കുറച്ച് മാസങ്ങളായി അവന്റെ സ്വഭാവത്തിൽ കാണുന്നത് അസാധാരണമായ മാറ്റം; ആരോടും മിണ്ടാതെ..എല്ലാത്തിൽ നിന്നും മാറി നിൽക്കും; പെട്ടെന്ന് ദേഷ്യം വരുന്ന പെരുമാറ്റം; പക്ഷെ ഇതെല്ലാം രഹസ്യമായി അന്വേഷിച്ചവർക്ക് ഞെട്ടൽ; ഫോൺ നിറച്ച് ദുരൂഹമായ സന്ദേശങ്ങൾ; രാജ്യത്തിന് തന്നെ ഭീഷണിയാകുന്ന രീതിയിൽ ഒരുപറ്റം കുട്ടികളുടെ സംഘം; അത് 'ചാര' പ്രവർത്തനമോ?

പത്താൻകോട്ട്: ഇന്ത്യയിൽ തീവ്രവാദ-ചാരപ്രവർത്തനങ്ങൾക്കായി പാക്കിസ്താൻ രഹസ്യാന്വേഷണ ഏജൻസിയായ ഐഎസ്‌ഐ കുട്ടികളെ ഉപയോഗിക്കുന്നതായി റിപ്പോർട്ട്. പതിനാലിനും പതിനേഴിനും ഇടയിൽ പ്രായമുള്ള നാൽപ്പതോളം പേരാണ് നിലവിൽ സുരക്ഷാസേനയുടെ നിരീക്ഷണത്തിലുള്ളത്. കഴിഞ്ഞയാഴ്ച ജമ്മു കശ്മീരിലെ സാംബ ജില്ലയിൽ 15 വയസ്സുകാരനെ പിടികൂടിയതോടെയാണ് കൗമാരക്കാരായ ചാരന്മാരുടെ ഈ ശൃംഖല കണ്ടെത്താനായത്.

നിരീക്ഷണത്തിലുള്ള കുട്ടികളിൽ 12 പേർ പഞ്ചാബിൽനിന്നും ഹരിയാണയിൽ നിന്നുമുള്ളവരും 25 പേർ ജമ്മു കശ്മീരിൽ നിന്നുമുള്ളവരാണ്. ഐഎസ്‌ഐയാണ് ഇവരെ കെണിയിൽ വീഴ്ത്തിയതെന്ന് അധികൃതർ പറയുന്നു. സംശയാസ്പദമായ ആപ്പുകൾ ഉപയോഗിക്കാൻ പ്രേരിപ്പിച്ചാണ് പല കുട്ടികളെയും ചാരപ്രവർത്തനങ്ങളിലേക്ക് ആകർഷിച്ചതെന്ന് അന്വേഷണ ഉദ്യോഗസ്ഥർ കണ്ടെത്തി.

സാംബയിൽ പിടിയിലായ 15 വയസ്സുകാരൻ പാകിസ്താനിൽ നിന്നുള്ള ഏജൻസികളുമായി നിരന്തരം ബന്ധം പുലർത്തിയിരുന്നതായി രഹസ്യാന്വേഷണ വിഭാഗം അറിയിച്ചു. കുട്ടിയുടെ ഫോൺ പരിശോധിച്ച അന്വേഷണ സംഘം ഞെട്ടിക്കുന്ന വിവരങ്ങളാണ് കണ്ടെത്തിയത്. തീവ്രവാദ ഗ്രൂപ്പുകളുടെ മുന്നണി സംഘടനകളുമായും ഐഎസ്‌ഐയുമായി ബന്ധമുള്ള ഏജൻസികളുമായും കുട്ടിക്ക് ബന്ധമുണ്ടായിരുന്നതായി പത്താൻകോട്ടിലെ സീനിയർ സൂപ്രണ്ട് ഓഫ് പോലീസ് ദൽജിന്ദർ സിങ് ധില്ലൻ സ്ഥിരീകരിച്ചു.

"പാക്കിസ്താനെ അടിസ്ഥാനമാക്കിയുള്ള ഏജൻസികളാണ് കുട്ടിയെ കെണിയിൽ വീഴ്ത്തിയത്. അവരുടെ നിർദ്ദേശപ്രകാരം ഇന്ത്യൻ സൈന്യത്തിന്റെ സുപ്രധാന സ്ഥലങ്ങൾ കുട്ടി ചിത്രീകരിച്ചിട്ടുണ്ട്," ദൽജിന്ദർ സിങ് ധില്ലൻ വ്യക്തമാക്കി. കുട്ടിയുടെ പ്രവർത്തനങ്ങൾ തത്സമയം നിരീക്ഷിക്കുന്നതിനായി ചാരശൃംഖല ഫോൺ ക്ലോൺ ചെയ്യുകയും ചെയ്തിരുന്നു.

ഇന്ത്യൻ സുരക്ഷാ പ്രതിരോധ സംവിധാനങ്ങൾ ചിത്രീകരിക്കാനും സുരക്ഷാ വാഹനങ്ങളുടെ നീക്കം സംബന്ധിച്ച വിവരങ്ങൾ കൈമാറാനും തീവ്രവാദ ഗ്രൂപ്പുകൾക്കുള്ള പ്രവർത്തനങ്ങളിൽ സഹായിക്കാനും ഈ കുട്ടികളെ ഐഎസ്‌ഐ ഉപയോഗിക്കുന്നതായി പോലീസ് അറിയിച്ചു.

ഡോക്ടർമാരുടെ തീവ്രവാദ ശൃംഖല പുറത്തുവന്നതിനു പിന്നാലെയാണ് കുട്ടികളെ ഉപയോഗിച്ചുള്ള ഐഎസ്‌ഐയുടെ ഈ പുതിയ തന്ത്രവും വെളിച്ചത്തുവരുന്നത്. ഇന്ത്യൻ സുരക്ഷയ്ക്ക് ഭീഷണിയായി ഐഎസ്‌ഐയുടെ പുതിയ തന്ത്രങ്ങൾ വളർന്നുവരുന്നു എന്നതിന്റെ ഗൗരവകരമായ സൂചനയാണ് ഈ കൗമാര ചാരശൃംഖലയുടെ കണ്ടെത്തൽ.