സ്കൂളില് പോയിരുന്നത് ലൈന് ബസ്സില് ആണ്; എത്രയോ തവണ ഇത്തരത്തില് ശാരീരിക പീഡനങ്ങള് അനുഭവിച്ചിട്ടുണ്ട്; എന്ത് ചെയ്യണം എന്നറിയാതെ കരഞ്ഞിട്ടുണ്ട്, പകച്ചു പോയിട്ടുണ്ട്; വീഡിയോ തെളിവിനായി എടുക്കാം; പക്ഷെ അതു കൊണ്ടുപോയി പോസ്റ്റ് ചെയ്യുന്നത് ഒരു തരത്തിലും ന്യായീകരിക്കാന് സാധിക്കില്ല സഹോദരി; ദീപക്കിന്റെ ആത്മഹത്യയില് ഡോ. സൗമ്യ സരിന്റെ കുറിപ്പ്
ദീപക്കിന്റെ ആത്മഹത്യയില് ഡോ. സൗമ്യ സരിന്റെ കുറിപ്പ്
തിരുവനന്തപുരം: നമുക്ക് നേരെ ഒരു അതിക്രമം നടന്നാല് നിങ്ങള്ക്ക് അത് വീഡിയോ എടുക്കാം എന്നാല് അത് തെളിവിനായി മാത്രം ആകണമെന്ന് ഡോ. സൗമ്യ സരിന്. കോഴിക്കോട് ബസിനുള്ളില് വെച്ചു ലൈംഗിക അതിക്രമത്തിന് ശ്രമിച്ചുവെന്ന വിധത്തില് യുവതി വീഡിയോ പോസ്റ്റു ചെയ്തതില് മനംനൊന്ത് യുവാവ് മരിച്ച സംഭവത്തിലാണ് ഡോ. സൗമ്യ സരിന്റെ പ്രതികരണം. വൈറല് കണ്ടന്റ് ഉണ്ടാക്കാന് വേണ്ടിയാണ് യുവതി ശ്രമിച്ചതെന്ന വിമര്ശനം ഉയര്ന്നിരുന്നു. ഇതിനിടെയാണ് സൗമ്യയും വിഷയത്തില് പ്രതികരണവുമായി രംഗത്തുവന്നത്.
തെൡവിനായി വീഡിയോ എടുക്കുന്നതിന് പകരം അത് പരസ്യമായി പോസ്റ്റ് ചെയ്താല് നിങ്ങളുടെ ഉദ്ദേശം തന്നെ സംശയിക്കപ്പെടും എന്നതില് തര്ക്കമില്ലെന്നാണ് സൗമ്യ ചൂണ്ടിക്കാട്ടുന്നത്. ഈ വീഡിയോ നശിപ്പിച്ചത് ഒരു യുവാവിന്റെയും അവന്റെ മാതാപിതാക്കളുടെയും ജീവിതം മാത്രമല്ല. ഈ നാട്ടില് യഥാര്ത്ഥത്തില് പല രീതികളില് ശാരീരിക പീഡനം അനുഭവിക്കുന്ന സ്ത്രീകള്ക്ക് കിട്ടേണ്ട നീതി കൂടിയാണെന്നും അവര് വ്യക്തമാക്കുന്നു. ഇങ്ങനെയുള്ള കേസുകള് കൂടുമ്പോള് യഥാര്ത്ഥ കേസുകള് പോലും സംശയ മുനയില് ആകും. സമൂഹത്തിന് ഇതിനെതിരെ പ്രതികരിക്കാന് കൂടി തോന്നാതെ ആകുമെന്നും ഡോ. സൗമ്യ ഫേസ്ബുക്ക് കുറിപ്പില്് യഥാര്ത്ഥ വേട്ടക്കാര്ക്ക് കൂടുതല് സൗകര്യം ആകുകയേയുള്ളു!
