വീട്ടില്‍ നില്‍ക്കുന്ന സഹോദരി ചെയ്തത് തെറ്റ് തന്നെ; അണ്ണാന്‍ കടിച്ചൊരു മാങ്ങയ്ക്കും മാങ്ങാണ്ടിക്കും 25,000 രൂപ പിഴ ചരിത്രത്തില്‍ ആദ്യമായിട്ടായിരിക്കും; കായലില്‍ ഇട്ടത് മാലിന്യമല്ല, മാങ്ങയാണെന്ന് തിരുത്തുകയാണ്; വേണമെങ്കില്‍ തെളിയിക്കാം; പിഴ അടച്ചതിന് പിന്നാലെ എം ജി ശ്രീകുമാര്‍

പിഴ അടച്ചതിന് പിന്നാലെ എം ജി ശ്രീകുമാര്‍

Update: 2025-04-03 14:57 GMT

കൊച്ചി: കൊച്ചി കായലിലേക്ക് മാലിന്യം വലിച്ചെറിഞ്ഞ സംഭവത്തില്‍ പിഴ അടച്ചതിന് പിന്നാലെ പ്രതികരണവുമായി എം.ജി ശ്രീകുമാര്‍ എറണാകുളം ജില്ലയിലെ മുളവുകാട് പഞ്ചായത്ത് അധികൃതര്‍ 25000 രൂപ പിഴ നോട്ടീസ് അയച്ചതിന് പിന്നാലെ ഗായകന്‍ പിഴയൊടുക്കുകയായിരുന്നു.

മുറ്റത്തുവീണ മാമ്പഴം ജോലിക്കാരിയാണ് കായലിലേക്ക് വലിച്ചെറിഞ്ഞതെന്നും ചെയ്തത് തെറ്റാണെന്നും അദ്ദേഹം ഒരു മാദ്ധ്യമത്തോട് പറഞ്ഞു.'ഇരുപത്തിയെട്ട്, ഇരുപത്തിയൊന്‍പത് തീയതികളില്‍ തിരുവനന്തപുരത്ത് എനിക്ക് റെക്കാര്‍ഡിംഗ് ഉണ്ടായിരുന്നു. അപ്പോള്‍ സിഎമ്മിന്റെ പ്രിന്‍സിപ്പല്‍ സെക്രട്ടറി എന്നെ വിളിച്ച്, വീട് ഇന്‍സ്പെക്ട് ചെയ്യണമെന്ന് പറഞ്ഞു. വീട് തുറന്നുകൊടുത്തു. ബോള്‍ഗാട്ടിയിലെ ആ വീട്ടില്‍ ഞാന്‍ പത്ത് ദിവസത്തില്‍ കൂടുതല്‍ ഉണ്ടാകാറില്ല. അവിടെ വലിയ മാലിന്യമൊന്നുമില്ല.അവിടെയൊരു മാവുണ്ട്. ആ മാവില്‍ നിന്ന് കുറേ മാങ്ങ വീഴും. അത് വെള്ളത്തിലോട്ടും വീടിന്റെ പരിസരത്തും വീഴും. മാലിന്യം ഒഴുക്കിയതിന് ഇരുപത്തയ്യായിരം പിഴയെന്ന് അവിടെ ആരോ പേപ്പറില്‍ എഴുതിവച്ചു. ഞാന്‍ തര്‍ക്കിച്ചില്ല. അണ്ണാന്‍ കടിച്ചൊരു മാങ്ങാണ്ടിയും മാങ്ങയും തറയില്‍ ചിതറിക്കിടന്നപ്പോള്‍ അവിടെയുണ്ടായിരുന്ന ജോലിക്കാരി അതെടുത്ത് വെള്ള പേപ്പറില്‍ പൊതിഞ്ഞ് വെള്ളത്തിലിട്ടു. തെറ്റാണ്. സത്യത്തില്‍ അവര്‍ അറിയാതെ ചെയ്തതാണ്. എന്റെ വീടായതിനാല്‍ എനിക്ക് അതിന് ഉത്തരവാദിത്തമുണ്ട്. അതുകൊണ്ട് പഞ്ചായത്ത് എനിക്ക് എഴുതിത്തന്ന ഇരുപത്തിയയ്യായിരം രൂപ ഞാന്‍ പിഴയായി അടച്ചു. മാലിന്യവിമുക്ത കേരളമെന്ന മുഖ്യമന്ത്രിയുടെ മുദ്രാവാക്യം എന്റെ മനസിലുണ്ട്. ഞാന്‍ ഒരുപാട് വിദേശരാജ്യങ്ങളില്‍ പോകാറുണ്ട്. ഞാന്‍ ഒരിക്കലും പേപ്പറൊന്നുമെടുത്ത് വലിച്ചെറിഞ്ഞിട്ടില്ല. എന്തായാലും മാങ്ങയ്ക്കും മാങ്ങാണ്ടിക്കും ഇരുപത്തിയയ്യായിരം രൂപ എന്ന് പറയുന്നത്, ചരിത്രത്തിലാദ്യമായിട്ടായിരിക്കും ഇങ്ങനെയൊരു പിഴ.

