'ഇത് വിരാട് ആണ്! സഹായം വേണം! ഡ്രോണ്‍ ആക്രമണം! മെയ്ഡേ!': കരിങ്കടലില്‍ റഷ്യയുടെ രണ്ട് എണ്ണ ടാങ്കറുകള്‍ക്ക് നേരേ യുക്രെയിന്റെ ഡ്രോണ്‍ ആക്രമണം; ആക്രമിക്കപ്പെട്ടത് വിരാട്, കൈറോസ് എന്നീ ഷാഡോ ഫ്‌ലീറ്റില്‍ പെട്ട കപ്പലുകള്‍; സീ ബേബി സമുദ്ര ഡ്രോണുകള്‍ പ്രയോഗിച്ചുള്ള ആക്രമണം റഷ്യക്ക് ഏല്‍പ്പിച്ചത് വന്‍ആഘാതം
റഷ്യയുടെ രണ്ട് എണ്ണ ടാങ്കറുകള്‍ക്ക് നേരേ യുക്രെയിന്റെ ഡ്രോണ്‍ ആക്രമണം
മോസ്‌കോ/അങ്കാറ: റഷ്യയും യുക്രെയിനും തമ്മിലുള്ള യുദ്ധം കരിങ്കടലില്‍ പുതിയ തലത്തിലേക്ക്. റഷ്യയുടെ 'ഷാഡോ ഫ്‌ലീറ്റ്' ശൃംഖലയില്‍പ്പെട്ട രണ്ട് എണ്ണ ടാങ്കറുകള്‍ക്ക് നേരെ യുക്രെയ്ന് നാവിക സേനയുടെ ഡ്രോണ്‍ ആക്രമണം. തുര്‍ക്കി തീരത്തിന് സമീപമാണ് സംഭവം.
'വിരാട്', 'കൈറോസ്' എന്നീ കപ്പലുകള്‍ക്കാണ് നേരെയാണ് ആക്രമണം നടന്നത്. ഇവ റഷ്യയുടെ ഷാഡോ ഫ്‌ലീറ്റ് ശൃംഖലയില്‍പ്പെട്ടതാണ്.
എന്താണ് ഷാഡോ ഫ്‌ലീറ്റ്?
പാശ്ചാത്യ ഉപരോധം മറികടന്ന് എണ്ണ കൊണ്ടുപോകാനായി റഷ്യ ഉപയോഗിക്കുന്ന പഴയതും, ഉടമസ്ഥാവകാശം, പേര്, രജിസ്‌ട്രേഷന്‍ എന്നിവ നിഗൂഢവുമായ രഹസ്യ കപ്പല്‍ ശൃംഖലയാണിത്. ആക്രമണ സമയത്ത് കപ്പലുകളില്‍ എണ്ണ ഉണ്ടായിരുന്നില്ല. റഷ്യന്‍ തുറമുഖമായ നോവോറോസിസ്‌കിലേക്ക് നീങ്ങുകയായിരുന്നു ഇവ.
യുക്രൈന്റെ 'സീ ബേബി' ഓപ്പറേഷന്‍
'സീ ബേബി' (Sea Baby) എന്ന സമുദ്ര ഡ്രോണുകള്‍ ഉപയോഗിച്ചാണ് യുക്രൈന്‍ നാവിക സേനയും ഇന്റലിജന്‍സ് ഏജന്‍സിയായ എസ്.ബി.യുവും സംയുക്തമായി ആക്രമണം നടത്തിയത്.
പ്രാദേശിക സമയം വെള്ളിയാഴ്ച ഉച്ചയ്ക്ക് 'കൈറോസ്' ആക്രമിക്കപ്പെട്ടു. 'വിരാടി'ന് നേരെ വെള്ളിയാഴ്ച രാത്രിയും ശനിയാഴ്ച പുലര്‍ച്ചെയും ആക്രമണമുണ്ടായി. 'ഇത് വിരാട് ആണ്! സഹായം വേണം! ഡ്രോണ്‍ ആക്രമണം! മെയ്ഡേ!' എന്ന് തുറന്ന റേഡിയോ ഫ്രീക്വന്‍സിയില്‍ കപ്പല്‍ ജീവനക്കാര്‍ സഹായം അഭ്യര്‍ത്ഥിക്കുന്നതിന്റെ ശബ്ദരേഖ പുറത്തുവന്നു.