ഡോ. സൗമ്യ സരിന്റെ ഫേസ്ബുക്ക് കുറിപ്പ് ഇങ്ങനെ:
'ബസ്സില് വെച്ചു മോശമായി പെരുമാറി എന്ന് കാണിച്ചു യുവതി പോസ്റ്റ് ചെയ്ത ഇന്സ്റ്റാഗ്രാം റീലിലെ യുവാവ് ആത്മഹത്യാ ചെയ്തു!'
ആദ്യമേ പറയട്ടെ, ഒരാള്ക്ക് നേരെ ഒരു അതിക്രമം നടന്നാല് അതിന് തീര്പ്പ് ഉണ്ടാക്കേണ്ട സ്ഥലമല്ല സോഷ്യല് മീഡിയ. ഇത് കോടതിയോ നിയമസംവിധാനമോ അല്ല. ഇവിടെ ഉണ്ടാകുന്ന തീര്പ്പുകള്ക്ക് ഇതുപോലെ ജീവന്റെ വിലയുണ്ട്!
നമുക്ക് നേരെ ഒരു അതിക്രമം നടന്നാല് നിങ്ങള്ക്ക് അത് വീഡിയോ എടുക്കാം. ആരും കുറ്റം പറഞ്ഞില്ല. പക്ഷെ അത് തെളിവിനായി മാത്രം ആകണം. അല്ലാതെ അത് പരസ്യമായി പോസ്റ്റ് ചെയ്താല് നിങ്ങളുടെ ഉദ്ദേശം തന്നെ സംശയിക്കപ്പെടും എന്നതില് തര്ക്കമില്ല!
ഇന്ന് ഇത്തരത്തില് ഒരു വീഡിയോ പ്രചരിപ്പിച്ചാല് എങ്ങിനെ ആണ് സോഷ്യല് മീഡിയയില് ആളുകള് പ്രതികരിക്കുന്നത് എന്ന് നമ്മള് കാണുന്നതാണ്. വധശിക്ഷ വരെ വിധിച്ചു കളയുന്ന ആളുകള് നമുക്ക് ചുറ്റുമുണ്ട്. അതില് കാണിക്കുന്ന വ്യക്തിക്ക് എന്തൊക്കെ കേള്ക്കുകയും അനുഭവിക്കുകയും ചെയേണ്ടി വരും എന്നത് നമുക്ക് ഊഹിക്കാന് സാധിക്കില്ല!
ഈ വീഡിയോ നശിപ്പിച്ചത് ഒരു യുവാവിന്റെയും അവന്റെ മാതാപിതാക്കളുടെയും ജീവിതം മാത്രമല്ല. ഈ നാട്ടില് യഥാര്ത്ഥത്തില് പല രീതികളില് ശാരീരിക പീഡനം അനുഭവിക്കുന്ന സ്ത്രീകള്ക്ക് കിട്ടേണ്ട നീതി കൂടിയാണ്. ഇങ്ങനെയുള്ള കേസുകള് കൂടുമ്പോള് യഥാര്ത്ഥ കേസുകള് പോലും സംശയ മുനയില് ആകും. സമൂഹത്തിന് ഇതിനെതിരെ പ്രതികരിക്കാന് കൂടി തോന്നാതെ ആകും. അത് യഥാര്ത്ഥ വേട്ടക്കാര്ക്ക് കൂടുതല് സൗകര്യം ആകുകയേയുള്ളു!
കുട്ടികാലം മുതല് സ്കൂളില് പോയിരുന്നത് ലൈന് ബസ്സില് ആണ്. എത്രയോ തവണ ഇത്തരത്തില് ശാരീരിക പീഡനങ്ങള് അനുഭവിച്ചിട്ടുണ്ട്. എന്ത് ചെയ്യണം എന്നറിയാതെ കരഞ്ഞിട്ടുണ്ട്. പകച്ചു പോയിട്ടുണ്ട്. ഇന്നും അത് അനുഭവിക്കുന്ന എത്രയോ സ്ത്രീകള് ഉണ്ട്.