ഹരിത കര്‍മ സേനയിലുള്ളവരെ ഇതുവരെ ഞാന്‍ കണ്ടിട്ടില്ല. എടുത്തുകൊണ്ടുപോകാന്‍ പ്ലാസ്റ്റിക് മാലിന്യം ഒന്നുംതന്നെ ആ വീട്ടിലില്ല. ചെയ്തത് തെറ്റാണെന്ന് സമ്മതിക്കുന്നു. എന്റെ വീട്ടില്‍ നില്‍ക്കുന്ന സഹോദരി, വീണ മാലിന്യം പൊതിഞ്ഞ് വെള്ളത്തിലിട്ടത് തെറ്റാണ്. അത് മാലിന്യമല്ല, മാങ്ങയാണെന്ന് ഞാന്‍ തിരുത്തുകയാണ്. വേണമെങ്കില്‍ അത് തെളിയിക്കാനും ഞാന്‍ തയ്യാറാണ്. വീഡിയോയെടുത്ത സഹോദരന് ആ ഇരുപത്തിയയ്യായിരത്തിന്റെ പകുതി കിട്ടും.

ചെയ്തത് തെറ്റാണ് പക്ഷേ വെറുമൊരു മാങ്ങാണ്ടിക്ക് 25,000 ആകുമ്പോള്‍, ഇതുപോലെ എത്രയോ ആശുപത്രികളില്‍ നിന്നും പല സ്ഥാപനങ്ങളില്‍ നിന്നും ടണ്‍ കണക്കിന് മാലിന്യമാണ് കൊച്ചിയില്‍ ഒഴുകുന്നത്. അതൊന്നും അധികൃതര്‍ കാണുന്നില്ലേയെന്നൊരു ചോദ്യം എനിക്ക് ചോദിക്കേണ്ടിവരും. ഒരു മാങ്ങയ്ക്ക് ഞാന്‍ ഇരുപത്തിയയ്യായിരം പിഴയടച്ചു. എനിക്ക് സന്തോഷമേയുള്ളൂ. നമ്മുടെ കേരളം എന്നും ശുചിത്വ കേരളമായിരിക്കണം.'- അദ്ദേഹം പറഞ്ഞു.

എം ജി ശ്രീകുമാറിന്റെ മുളവുകാട് പഞ്ചായത്തിലുളള വീട്ടില്‍ നിന്നൊരു മാലിന്യപ്പൊതി വീഴുന്നത് മൊബൈല്‍ ഫോണില്‍ പകര്‍ത്തിയ വിനോദ സഞ്ചാരിയുടെ വീഡിയോ നേരത്തെ പുറത്തുവന്നിരുന്നു. ഇതിനുപിന്നാലെയാണ് പിഴയായി 25,000 രൂപ എം ജി ശ്രീകുമാറിന് അടക്കേണ്ടിവന്നത്

Tags:    

Similar News