'ഞാന് ഗര്ഭിണിയായിരിക്കെ അവന് വേറെ ബന്ധത്തിന് പോയി, ചിത്രങ്ങള് കിട്ടി; നിര്ബന്ധിച്ച് ഗര്ഭഛിദ്രത്തിന് വിധേയയാക്കി; അയാള് ഒരു കൊലപാതകിയാണ്; തെളിയിക്കുന്ന ഒരു വീഡിയോ എന്റെ പക്കലുണ്ട്'; രണ്ടാമതും വിവാഹംകഴിച്ച മുന് പാക്ക് താരത്തിനെതിരെ തുറന്നടിച്ച് മുന്ഭാര്യ
കറാച്ചി: പാക്കിസ്ഥാന് ക്രിക്കറ്റ് താരം ഇമാദ് വസീമിനെതിരെ ഗുരുതര ആരോപണങ്ങളുമായി മുന് ഭാര്യ സാനിയ അഷ്ഫാഖ് വീണ്ടും രംഗത്ത്. തന്നേയും മൂന്ന് കുട്ടികളേയും ഉപേക്ഷിച്ച് ഇമാദ് രണ്ടാമത്തെ വിവാഹം കഴിച്ചതോടെയാണ് സാനിയ ആരോപണങ്ങളുമായി വീണ്ടും രംഗത്ത് വന്നത്. താന് മൂന്നാമത്തെ കുഞ്ഞിനെ ഗര്ഭം ധരിച്ചിരുന്ന സമയത്ത് ഇമാദ് തന്നെ ചതിക്കുകയായിരുന്നുവെന്ന് സാനിയ ആരോപിച്ചു.
ഇമാദ് കുടുംബം തകര്ത്തുവെന്നും തന്നെ നിര്ബന്ധിച്ച് ഗര്ഭഛിദ്രം ചെയ്യിച്ചുവെന്നും സാനിയ ആരോപിച്ചു. ഈ മാസമാണ്, ഇമാദ് വസീം അഭിഭാഷകയും സോഷ്യല് മീഡിയ ഇന്ഫ്ളുവന്സറുമായ നൈല രാജയെ വിവാഹം കഴിച്ചത്.
നൈലയുമായുള്ള ബന്ധം ഭാര്യ അറിഞ്ഞതോടെയാണ് ഇമാദിന്റെ ദാമ്പത്യ ബന്ധം തകര്ന്നത്. ഇമാദ് വസീം - സാനിയ അഷ്ഫാഖ് ദമ്പതികള്ക്ക് മൂന്ന് കുട്ടികളാണുള്ളത്. ഇതില് മൂന്നാമത്തെ കുട്ടിയെ ഗര്ഭിണിയായിരിക്കുമ്പോള് ഭര്ത്താവ് തന്നെ ചതിച്ച് മറ്റൊരു സ്ത്രീക്കൊപ്പം പോയി എന്നാണ് സാനിയയുടെ ആരോപണം. ലണ്ടനില് ഇമാദും നൈലയും ഒരുമിച്ചുള്ള ചിത്രങ്ങള് സാനിയക്ക് ലഭിച്ചിരുന്നു. ഇതിന് പിന്നാലെയാണ് ദാമ്പത്യ ബന്ധത്തില് ഉലച്ചിലുണ്ടായത്. അധികം വൈകാതെ ഇരുവരും വിവാഹബന്ധം വേര്പ്പെടുത്തുകയും ചെയ്തു.
സാനിയയുമായി ബന്ധം പിരിഞ്ഞ് മാസങ്ങള്ക്കുള്ളില് നൈലയെ ഇമാദ് വിവാഹം ചെയ്തു. 2019ലായിരുന്നു ഇമാദും സാനിയയും തമ്മിലുള്ള വിവാഹം. വിവാഹിതനായിരിക്കെ 2025 ജൂലായില് ലണ്ടനില് ഇമാദും നൈലയും ഒന്നിച്ചുള്ള ചിത്രങ്ങള് പുറത്തുവന്നതോടെയാണ് ഇരുവരും അടുപ്പത്തിലാണെന്ന റിപ്പോര്ട്ടുകള് വന്നത്. സാനിയ മൂന്നാമത്തെ കുട്ടിയ ഗര്ഭിണിയായിരിക്കുന്ന സമയത്തായിരുന്നു ഇത്.
ഇമാദിനെ വഞ്ചകനെന്നും കുടുംബം തകര്ത്തയാളെന്നും കൊലപാതകിയെന്നും വിളിച്ച് നിരവധി പോസ്റ്റുകള് ഇന്സ്റ്റാഗ്രാമില് സാനിയ പങ്കുവെച്ചിട്ടുണ്ട്.ഇമാദിന്റെ പ്രവൃത്തികള് കാരണം താനും കുട്ടികളും അനുഭവിച്ച കഷ്ടപ്പാടുകള്ക്ക് അയാള് ഉത്തരവാദിത്വം ഏറ്റെടുക്കണമെന്നും സാനിയ ആവശ്യപ്പെട്ടു. പാകിസ്ഥാന് സൂപ്പര് ലീഗിന്റെ പുതിയ സീസണില് ഇമാദിനെ ടീമിലെടുത്ത ഇസ്ലാമാബാദ് യുണൈറ്റഡിനെയും സാനിയ കടുത്ത ഭാഷയില് വിമര്ശിക്കുന്നുണ്ട്.
'2023 ഡിസംബറില്, ലാഹോറില്വെച്ച് അയാള് എന്നെ നിര്ബന്ധിച്ച് ഗര്ഭഛിദ്രത്തിന് വിധേയയാക്കി. അയാള് ഒരു കൊലപാതകിയാണ്, അത് തെളിയിക്കുന്ന ഒരു വീഡിയോ എന്റെ പക്കലുണ്ട്. അയാള് എന്നെ വഞ്ചിച്ചു. ഇസ്ലാമാബാദ് യുണൈറ്റഡ് ഒരു കൊലപാതകിക്കും വഞ്ചകനും അവസരം നല്കി', സാനിയ കുറിച്ചു.
അതേസമയം, ആരോപണങ്ങള് ഉയര്ന്ന സാഹചര്യത്തില് ഇമാദ് വസീം വിശദീകരണവുമായി രംഗത്തെത്തി. തന്റെ ആദ്യ വിവാഹജീവിതം ഏറ്റവും പ്രയാസകരമായ അധ്യായമായിരുന്നുവെന്ന് അദ്ദേഹം പറഞ്ഞു. ആ ബന്ധം മുന്നോട്ട് കൊണ്ടുപോകാന് ശ്രമിച്ചതില് തനിക്ക് ഖേദമുണ്ടെന്നും തന്റെ മൗനം ഒരു നിരപരാധി (നൈല രാജ) തെറ്റായി വിധിക്കപ്പെടാന് കാരണമായെന്നും അദ്ദേഹം പ്രസ്താവനയില് വ്യക്തമാക്കി. അല്ലാഹുവിന്റെ അനുഗ്രഹത്തോടെ താന് ഇപ്പോള് നൈലയെ വിവാഹം കഴിച്ചതായും അദ്ദേഹം അറിയിച്ചു. പാക്കിസ്ഥാന് ദേശീയ ടീമിനായി അഞ്ച് ഏകദിനങ്ങളിലും 75 ടി20 മത്സരങ്ങളിലും ഇമാദ് വസീം കളിച്ചിട്ടുണ്ട്. വിവാഹമോചനത്തിന് പിന്നാലെ ഈ വര്ഷം ഫെബ്രുവരിയിലാണ് താരം നൈല രാജയെ വിവാഹം കഴിച്ചത്.