നല്ല തെളിഞ്ഞ ആകാശത്ത് റൺവേ ലക്ഷ്യമാക്കിയെത്തിയ വിമാനം; ശക്തമായ കാറ്റിൽ ആടിയുലഞ്ഞ് താഴോട്ട്; ഒരു വശം മുഴുവൻ ചരിഞ്ഞ് ലാൻഡ് ചെയ്യാൻ ശ്രമിച്ചതും പൈലറ്റിന് നെഞ്ചിടിപ്പ്; അതെ വേഗതയിൽ വീണ്ടും കുതിച്ചുയർന്ന് ഖത്തർ എയർവെയ്‌സ്; പേടിപ്പെടുത്തുന്ന ദൃശ്യങ്ങൾ പുറത്ത്

അറ്റ്‌ലാന്റ: ശക്തമായ കാറ്റിൽ ആടിയുലഞ്ഞ ഖത്തർ എയർവേയ്‌സ് വിമാനം വൻ അപകടത്തിൽ നിന്ന് തലനാരിഴയ്ക്ക് രക്ഷപ്പെട്ടു. ഡിസംബർ 14-ന് അമേരിക്കയിലെ അറ്റ്‌ലാന്റ വിമാനത്താവളത്തിൽ ലാൻഡിംഗിന് ശ്രമിക്കുന്നതിനിടെയാണ് ക്യുആർ 755 വിമാനം അപകടകരമായ സാഹചര്യത്തിലായത്. പൈലറ്റിന്റെ സമയോചിതമായ 'ഗോ എറൗണ്ട്' തീരുമാനമാണ് വലിയൊരു ദുരന്തം ഒഴിവാക്കിയത്.

ഖത്തർ തലസ്ഥാനമായ ദോഹയിൽ നിന്ന് അറ്റ്‌ലാന്റയിലേക്ക് പറന്ന വിമാനം, റൺവേയിലേക്ക് ഇറങ്ങാൻ തയ്യാറെടുക്കുമ്പോഴാണ് ശക്തമായ കാറ്റ് ആഞ്ഞടിച്ചത്. ലാൻഡിംഗ് സുരക്ഷിതമല്ലെന്ന് മനസ്സിലാക്കിയ പൈലറ്റ്, അവസാന നിമിഷം വിമാനം വീണ്ടും ഉയർത്തുകയായിരുന്നു. വിമാനം പറന്നുയരുന്നതിനിടെ അതിന്റെ ടെയിൽ ഭാഗം റൺവേയിൽ ഉരസാതെ പോയത് ഇഞ്ചുകളുടെ മാത്രം വ്യത്യാസത്തിലാണെന്ന് ദൃശ്യങ്ങൾ വ്യക്തമാക്കുന്നു. ഈ സംഭവത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.

'ഗോ എറൗണ്ട്' എന്നത് വിമാനയാത്രയിലെ തികച്ചും സാധാരണമായ ഒരു സുരക്ഷാ മുൻകരുതലാണ്. ലാൻഡിംഗ് സുരക്ഷിതമല്ലെന്ന് പൈലറ്റിന് ബോധ്യപ്പെട്ടാൽ വിമാനം നിലത്തിറക്കാതെ വീണ്ടും പറന്നുയരുന്ന ഈ രീതി, സുരക്ഷിതമായ ലാൻഡിംഗിനായുള്ള ഒരു ശ്രമം മാത്രമാണ്, അല്ലാതെ ഇതൊരു അപകട സാധ്യതയല്ലെന്നും വിദഗ്ദ്ധർ ചൂണ്ടിക്കാട്ടുന്നു.

പൈലറ്റിന്റെ അതീവ ജാഗ്രതയും കൃത്യമായ ഇടപെടലുമാണ് നൂറുകണക്കിന് യാത്രക്കാരുടെ ജീവൻ രക്ഷിച്ചത്, ഇത് വിമാന സുരക്ഷയിലെ നിർണായകമായ നടപടികളുടെ പ്രാധാന്യം ഒരിക്കൽ കൂടി അടിവരയിടുന്നു.