ടികെഎമ്മിലെ എന്‍ജിനീയര്‍ അഡ്വക്കേറ്റായത് അച്ഛന്റെ ആഗ്രഹം അനുസരിച്ച്; കൊല്ലത്തെ വിജയരാഘവന്‍ വക്കീലിന്റെ മകന്റെ മറ്റൊരു കമ്പം ക്രിക്കറ്റില്‍; ദേവസ്വം ബെഞ്ചില്‍ 'അഴിമതിക്കാര്‍ക്ക്' വിശ്വാസം പോകുന്നു; സന്നിധാനത്തെ നെയ്യ് കച്ചവടവും തീര്‍ന്നു; ജസ്റ്റിസ് വി.രാജ വിജയരാഘവനും കെവി ജയകുമാറും 'അവതാരങ്ങള്‍ക്ക്' വെല്ലുവിളിയാകുമ്പോള്‍
കൊച്ചി: ഈ മണ്ഡല-മകര വിളക്ക് തീര്‍ത്ഥാടനം ശബരിമലയില്‍ ശുദ്ധീകരണ കാലം. ശബരിമലയില്‍ മേല്‍ശാന്തിമാരുടെ മുറിയില്‍ നടത്തുന്ന നെയ്യ് വില്‍പന തടഞ്ഞ് ഹൈക്കോടതി നല്‍കുന്നത് ഈ സൂചനയാണ്. ശബരിമലയിലെ ദ്വാരപാലക ശില്പങ്ങളുടെ സ്വര്‍ണ്ണപ്പാളി അറ്റകുറ്റപ്പണിക്ക് കൊണ്ടുപോകാന്‍ കോടതിയുടെ അനുമതി തേടിയിരുന്നെങ്കില്‍ ഇക്കണ്ട ക്രമക്കേടുകളൊന്നും പുറത്തു വരില്ലായിരുന്നു. എന്നാല്‍ കോടതിയെ അറിയിക്കാതെ നടത്തിയ പ്രവൃത്തി സ്പെഷല് കമ്മിഷണര്‍ ദേവസ്വം ബെഞ്ചിനെ അറിയിച്ചു. 1999 മുതലുള്ള രേഖകള്‍ ഉടന്‍ ഹാജരാക്കണമെന്ന ജസ്റ്റിസ് വി.രാജ വിജയരാഘവന്‍ അധ്യക്ഷനായ ദേവസ്വം ബെഞ്ചിന്റെ ഇടക്കാല ഉത്തരവ് കാര്യങ്ങള്‍ മാറിമറിച്ചു. ഇപ്പോള്‍ തന്ത്രമാരേയും മേല്‍ശാന്തിയേയും അലോസരപ്പെടുന്ന വിധിയും വരുന്നു.
കൊല്ലം ടി.കെ.എം എന്‍ജിനീയറിങ് കോളജില്‍ നിന്നും സിവില്‍ എന്‍ജിനീയറിങ് ബിരുദം നേടിയ രാജ വിജയരാഘവന്റെ നിയോഗം പക്ഷെ മറ്റൊന്നായിരുന്നു. കൊല്ലം ബാറിലെ പ്രശസ്ത ക്രിമിനല്‍ അഭിഭാഷകന്‍ വിജയരാഘവന്‍ വക്കീലിന്, മകനെയും തന്റെ വഴിയിലൂടെ നടത്താനായിരുന്നു ആഗ്രഹം. അച്ഛന്റെ ആഗ്രഹപ്രകാരം നിയമ ബിരുദം സ്വന്തമാക്കിയ രാജാ വിജയരാഘവന്‍ പ്രാക്ടീസ് തുടങ്ങിയത് കൊല്ലം കോടതിയില്‍ നിന്നുതന്നെ. ക്രിമിനല്‍ അഭിഭാഷകന്‍ എന്ന നിലയില്‍ പേരെടുത്ത ശേഷമാണ് പ്രാക്ടീസിനായി ഹൈക്കോടതിയിലേക്ക് എത്തുന്നത്. 2015 ല്‍ ഹൈക്കോടതിയിലെ അഡീഷണല്‍ ജഡ്ജിയായി ചുമതലയേറ്റു. 2017ല്‍ സ്ഥിരം ജഡ്ജിയായി.
