ദിവ്യയുടെ ഭര്‍ത്താവ് പി ശശിയുടെ ബിനാമി; നിലം നികത്തല്‍ നടത്താന്‍ അനുവദിക്കാതിരുന്നപ്പോള്‍ അപമാനിച്ചു കീഴ്പ്പെടുത്താന്‍ നോക്കി; പ്രതിപക്ഷം സര്‍ക്കാരിന് കുട പിടിക്കുന്നു; നവീന്‍ബാബുവിന്റെ വീട്ടിലെത്തിയ പി.വി. അന്‍വര്‍ പറഞ്ഞതിങ്ങനെ
പത്തനംതിട്ട: പി.പി. ദിവ്യയുടെ ഭര്‍ത്താവ് മുഖ്യമന്ത്രിയുടെ പൊളിറ്റിക്കല്‍ സെക്രട്ടറി പി. ശശിയുടെ ബിനാമിയാണെന്ന് പി.വി. അന്‍വര്‍ എംഎല്‍.എ. മലയാലപ്പുഴയില്‍ നവീന്‍ബാബുവിന്റെ കുടുംബാംഗങ്ങളെ സന്ദര്‍ശിച്ച ശേഷം മാധ്യമപ്രവര്‍ത്തകരോടു സംസാരിക്കുകയായിരുന്നു അദ്ദേഹം.
ഭൂമി മണ്ണിട്ടു നികത്തുന്നതിനടക്കം പി. ശശിയുടെ സമ്മര്‍ദം എ.ഡി.എമ്മിനുണ്ടായിരുന്നു. വഴങ്ങാതെ വന്നപ്പോള്‍ അപമാനിച്ചു കീഴ്പെടുത്താന്‍ നോക്കി. ഇതിനാണ് ദിവ്യയെ നിയോഗിച്ചതെന്നും അന്‍വര്‍ പറഞ്ഞു. കൃത്യമായി അന്വേഷിച്ചാല്‍ മുഖ്യമന്ത്രിയുടെ ഓഫീസ് വരെ കാര്യങ്ങള്‍ എത്തും. ഇത് അറിയാവുന്നവരാണ് ഉരുണ്ടുകളി നടത്തുന്നത്. നവീന്റെ മരണവുമായി ബന്ധപ്പെട്ട് കുടുംബത്തിന് ഒട്ടേറെ സംശയങ്ങളുണ്ടെന്നാണ് മനസിലാക്കുന്നത്. അവരുടെ നിയമപോരാട്ടത്തിന് എല്ലാ പിന്തുണയും ഉണ്ടാകും. വേണ്ടിവന്നാല്‍ കേസില്‍ കക്ഷി ചേരാനും തയാറാകുമെന്നും അന്‍വര്‍ പറഞ്ഞു.
ഈ കേസിലും പ്രതിപക്ഷം സര്‍ക്കാരിനു കുട പിടിക്കുകയാണ്. ഒരു സമരം, ഒരു കല്ലേറ് ഇതു കഴിഞ്ഞാല്‍ എല്ലാം അവസാനിക്കുകയാണ്. ഇതിനെയാണ് പൊളിറ്റിക്കല്‍ നെക്സസ് എന്നു വിളിക്കുന്നത്. ഇവര്‍ പലരും ഭായി - ഭായി ബന്ധത്തിലാണ്. എല്ലാ പാര്‍ട്ടികളുടെയും ഉന്നത നേതാക്കള്‍ ഒരു അമ്മ പെറ്റ മക്കളെപ്പോലെയാണെന്നും അന്‍വര്‍ കുറ്റപ്പെടുത്തി. കേസുകളെല്ലാം കൃത്യമായി അന്വേഷിച്ചാല്‍ പൊളിറ്റിക്കല്‍ സെക്രട്ടറിയിലേക്കും അതുവഴി മുഖ്യമന്ത്രിയുടെ ഓഫീസിലേക്കും എത്തുമെന്ന് അന്‍വര്‍ പറഞ്ഞു.