പക്ഷെ അതിനുള്ള വഴി ഇതല്ല! ഇവിടെ ഒരു നിയമസംവിധാനം ഉണ്ട്. വീഡിയോ തെളിവിനായി എടുക്കാം. പക്ഷെ അതു കൊണ്ടുപോയി പോസ്റ്റ് ചെയ്യുന്നത് ഒരു തരത്തിലും ന്യായീകരിക്കാന് സാധിക്കില്ല സഹോദരി.
നിങ്ങള്ക്ക് മാന്യമായി പരാതി കൊടുക്കാമായിരുന്നു. ആ വീഡിയോയില് ആസ്വഭാവികമായി എന്തെങ്കിലും ഉണ്ടെങ്കില് അയാള്ക്കെതിരെ കേസ് എടുക്കട്ടെ. അന്വേഷിക്കട്ടെ. അല്ലാതെ ഇതാണോ നീതി കിട്ടാനുള്ള വഴി? എന്നിട്ട് നിങ്ങള്ക്കിപ്പോള് നീതി കിട്ടിയോ? സോഷ്യല് മീഡിയയില് കയ്യില് കിട്ടുന്നതെന്തും പോസ്റ്റ് ചെയ്യുമ്പോള് ഒന്ന് ആലോചിക്കുക... അപ്പുറത്ത് നില്കുന്നവനും ഒരു ജീവിതം ഉണ്ട് എന്ന്...!
അസ്വഭാവിക മരണത്തിന് കേസെടുത്തു പോലീസ്
സാമൂഹ്യ മാധ്യമങ്ങളിലൂടെ ദൃശ്യം പ്രചരിച്ചതിന് പിന്നാലെ ഗോവിന്ദാപുരം സ്വദേശി ദീപക് ജീവനൊടുക്കിയതിന് പിന്നാലെ സംഭവത്തില് അസ്വാഭാവിക മരണത്തിന് മെഡിക്കല് കോളേജ് പൊലീസ് കേസെടുത്തു. ദീപക്ക് ബസില് വച്ച് യുവതിയുടെ നേരെ ലൈംഗികാതിക്രമം നടത്തിയെന്ന ആരോപണം ഉണ്ടായിരുന്നു. ഇതിന് പിന്നാലെ ദീപക് വലിയ മാനസിക സമ്മര്ദത്തിലായിരുന്നെന്ന് കുടുംബം പറയുന്നു.
കഴിഞ്ഞ വെള്ളിയാഴ്ച കണ്ണൂരിലേക്കുള്ള യാത്രക്കിടെ ബസില്വെച്ച് ദീപക് അപമര്യാദയായി പെരുമാറിയെന്നായിരുന്നു യുവതിയുടെ പരാതി. ദുരുദ്ദേശത്തോടെ യുവാവ് ശരീരത്തില് സ്പര്ശിച്ചെന്ന് കാണിച്ച് വടകര പൊലീസില് പരാതിയും നല്കിയിരുന്നു. പിന്നാലെ ലൈംഗികാതിക്രമം നടത്തിയെന്ന് ആരോപിച്ച് യുവതി ദീപകിനെതിരെ സമൂഹമാധ്യമത്തില് വീഡിയോ പങ്കുവച്ചിരുന്നു. ഇത് വലിയ രീതിയില് പ്രചരിച്ചു. 20 ലക്ഷത്തിലേറെ പേരാണ് വീഡിയോ കണ്ടത്. നിരവധിയാളുകള് ഇത് പങ്കുവയ്ക്കുകയും ചെയ്തു.
വീഡിയോ വൈറലായതോടെ ദീപക്ക് കടുത്ത മാനസിക സമ്മര്ദത്തിലായിരുന്നു എന്ന് കുടുംബം പറയുന്നു. സമൂഹമാധ്യമങ്ങളില് റീച്ച് കൂട്ടുക എന്ന നിലയിലാണ് പെണ്കുട്ടി വീഡിയോ ചിത്രീകരിച്ചതെന്നും ദീപകിന്റെ കുടുംബം ആരോപിക്കുന്നു. ഇതിനു പിന്നാലെയാണ് ദീപക് ജീവനൊടുക്കിയത്.