ധരിക്കാൻ നല്ല വസ്ത്രം പോലുമില്ല; ചിലർ എന്നെ ഉപദ്രവിക്കുന്നു; ഇനി എന്ത്..ചെയ്യണമെന്ന് എനിക്കറിയില്ല..!! ഗുരുനാനാക്ക് ദേവനെ തൊഴാൻ പാക്കിസ്ഥാനിലെത്തിയ യുവതി; പിന്നീട് എവിടെ പോയെന്ന് ഒരു വിവരവുമില്ല; പാക്ക് മണ്ണിൽ തന്നെ ഒരാളെ കല്യാണം കഴിച്ച് ജീവിക്കുന്നുവെന്ന വാർത്തകളും; ആ ഇന്ത്യൻ വനിതയുടേതെന്ന പേരിൽ പ്രചരിക്കുന്ന ശബ്ദസന്ദേശം പുറത്ത്; അതിർത്തി കടന്ന കൗർ എവിടെ?

ഡൽഹി: കഴിഞ്ഞ വർഷം പാകിസ്ഥാനിലെത്തിയ ഇന്ത്യൻ യുവതി സരബ്ജീത് കൗർ അവിടെ ദുരിതത്തിലാണെന്നും ഇന്ത്യയിലേക്ക് മടങ്ങാൻ സഹായം തേടുന്നതായും പറയുന്ന ഒരു ഓഡിയോ ക്ലിപ്പ് സമൂഹമാധ്യമങ്ങളിൽ വലിയ ചർച്ചയായി. താൻ ഒട്ടും സുരക്ഷിതയല്ലെന്നും മക്കളുടെ അടുത്തേക്ക് തിരികെ പോകണമെന്നും യുവതി കരഞ്ഞുകൊണ്ട് പറയുന്നതാണ് ഓഡിയോയിലുള്ളത്.

കഴിഞ്ഞ വർഷം നവംബർ നാലിന് ഗുരുനാനാക്ക് ദേവ് ജിയുടെ പ്രകാശ് ഗുർപുരബിനോടനുബന്ധിച്ച് സിഖ് തീർത്ഥാടന സംഘത്തിനൊപ്പമാണ് സരബ്ജീത് കൗർ പാകിസ്ഥാനിലെത്തിയത്. നവംബർ 13-ന് മടങ്ങേണ്ടിയിരുന്ന ഇവരെ പിന്നീട് കാണാതാവുകയായിരുന്നു. തുടർന്ന്, സരബ്ജീത് കൗർ ഇസ്ലാം മതം സ്വീകരിച്ച് 'നൂർ ഹുസൈൻ' എന്ന പേര് സ്വീകരിക്കുകയും ഷെയ്ഖുപുര സ്വദേശിയായ നസീർ ഹുസൈനെ വിവാഹം കഴിക്കുകയും ചെയ്തതായി പാകിസ്ഥാനിൽ നിന്ന് റിപ്പോർട്ടുകളും വീഡിയോകളും പുറത്തുവന്നിരുന്നു.

ഇന്ത്യയിലുള്ള തന്റെ ഭർത്താവുമായി യുവതി സംസാരിക്കുന്നതെന്ന് കരുതപ്പെടുന്ന ഓഡിയോ ക്ലിപ്പ് ‘ഇന്ത്യ ടുഡെ’ ആണ് പുറത്തുവിട്ടത്. "ഞാൻ ഇവിടെ വലിയ ദുരിതത്തിലാണ്. എനിക്ക് എന്റെ മക്കളുടെ അടുത്തേക്ക് മടങ്ങണം. ഓരോ പൈസയ്ക്കും വേണ്ടി ഞാൻ ഇവിടെ കഷ്ടപ്പെടുകയാണ്," ഓഡിയോ ക്ലിപ്പിൽ പറയുന്നു.

തനിക്ക് വലിയ തെറ്റ് പറ്റിയെന്നും ധരിക്കാൻ പോലും നല്ല വസ്ത്രങ്ങളില്ലെന്നും യുവതി പരാതിപ്പെടുന്നുണ്ട്. തന്നെ ചിലർ ഉപദ്രവിക്കുന്നുണ്ടെന്ന് അവർ ആരോപിക്കുന്നുണ്ടെങ്കിലും അത് ആരാണെന്ന് വ്യക്തമാക്കുന്നില്ല. നങ്കാന സാഹിബ് ഗുരുദ്വാരയിലെ അധികൃതരെ സമീപിച്ച് സഹായം തേടാൻ ഭർത്താവ് സരബ്ജീത് കൗറിനോട് നിർദ്ദേശിച്ചിട്ടുണ്ട്.

നിലവിൽ, വിസ കാലാവധി കഴിഞ്ഞ സരബ്ജീത് കൗർ പാകിസ്ഥാനിൽ നിയമവിരുദ്ധമായി തുടരുകയാണെന്നാണ് റിപ്പോർട്ടുകൾ. കഴിഞ്ഞ ജനുവരി ആറിന് സരബ്ജീത്തിനെ വാഗ അതിർത്തി വഴി ഇന്ത്യയിലേക്ക് നാടുകടത്താൻ പാകിസ്ഥാൻ അധികൃതർ തീരുമാനിച്ചിരുന്നു. എന്നാൽ, വ്യക്തമായ കാരണങ്ങൾ വ്യക്തമാക്കാതെ അവസാന നിമിഷം ഈ നടപടി നിർത്തിവെച്ചു.

രേഖകളിലെ പ്രശ്നങ്ങളാണ് ഇതിന് കാരണമായി പറയപ്പെടുന്നത്. പുറത്തുവന്ന ഓഡിയോ ക്ലിപ്പിന്റെ ആധികാരികത ഇതുവരെ ഔദ്യോഗികമായി സ്ഥിരീകരിച്ചിട്ടില്ല. ഈ വിഷയത്തിൽ പാകിസ്ഥാൻ അധികൃതരോ ഇന്ത്യൻ വിദേശകാര്യ മന്ത്രാലയമോ ഇതുവരെ പരസ്യമായ പ്രതികരണങ്ങൾ നടത്തിയിട്ടില്ല. സരബ്ജീത് കൗറിന്റെ വിഷയത്തിൽ ഔദ്യോഗിക പ്രതികരണങ്ങൾക്കായി ഉറ്റുനോക്കുകയാണ് അധികൃതർ.