മുഖ്യമന്ത്രിക്ക് ശ്രീകണ്ഠന്‍ നായര്‍ പരാതി നല്‍കിയത് കേരള ടെലിവിഷന്‍ ഫെഡറേഷന്‍ പ്രസിഡന്റ് എന്ന നിലയില്‍; എല്ലാ മലയാളം ചാനലുകള്‍ക്കും ആ 'ബാര്‍ക്ക്' കള്ളനെ അറിയാം; എന്നിട്ടും ആരും പേരു പറയുന്നില്ല; എഫ് ഐ ആര്‍ ഇടാത്തതില്‍ 24 ന്യൂസിന് അതൃപ്തി; കേന്ദ്ര ഏജന്‍സിയെ എത്തിക്കാന്‍ രാജീവ് ചന്ദ്രശേഖര്‍
തിരുവനന്തപുരം: വ്യാജ പ്രേക്ഷകരുടെ എണ്ണവുമായി ചാനലുകള്‍ കബളിപ്പിക്കുന്നതിന്റെ കൂടുതല്‍ വിവരങ്ങള്‍ പുറത്തു വിട്ടിട്ടും കേരളാ പോലീസ് എഫ് ഐ ആര്‍ രജിസ്റ്റര്‍ ചെയ്യുന്നില്ല. ടെലിവിഷന്‍ പ്രേക്ഷകരുടെ എണ്ണം കണക്കാക്കുന്ന ഏജന്‍സിയായ ബാര്‍ക്കിലെ ജീവനക്കാരെ കോടികള്‍ കോഴ നല്‍കി മലയാളത്തിലെ ഒരു ചാനല്‍ സ്വാധീനിച്ചതായി 24 ന്യൂസ് പരാതി നല്‍കിയിരുന്നു. സംഭവത്തില്‍ കേരള ടെലിവിഷന്‍ ഫെഡറേഷന്‍ (കെടിഎഫ്) പ്രസിഡന്റ് ആര്‍. ശ്രീകണ്ഠന്‍ നായര്‍ മുഖ്യമന്ത്രിക്ക് പരാതി നല്‍കിയിരുന്നു. മുഖ്യമന്ത്രി, പരാതി സംസ്ഥാന പൊലീസ് മേധാവിക്ക് കൈമാറുകയും അന്വേഷണത്തിനായി സൈബര്‍ ടീമിനെ ചുമതലപ്പെടുത്തുകയും ചെയ്തു. എന്നാല്‍ ഇതുവരേയും എഫ് ഐ ആര്‍ ഇട്ടില്ല. ബാര്‍ക്ക് ആഭ്യന്തര അന്വേഷണം തുടങ്ങിയിട്ടുണ്ട്. കേരളാ പോലീസ് സംഭവത്തെ ഗൗരവത്തില്‍ കാണുന്നില്ല.