തുര്‍ക്കി ഇടപെട്ടു; ജീവനക്കാര്‍ സുരക്ഷിതം
ഇരു കപ്പലുകളില്‍നിന്നായി 45 ജീവനക്കാരെ തുര്‍ക്കി രക്ഷപ്പെടുത്തി. തീ നിയന്ത്രണവിധേയമാക്കിയതായും തുര്‍ക്കി അറിയിച്ചു. തുര്‍ക്കി തീരത്തുനിന്ന് ഏകദേശം 50 കിലോമീറ്റര്‍ അകലെ, തുര്‍ക്കി അതിര്‍ത്തിക്ക് പുറത്തായിരുന്നു ആക്രമണങ്ങള്‍. 'വിരാടി'ലെ 20 ജീവനക്കാരെ ആദ്യ ആക്രമണത്തിന് പിന്നാലെ ഒഴിപ്പിച്ചു. 'കൈറോസി'ലെ 25 ജീവനക്കാരും സുരക്ഷിതരാണ്. ടാങ്കറുകളില്‍ 'പുറത്ത് നിന്നുള്ള ആഘാത'ത്തിന്റെ (ഒരുപക്ഷേ മൈന്‍, റോക്കറ്റ്, അല്ലെങ്കില്‍ ഡ്രോണ്‍) അടയാളങ്ങള്‍ പരിശോധിക്കുമെന്ന് തുര്‍ക്കി ഗതാഗത മന്ത്രി അബ്ദുള്‍കാദിര്‍ ഉറാലോഗ്ലു വ്യക്തമാക്കി.
ഷാഡോ ഫ്‌ലീറ്റി'ന് ഗുരുതര ആഘാതം
പാശ്ചാത്യ ഉപരോധങ്ങളെ മറികടന്ന് രഹസ്യമായി എണ്ണ കടത്താനായി റഷ്യ ഉപയോഗിക്കുന്ന കപ്പല്‍ ശൃംഖലയാണ് 'ഷാഡോ ഫ്‌ലീറ്റ്'. ഈ ടാങ്കറുകള്‍ക്ക് ഗുരുതരമായ കേടുപാടുകള്‍ സംഭവിച്ചതായും, ഇവയെ ഫലത്തില്‍ ഉപയോഗശൂന്യമാക്കിയതായും എസ്.ബി.യു. വൃത്തങ്ങള്‍ സി.എന്‍.എന്നിനോട് സ്ഥിരീകരിച്ചു.
'റഷ്യന്‍ എണ്ണയുടെ ഗതാഗതത്തിന് ഇത് വലിയ തിരിച്ചടിയാകും. ഉപരോധങ്ങള്‍ക്കിടയിലും എണ്ണ നീക്കാന്‍ റഷ്യ ആശ്രയിക്കുന്നത് ഈ ടാങ്കറുകളെയാണ്.' - യുക്രൈന്‍ സുരക്ഷാ വൃത്തങ്ങള്‍.
യുക്രെയ്‌ന്റെ അവകാശവാദം
ആക്രമണത്തില്‍ കപ്പലുകള്‍ക്ക് ഗുരുതര കേടുപാടുകള്‍ സംഭവിച്ചതായി യുക്രെയ്ന് അവകാശപ്പെട്ടു. എന്നാല്‍, കേടുപാടുകള്‍ പരിമിതമാണെന്നും തീപിടുത്തമില്ലെന്നും തുര്‍ക്കി അധികൃതര്‍ അറിയിച്ചു. അതേസമയം, സംഭവത്തില്‍ റഷ്യ ഔദ്യോഗികമായി പ്രതികരിച്ചിട്ടില്ല.
കരിങ്കടല്‍ ആക്രമണത്തിന് പിന്നാലെ, ശനിയാഴ്ച പുലര്‍ച്ചെ യുക്രെയിന്റെ വിവിധ ഭാഗങ്ങളില്‍ റഷ്യ വ്യോമാക്രമണം നടത്തി. ആക്രമണത്തില്‍ 3 പേര് കൊല്ലപ്പെട്ടു, നിരവധി പേര്‍ക്ക് പരിക്കേറ്റു. കീവിലെ ഊര്‍ജ്ജ കേന്ദ്രങ്ങള്‍ തകര്‍ക്കപ്പെട്ടതോടെ 6 ലക്ഷം ഉപഭോക്താക്കളിലേക്കുള്ള വൈദ്യുതി വിതരണം തടസ്സപ്പെട്ടു. റഷ്യ യുക്രെയ്ന് നേരെ 36 മിസൈലുകളും 600 ഡ്രോണുകളുമാണ് വിക്ഷേപിച്ചത്