെലുത്തിയാല്‍ സ്വിച്ച് എളുപ്പത്തില്‍ മാറാന്‍ സാധ്യതയുണ്ടെന്ന് എഞ്ചിനീയര്‍മാര്‍ നിരീക്ഷിച്ചു. സ്വിച്ചിന്റെ താഴെയുള്ള പ്ലേറ്റിന്റെ കോണാകൃതിയിലുള്ള ഡിസൈന്‍ (angular design) കാരണമാണിതെന്ന് മന്ത്രാലയം വ്യക്തമാക്കി. വിരല്‍ ഉപയോഗിച്ച് കൃത്യമല്ലാത്ത രീതിയില്‍ അമര്‍ത്തിയാല്‍ സ്വിച്ച് തെന്നിമാറിയേക്കാം.

കൂടാതെ, സ്വിച്ച് തുറക്കാന്‍ ആവശ്യമായ ബലവും (pull-to-unlock force) പരിശോധിച്ചു. ഇവയെല്ലാം അനുവദനീയമായ പരിധിയിലാണെന്ന് കണ്ടെത്തിയിട്ടുണ്ട്. സോഷ്യല്‍ മീഡിയയില്‍ പ്രചരിക്കുന്ന സ്വിച്ച് തകരാറിനെക്കുറിച്ചുള്ള വീഡിയോ തെറ്റായ രീതിയില്‍ ചിത്രീകരിച്ചതാണെന്നും ഡിജിസിഎ വ്യക്തമാക്കി. സ്വിച്ച് പ്രവര്‍ത്തിപ്പിക്കേണ്ട ശരിയായ രീതി എല്ലാ ക്രൂ അംഗങ്ങളെയും അറിയിക്കാന്‍ എയര്‍ ഇന്ത്യയോട് നിര്‍ദ്ദേശിച്ചിട്ടുണ്ട്.

ലണ്ടന്‍-ബെംഗളൂരു വിമാനം (VT-ANX)

ഫെബ്രുവരി 1-ന് ലണ്ടനില്‍ നിന്ന് ബെംഗളൂരുവിലേക്ക് സര്‍വീസ് നടത്തിയ AI-132 വിമാനത്തിലാണ് (രജിസ്ട്രേഷന്‍: VT-ANX) സംഭവം റിപ്പോര്‍ട്ട് ചെയ്തത്. ലണ്ടനില്‍ എന്‍ജിന്‍ സ്റ്റാര്‍ട്ട് ചെയ്യുന്നതിനിടെ ഫ്യൂവല്‍ സ്വിച്ച് 'RUN' പൊസിഷനില്‍ ഉറച്ചുനില്‍ക്കുന്നില്ലെന്ന് പൈലറ്റിന്റെ ശ്രദ്ധയില്‍പ്പെട്ടു. രണ്ട് ശ്രമങ്ങള്‍ പരാജയപ്പെട്ടെങ്കിലും മൂന്നാം തവണ സ്വിച്ച് കൃത്യമായി പ്രവര്‍ത്തിച്ചു.

യാത്രയിലുടനീളം പൈലറ്റുമാര്‍ എന്‍ജിന്‍ സൂചനകള്‍ സൂക്ഷ്മമായി നിരീക്ഷിച്ചിരുന്നു. വിമാനം സുരക്ഷിതമായി ബെംഗളൂരുവില്‍ ഇറങ്ങിയ ശേഷം പൈലറ്റ് റിപ്പോര്‍ട്ട് നല്‍കുകയായിരുന്നു. തുടര്‍ന്ന് എയര്‍ ഇന്ത്യ വിമാനം നിലത്തിറക്കുകയും ഡിജിസിഎയെയും ബോയിംഗിനെയും വിവരം അറിയിക്കുകയും ചെയ്തു. ബോയിംഗ് നിലവില്‍ ഈ വിഷയത്തില്‍ എയര്‍ ഇന്ത്യയ്ക്ക് ആവശ്യമായ സാങ്കേതിക സഹായം നല്‍കുന്നുണ്ട്.