അതിനിടെ ബാര്‍ക്ക് റേറ്റിങ് തട്ടിപ്പില്‍ കേന്ദ്ര- സംസ്ഥാന സര്‍ക്കാര്‍ അന്വേഷണം നടത്തണമെന്ന് ആവശ്യപ്പെട്ട് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. റേറ്റിങ് തട്ടിപ്പ് ഞെട്ടിപ്പിക്കുന്നതാണ്. ഒരാള്‍ വന്ന് ചാനല്‍ ആരംഭിച്ച് പൈസ കൊടുത്തു റേറ്റിങ് വാങ്ങുന്നത് നാടിനു അപകടകരമാണെന്ന് രാജീവ് ചന്ദ്രശേഖര്‍ പറഞ്ഞു. 20, 30 വര്‍ഷമായി നന്നായി ജോലി ചെയ്യുന്നവരെ ബാര്‍ക്ക് തട്ടിപ്പിലൂടെ പുറകില്‍ ആക്കുന്നതില്‍ നടപടിയുണ്ടാകണം. ജനാധിപത്യത്തിലെ അഭിപ്രായ രൂപീകരണത്തെ ഹൈ ജാക്ക് ചെയ്യലാണ് ഇപ്പോള്‍ നടന്നിരിക്കുന്നത്. മാധ്യമങ്ങളുടെ വിശ്വാസ്യത പ്രധാനമാണ്. അതുകൊണ്ടുതന്നെ ഇത്തരം തട്ടിപ്പുകള്‍ അനുവദിക്കരുത്. മുമ്പ് ആന്ധ്രയിലും തമിഴ്നാടിലും നടന്ന ഈ തട്ടിപ്പ് കേരളത്തില്‍ വരുമെന്ന് കരുതിയില്ലെന്നും രാജീവ് ചന്ദ്രശേഖര്‍ കൂട്ടിച്ചേര്‍ത്തു. ഏഷ്യാനെറ്റ് ന്യൂസിന്റെ ഉടമയാണ് രാജീവ് ചന്ദ്രശേഖര്‍. കെടിഎഫ് പ്രസിഡന്റെന്ന നിലയിലാണ് ശ്രീകണ്ഠന്‍ നായര്‍ പരാതി കൊടുത്തതെന്നാണ് സൂചന. അതുകൊണ്ട് തന്നെ കെടിഎഫിലെ അംഗങ്ങള്‍ക്കെല്ലാം ചാനലിന്റെ പേരറിയാം. എന്നാല്‍ ആരും പേര് ഉള്‍പ്പെടെ വാര്‍ത്ത കൊടുക്കുന്നി്‌ല്ലെന്നതാണ് വസ്തുത. കേന്ദ്ര ഏജന്‍സികളെ അന്വേഷണത്തിന് എത്തിക്കാനാണ് രാജീവ് ചന്ദ്രശേഖറിന്റെ നീക്കമെന്നാണ് സൂചന.
ബാര്‍ക്കിലെ ഉദ്യോഗസ്ഥനായ പ്രേംനാഥ് എന്നയാളുടെ നേതൃത്വത്തില്‍ മുംബൈ കേന്ദ്രീകരിച്ചുള്ള സംഘത്തെ സ്വാധീനിച്ചാണ് മലയാളം ചാനല്‍ തട്ടിപ്പ് നടത്തിയതെന്ന് ട്വന്റി ഫോര്‍ ന്യൂസ് ചാനല്‍ പുറത്തുവിട്ട റിപ്പോര്‍ട്ടില്‍ പറയുന്നു. ഇതുസംബന്ധിച്ച് നിരവധി തെളിവുകള്‍ ചാനല്‍ പുറത്തുവിട്ടു. ബാര്‍ക്കില്‍ തട്ടിപ്പ് നടത്താന്‍ കേരളത്തിലെ ഒരു ചാനല്‍ ഉടമ കോടികള്‍ കോഴ നല്‍കി എന്നാണ് ഇവര്‍ റിപ്പോര്‍ട്ട് ചെയ്യുന്നത്. നേരത്തെ ബാര്‍ക്ക് റേറ്റിങ്ങില്‍ വന്‍ തട്ടിപ്പ് നടക്കുന്നതായി മീഡിയവണ്‍ ചൂണ്ടിക്കാട്ടിയിരുന്നു. പിന്നാലെ ബാര്‍ക്കില്‍ നിന്ന് മീഡിയവണ്‍ പിന്മാറുകയും ചെയ്തിരുന്നു. പ്രേംനാഥ് നിലവില്‍ ബാര്‍ക്കില്‍ ജോലി ചെയ്യുന്നില്ലെന്നും സൂചനയുണ്ട്. അങ്ങനെയാണെങ്കില്‍ ബാര്‍ക്കിന്റെ ആഭ്യന്തര അന്വേഷണവുമായി പ്രേംനാഥിന് സഹകരിക്കേണ്ട ആവശ്യം പോലുമില്ല. അതുകൊണ്ട് തന്നെ എഫ് ഐ ആറിട്ട് പോലീസ് കേസെടുക്കുന്നതാണ് സത്യം പുറത്തു വരാന്‍ അഭികാമ്യം.
