ഓഹരി വിപണി തകര്‍ച്ചയുടെ വക്കിലോ? വര്‍ദ്ധിച്ചുവരുന്ന തൊഴിലില്ലായ്മ നിരക്ക് സൂചനയോ? ട്രംപ് ഭരണകൂടത്തിന്റെ പലനീക്കങ്ങളും സൃഷ്ടിക്കുന്നത് ഒട്ടേറെ ആശങ്കകള്‍; ജാഗ്രത പുലര്‍ത്തണമെന്ന് വിദഗ്ദര്‍
ന്യൂയോര്‍ക്ക്: ഓഹരി വിപണി തകര്‍ച്ച ആസന്നമായിരിക്കുന്നു എന്ന് സൂചന. പല വിദഗ്ധരും ഈ നിഗമനത്തോട് യോജിക്കുകയാണ്. എന്നാല്‍ ഇക്കാര്യം എപ്പോള്‍ സംഭവിക്കും എന്നാര്‍ക്കും നിശ്ചയമില്ല. കാരണം ലോകത്ത് വിപണികളില്‍ ദുരിതം വിതയ്ക്കാന്‍ സാധ്യതയുള്ള നിരവധി കാര്യങ്ങള്‍ നടക്കുന്നുണ്ട്. ട്രംപ് ഭരണകൂടത്തെയും യുഎസ് ഗവണ്‍മെന്റ് അടച്ചുപൂട്ടലിനെയും കുറിച്ചുള്ള ആശങ്കകള്‍ ഈ ദിശയിലേക്കാണ് വിരല്‍ ചൂണ്ടുന്നത്. കൂടാതെ ഈ മാസത്തെ ബജറ്റിനെക്കുറിച്ചും ആശങ്കകളുണ്ട്.
മിഡില്‍ ഈസ്റ്റില്‍ പിരിമുറുക്കങ്ങള്‍ നിലനില്‍ക്കുന്നു, സ്റ്റോക്ക് മാര്‍ക്കറ്റുകള്‍ - പ്രത്യേകിച്ച് എ.ഐ കമ്പനി ഓഹരികള്‍ - റെക്കോര്‍ഡ് ഉയരങ്ങളിലെത്തുന്നു, ഫ്രഞ്ച് ഗവണ്‍മെന്റിന്റെ പരാജയ സാധ്യതയും ആസന്നമാണ്. അതേസമയം, നിക്ഷേപകര്‍ ഇപ്പോഴും പണപ്പെരുപ്പം, പലിശ നിരക്ക് അനിശ്ചിതത്വം, ഇരുണ്ട സാമ്പത്തിക പ്രവചനങ്ങള്‍ എന്നിവയുമായി മല്ലിടുകയാണ്. വിപണി തകര്‍ച്ചയുടെ ആരംഭത്തെ സൂചിപ്പിക്കുന്ന ചില മുന്നറിയിപ്പ് സൂചനകള്‍ വിദഗ്ദ്ധര്‍ ശ്രദ്ധിക്കുന്നുണ്ട്. കഴിഞ്ഞ 50 വര്‍ഷത്തിനിടയില്‍ 30 വര്‍ഷത്തെ യുഎസ് ബോണ്ടുകള്‍ അഞ്ച് വര്‍ഷത്തെ ബോണ്ടുകളേക്കാള്‍ 1 ശതമാനം പോയിന്റ് കൂടുതല്‍ നല്‍കിയപ്പോഴെല്ലാം, മാന്ദ്യം ഉണ്ടായിട്ടുണ്ടെന്ന് നെഡ്ഗ്രൂപ്പ് ഇന്‍വെസ്റ്റ്‌മെന്റിലെ മേധാവി ഡേവിഡ് റോബര്‍ട്ട്സ് വിശദീകരിക്കുന്നു.
കഴിഞ്ഞ കുറച്ച് മാസങ്ങളായി ഇത് അങ്ങനെയാണ്, അദ്ദേഹം കുറിക്കുന്നു. എന്നാല്‍ പരിഭ്രാന്തരാകേണ്ട കാര്യവുമില്ല. സമ്പദ് വ്യവസ്ഥ ശക്തമായി തുടരുകയും തൊഴിലില്ലായ്മ വളരെ കുറയുകയും യുഎസ് സെന്‍ട്രല്‍ ബാങ്കായ ഫെഡറല്‍ റിസര്‍വ് പലിശ നിരക്കുകള്‍ കുറയ്ക്കുകയും ചെയ്യുന്നതിനാല്‍ സമീപഭാവിയില്‍ യുഎസ് മാന്ദ്യത്തിനുള്ള സാധ്യത ഇപ്പോഴും വിരളമാണ്. കമ്പനികള്‍ ബുദ്ധിമുട്ടുമ്പോള്‍, അവര്‍ ജീവനക്കാരെ പിരിച്ചുവിടുന്നു. വര്‍ദ്ധിച്ചുവരുന്ന തൊഴിലില്ലായ്മ നിരക്ക് രാജ്യത്തെ മാന്ദ്യത്തിലാണെന്നതിന്റെ ഒരു സാധാരണ സൂചനയാണ്.
'തൊഴിലില്ലായ്മ ക്ലെയിമുകള്‍ ഉയരാന്‍ തുടങ്ങുമ്പോള്‍, അത് പലപ്പോഴും തൊഴില്‍ വിപണിയിലെ സമ്മര്‍ദ്ദത്തിലേക്കും ഉപഭോക്താക്കളില്‍ നിന്നുള്ള കുറഞ്ഞ ഡിമാന്‍ഡിലേക്കും വിരല്‍ ചൂണ്ടുന്നു,' റോബര്‍ട്ട്സ് പറയുന്നു. സെപ്റ്റംബറില്‍ യുകെയില്‍ 1.69 ദശലക്ഷം തൊഴിലില്ലായ്മ ആനുകൂല്യങ്ങള്‍ക്കായി അപേക്ഷിക്കുന്നവര്‍ ഉണ്ടായിരുന്നു, കഴിഞ്ഞ മാസത്തേക്കാള്‍ 25,800 ന്റെ വര്‍ദ്ധനവ്. എന്നാല്‍ മുന്‍ മാന്ദ്യങ്ങളെ അപേക്ഷിച്ച് കണക്കുകള്‍ കൃത്യമായി ലഭിക്കാന്‍ പ്രയാസമാണ്.
കാരണം മഹാമാരിക്ക് ശേഷം ഡാറ്റ വളച്ചൊടിക്കപ്പെട്ടിരിക്കുന്നു. ഇന്ന്, തൊഴിലില്ലായ്മ ആനുകൂല്യങ്ങള്‍ക്കായി അപേക്ഷിക്കുന്നവരുടെ എണ്ണം ഒരു വര്‍ഷം മുമ്പുള്ളതിനേക്കാള്‍ 73,300 കുറവാണ്, പക്ഷേ കോവിഡ് ബാധിക്കുന്നതിന് മുമ്പുള്ളതിനേക്കാള്‍ 500,000 കൂടുതലാണ് എന്നാണ് പറയപ്പെടുന്നത്. യുകെയിലും യുഎസിലും തൊഴില്‍ വിപണി സ്തംഭനാവസ്ഥയിലാണെന്നും സൂചനയുണ്ട്. അത് കൊണ്ട് തന്നെ എല്ലാവരും് കുറച്ച് ജാഗ്രത പാലിക്കേണ്ടതുണ്ട് എന്നാണ് വിപണിയിലെ പ്രഗത്ഭര്‍ മുന്നറിയിപ്പ് നല്‍കുന്നത്.