പക്വമാര്‍ന്ന വിധിന്യായങ്ങള്‍ മാത്രമല്ല ജസ്റ്റിസ് രാജ വിജയരാഘവനെ ശ്രദ്ധേയനാക്കുന്നത്. കേരള ഹൈക്കോടതിയിലെ ഡിജിറ്റലൈസേഷന് ചുക്കാന്‍ പിടിച്ചത് രാജ വിജയരാഘവനാണ്. സുപ്രീംകോടതിയുടെ ഡിജിറ്റലൈസേഷന് സമിതിയില്‍ അംഗവുമാണ് അദ്ദേഹം. മികച്ച ക്രിക്കറ്റ് കളിക്കാരന്‍ കൂടിയായ രാജ വിജയരാഘവന്‍ സുപ്രീംകോടതി ക്രിക്കറ്റ് ടീമില്‍ അംഗമാണ്. ഈ തീര്‍ത്ഥാടനകാലത്ത് ദേവസ്വം ബഞ്ച് ഇനിയും സുപ്രധാന ഇടപെടല്‍ നടത്തുമെന്നതിന്റെ സൂചനയാണ് കഴിഞ്ഞ ദിവസത്തെ ഉത്തരവും. 2012 ഡിസംബര്‍ ഒന്നിനാണ് ജസ്റ്റീസ് കെ.വി വിജയകുമാര്‍ ജുഡീഷ്യല്‍ സര്‍വീസില്‍ പ്രവേശിച്ചത്. ഹൈക്കോടതി രജിസ്ട്രാര്‍ വിജിലന്‍സ് ആയും പ്രവര്‍ത്തിച്ചിട്ടുണ്ട്. 2024ല്‍ ഹൈക്കോടതി ജഡ്ജിയായ ജസ്റ്റീസ് കെ.വി വിജയകുമാറാണ് ദേവസ്വം ബെഞ്ചിലെ രണ്ടാമന്‍. ചാലക്കുടി സ്വദേശിയാണ്.
വില്‍പനയ്ക്ക് പായ്ക്ക് ചെയ്തുവെച്ച മുഴുവന്‍ നെയ്യും ദേവസ്വം ബോര്‍ഡിനെ തിരികെ ഏല്‍പിക്കണമെന്ന് കോടതി നിര്‍ദേശിച്ചു. തന്ത്രി, മേല്‍ശാന്തി, ഉള്‍ക്കഴകം എന്നിവരുടെ മുറികളില്‍ അഭിഷേകത്തിന് നെയ്യ് വാങ്ങുന്നത് കോടതി നിരോധിക്കുകയും ചെയ്തിട്ടുണ്ട്. വിവിഐപികളുടെ നെയ്യഭിഷേകാണ് ഇതിലൂടെ പ്രതിസന്ധിയിലാകുന്നത്. ശബരിമലയിലെ 'അവതാരങ്ങള്‍ക്ക്' ഇനി രക്ഷയില്ലാ കാലം. സ്വര്‍ണ്ണ പാളി കേസില്‍ അടക്കം കടുത്ത നിലപാട് ദേവസ്വം ബഞ്ച് ഏടുത്തേക്കും. അങ്ങനെ വന്നാല്‍ പല വമ്പന്മാരും ഇനിയും കുടുങ്ങും. ശബരിമലയില്‍ നെയ്യഭിഷേകത്തിന് ടിക്കറ്റ് എടുക്കേണ്ടതുണ്ട്. എന്നാല്‍, ഈ ടിക്കറ്റ് കൂടാതെ പലയിടത്തും ശാന്തിമാരും മറ്റും ഭക്തരില്‍നിന്ന് നെയ്യ് വാങ്ങി അഭിഷേകം ചെയ്ത് കൊടുക്കുന്നുണ്ട്. ഇതിനാണ് ഹൈക്കോടതി തടയിടുന്നത്. ആടിയതിന് ശേഷമുള്ള നെയ്യ് 100 രൂപയ്ക്ക് മേല്‍ശാന്തിമാരുടെയും മറ്റും മുറികളില്‍ വില്‍ക്കുന്നിനേക്കുറിച്ച് സ്പെഷല് കമ്മിഷണര്‍ ജയകൃഷ്ണന്‍ കോടതിയെ അറിയിച്ചത്.