കേരളത്തിലെ ഒരു ചാനല്‍ ഉടമയുടെ അക്കൗണ്ടില്‍ നിന്നും ബാര്‍ക്ക് ജീവനക്കാരനായ പ്രേംനാഥിന്റെ വാലറ്റിലേക്ക് കോടികളെത്തിയെന്നാണ് ട്വന്റി ഫോര്‍ ന്യൂസ് ചാനല്‍ മേധാവി കൂടിയായ ശ്രീകണ്ഠന്‍ നായരുടെ പരാതി. ക്രിപ്‌റ്റോ കറന്‍സി വഴിയാണ് ചാനല്‍ ഉടമ പണം കൈമാറ്റം ചെയ്തതത്രെ. ബാര്‍ക്ക് ജീവനക്കാരന്‍ പ്രേംനാഥും കേരളത്തിലെ ആരോപണവിധേയനായ ചാനല്‍ ഉടമയും തമ്മില്‍ നടന്ന വാട്‌സ് ആപ്പ് ചാറ്റുകളടക്കം ട്വന്റിഫോര്‍ ചാനല്‍ പുറത്തുവിട്ടു. പക്ഷേ ചാനലിന്റെ പേര് പറഞ്ഞതുമില്ല. എന്നാല്‍ മീഡിയാ വണ്‍ അല്ലാതെ മറ്റൊരു ചാനലും ഈ വാര്‍ത്ത പോലും നല്‍കിയില്ല.
ഇതോടൊപ്പം യൂട്യൂബ് വ്യൂവര്‍ഷിപ്പില്‍ തട്ടിപ്പു നടത്താന്‍ ഫോണ്‍ ഫാമിങ് എന്ന സാങ്കേതിക വിദ്യയും ആരോപണവിധേയനായ ചാനല്‍ ഉടമ ഉപയോഗിച്ചതായി ട്വന്റി ഫോര്‍ ആരോപിച്ചു. മലേഷ്യ, തായ്‌ലന്‍ഡ് എന്നീ രാജ്യങ്ങളിലെ ഫോണ്‍ ഫാമിങ് ഏജന്‍സികള്‍ക്ക് കോടികള്‍ നല്‍കി ആധുനിക സാങ്കേതിക വിദ്യ ഉപയോഗിച്ച് യൂട്യൂബ് വ്യൂവര്‍ഷിപ്പ് ഉയര്‍ത്തി റേറ്റിങ് തട്ടിപ്പിന് പശ്ചാത്തലമൊരുക്കിയെന്നതാണ് ആരോപണം. ബാര്‍ക്ക് കണക്കുകളെക്കുറിച്ച് മീഡിയവണ്‍ ഉന്നയിച്ച സംശയങ്ങള്‍ക്ക് വിശ്വാസ്യയോഗ്യമായ മറുപടി ലഭിക്കാത്തതിനെതുടര്‍ന്നായിരുന്നു ടെലിവിഷന്‍ ചാനലുകളുടെ റേറ്റിങ് ഏജന്‍സിയായ ബാര്‍ക്കുമായുള്ള ബന്ധം മീഡിയവണ്‍ വിച്ഛേദിച്ചത്.
റേറ്റിങ് കണക്കാനെടുക്കുന്ന തീരെ ചെറിയ സാംപിള്‍ സൈസും മീറ്ററുകളുടെ അശാസ്ത്രീയ വിന്യാസവുമാണ് ബാര്‍ക്കിന്റെ പ്രധാന പ്രശ്‌നം. ആകെയുള്ള 86 ലക്ഷം ടിവികളില്‍ ബാര്‍ക്ക് മീറ്ററുള്ളത് വെറും 1500 ല്‍ താഴെ മാത്രം ഇടങ്ങളിലാണെന്നും ആക്ഷേപമുണ്ട്.