ജിബിലി സ്‌റ്റൈലില്‍ ആര്‍ട്ട് ഫീച്ചര്‍ തരംഗമായി; ഡൗണ്‍ലോഡിങ്ങില്‍ ഇന്‍സ്റ്റഗ്രാമിനെയും ടിക് ടോകിനെയും പിന്നിലാക്കി ഓപ്പണ്‍ എഐയുടെ ചാറ്റ് ജിപിടി; മാര്‍ച്ചില്‍ ആപ്പ് ഡൗണ്‍ലോഡ് ചെയ്തത് 4.6 കോടി ആളുകള്‍
മുംബൈ: ഡൗണ്‍ലോഡിങ്ങില്‍ സാമൂഹികമാധ്യമ ഭീമന്മാരായ ഇന്‍സ്റ്റഗ്രാമിനെയും ടിക് ടോകിനെയും പിന്നിലാക്കി ഓപ്പണ്‍ എഐയുടെ ചാറ്റ് ജിപിടി. മാര്‍ച്ചില്‍ 4.6 കോടി ഡൗണ്‍ലോഡുകളുമായി ആഗോളതലത്തില്‍ ഒന്നാമതെത്തിയാണ് ഈ എഐ ആപ്പിന്റെ വിജയം. പ്രശസ്ത അനലറ്റിക്‌സ് സ്ഥാപനമായ ആപ്പ് ഫിഗേഴ്‌സ് പുറത്തുവിട്ട കണക്കുകളാണ് ചാറ്റ് ജിപിടിയുടെ കുതിപ്പ് രേഖപ്പെടുത്തുന്നത്.
ചാറ്റ് ജിപിടിയില്‍ പുതിയതായി ചേര്‍ത്ത ചിത്രരചനാ സംവിധാനമാണ് ഡൗണ്‍ലോഡിന് വേഗം കൂട്ടിയത്. ജിബിലി സ്‌റ്റൈലില്‍ ആവിഷ്‌കരിക്കാവുന്ന സ്റ്റുഡിയോ ആര്‍ട്ട് ഫീച്ചറാണ് സാമൂഹ്യ മാധ്യമങ്ങളില്‍ വലിയ തരംഗമാകുന്നത്. ഈ ക്രിയേറ്റീവ് ടൂള്‍ പരീക്ഷിക്കാനായി ദശലക്ഷക്കണക്കിന് ആളുകള്‍ ഈ ആപ്പ് ഡൗണ്‍ലോഡ് ചെയ്തു.
മാര്‍ച്ചിലെ 4.6 കോടി ഡൗണ്‍ലോഡുകളില്‍ 1.3 കോടി ആപ്പിള്‍ ഉപയോക്താക്കളില്‍ നിന്നുമാണ്. 3.3 കോടി ആന്‍ഡ്രോയ്ഡില്‍. ഇന്‍സ്റ്റഗ്രാം ആകെ 4.6 കോടിയോളം ഡൗണ്‍ലോഡുകള്‍ നേടെങ്കിലും ഐഫോണുകളില്‍ 50 ലക്ഷവും ആന്‍ഡ്രോയ്ഡില്‍ 4.1 കോടിയുമാണ്. ടിക് ടോകിന് ആകെ 4.5 കോടി ഡൗണ്‍ലോഡുകളാണ് ഉണ്ടായത് 80 ലക്ഷം ഐഫോണുകളിലും 3.7 കോടി ആന്‍ഡ്രോയ്ഡിലും.
ചാറ്റ് ജിപിടിയുടെ വളര്‍ച്ചയുടെ റിത്തം കൂടി ശ്രദ്ധേയമാണ്. മാര്‍ച്ചില്‍ മാത്രം ഫെബ്രുവരിയെക്കാള്‍ 28% വര്‍ധനയുള്ള ഡൗണ്‍ലോഡ്. 2024 ജനുവരി മുതല്‍ മാര്‍ച്ച് വരെയുടെ കണക്കുമായി താരതമ്യപ്പെടുത്തുമ്പോള്‍ 2025-ലെ ആദ്യമാസങ്ങളില്‍ 148% വര്‍ധനയാണെന്ന് ആപ്പ് ഫിഗേഴ്‌സ് വ്യക്തമാക്കി.
ഉപയോക്താക്കളെ കൂടുതല്‍ ആകര്‍ഷിക്കുന്ന വിധത്തില്‍ ടൂളുകള്‍ ആഡ് ചെയ്യുന്നതിനൊപ്പം, ഉപയോക്തൃാനുഭവം മെച്ചപ്പെടുത്തിയതുമാണ് ഈ കുതിപ്പിന് പിന്നിലെ പ്രധാനകാരണം. ഓപ്പണ്‍ എഐയുടെ സിഒഒ ബ്രാഡ് ലൈറ്റ്ക്യാപ് അടുത്തിടെ വെളിപ്പെടുത്തിയത് പ്രകാരം, ചിത്രസംസ്‌കരണ ഫീച്ചര്‍ പുറത്തിറക്കിയതോടെ ആക്ടീവ് ഉപയോക്താക്കളുടെ എണ്ണം 13 കോടിയിലേക്ക് ഉയര്‍ന്നതായി വ്യക്തമാക്കുന്നു.
സാധാരണ ഉപയോക്താക്കളില്‍ നിന്ന് കണ്ടന്റ് ക്രിയേറ്റര്‍മാരിലേക്ക് വരെ വൈവിധ്യമാര്‍ന്ന ആളുകളെ ആകര്‍ഷിക്കുന്ന ചാറ്റ് ജിപിടി, ഇനി മാത്രം എഴുത്തും ചിന്തകളും മാത്രമല്ല, സൃഷ്ടിയുടെ പുതിയതലങ്ങളിലേക്ക് ഒരു പാത തുറന്നിരിക്കുകയാണ്.