ആടിയ നെയ്യുടെ വില്‍പന ദേവസ്വം ബോര്‍ഡ് നടത്തുന്നുണ്ട്. ഇതുകൂടാതെയാണ് മേല്‍ശാന്തിമാരുടെയും ഉള്‍ക്കഴകങ്ങളുടെയും മുറികളില്‍ നെയ്യ് വിറ്റുവന്നിരുന്നത്. ഇതിനെതിരേയാണ് കോടതിയുടെ നടപടി. ഇവരുടെ പക്കലുണ്ടായിരുന്ന പായ്ക്ക് ചെയ്ത മുഴുവന്‍ നെയ്യും തിരിച്ച് ദേവസ്വം ബോര്‍ഡിന് കൈമാറണമെന്ന് കോടതി നിര്‍ദേശിച്ചു. ഇതിലും കോടതി ഇടപെലുണ്ടായി. തന്ത്രി, മേല്‍ശാന്തി, ഉള്‍ക്കഴകം തുടങ്ങിയവരുടെ മുറികളിലും മറ്റും ഭക്തരില്‍നിന്ന് നെയ്യഭിഷേകത്തിന് നെയ്യ് വാങ്ങരുതെന്നും ഹൈക്കോടതിയുടെ ദേവസ്വം ബെഞ്ച് നിര്‍ദേശിച്ചു. ഇങ്ങനെ വാങ്ങുന്നത് നിരോധിച്ചിട്ടുണ്ട്. കൃത്യമായി ടിക്കറ്റ് എടുത്തതിന് ശേഷമേ നെയ്യ് അഭിഷേകം നടത്താന്‍ പാടുള്ളൂവെന്നും കോടതി പറഞ്ഞു.
ഇക്കഴിഞ്ഞ ഓഗസ്റ്റിലാണ് ഹൈക്കോടതി ദേവസ്വം ബെഞ്ചിന്റെ ചുമതലയിലേക്ക് ജസ്റ്റിസ് രാജാ വിജയരാഘവന്‍ എത്തുന്നത്. ഒരുമാസത്തിനിപ്പുറം, ശബരിമലയിലെ ദ്വാരപാലക ശില്പങ്ങളുടെ സ്വര്‍ണ്ണപ്പാളി കോടതിയുടെ അനുമതി ഇല്ലാതെ അറ്റകുറ്റപ്പണിക്ക് അയച്ച കാര്യം സ്‌പെഷ്യല്‍ കമ്മീഷണര്‍ അറിയിച്ചതോടെ ദേവസ്വം ബെഞ്ച് സ്വമേധയാ കേസെടുത്തു. ഈ കേസിലാണ് രേഖകള്‍ ഹാജരാക്കാന്‍ കോടതി ഉത്തരവിട്ടത്. രേഖകള്‍ പരിശോധിച്ച് കോടതി കണ്ടെത്തിയ കാര്യങ്ങളാണ് ഇന്ന് ദേവസ്വം ബോര്‍ഡിന്റെയും സര്‍ക്കാരിന്റെയും ഉറക്കം കെടുത്തുന്നത്.