രാഹുല് മാങ്കൂട്ടത്തില് എംഎല്എക്കെതിരെ നടപടി സ്വീകരിക്കണം; മുഖ്യമന്ത്രിക്കും ഡിജിപിക്കും പരാതി നല്കിയിട്ടും മറുപടി ഉണ്ടായില്ല; ഇത് എന്റെ മാത്രം പ്രശ്നം അല്ല; പുറത്ത് പറഞ്ഞാല് തലയില് മുണ്ടിട്ട് നടക്കേണ്ടി വരും എന്ന് കരുതുന്ന ഒരുപാട് പേരുണ്ട്; തനിക്ക് നീതി കിട്ടണമെന്ന് അതിജീവിതയുടെ ഭര്ത്താവ്
രാഹുല് മാങ്കൂട്ടത്തില് എംഎല്എക്കെതിരെ നടപടി സ്വീകരിക്കണം; മുഖ്യമന്ത്രിക്കും ഡിജിപിക്കും പരാതി നല്കിയിട്ടും മറുപടി ഉണ്ടായില്ല; ഇത് എന്റെ മാത്രം പ്രശ്നം അല്ല; പുറത്ത് പറഞ്ഞാല് തലയില് മുണ്ടിട്ട് നടക്കേണ്ടി വരും എന്ന് കരുതുന്ന ഒരുപാട് പേരുണ്ട്; തനിക്ക് നീതി കിട്ടണമെന്ന് അതിജീവിതയുടെ ഭര്ത്താവ്
കൊച്ചി: രാഹുല് മാങ്കൂട്ടത്തില് എംഎല്എക്കെതിരെ നടപടി സ്വീകരിക്കണമെന്ന് ആവശ്യപ്പെട്ട് പരാതിക്കാരിയുടെ ഭര്ത്താവ്. കഴിഞ്ഞ വെള്ളിയാഴ്ചയാണ് മുഖ്യമന്ത്രിക്കും ഡിജിപിക്കും പരാതി നല്കിയത്. പരാതിയില് ഇതുവരെ മറുപടി ലഭിച്ചിട്ടില്ല. ഇത് എന്തുകൊണ്ടാണെന്ന് വ്യക്തമാക്കണമെന്നും അതിജീവിതയുടെ ഭര്ത്താവ് മാധ്യമങ്ങളോട് പറഞ്ഞു.
നിയമസഭയിലെ ഒരു അംഗത്തിനെതിരെയാണ് പരാതി നല്കിയത്. ജയിച്ചു വന്ന ഒരു എംഎല്എയാണ് ഇത്തരത്തില് ഒരു അന്തസ് ഇല്ലാത്ത പ്രവൃത്തി ചെയ്തത്. അദ്ദേഹം ഇപ്പോഴും പാലക്കാട് വിലസുകയാണ്. ഇത് എന്റെ മാത്രം പ്രശ്നം അല്ല. പുറത്ത് പറഞ്ഞാല് തലയില് മുണ്ടിട്ട് നടക്കേണ്ടി വരും എന്ന് കരുതുന്ന ഒരുപാട് പേരുണ്ട്. അവര്ക്ക് വേണ്ടിയും കൂടിയാണ് ഞാന് ശബ്ദിക്കുന്നതെന്നും യുവാവ് പറഞ്ഞു.
എന്റെ പരാതി കേള്ക്കാന് മുഖ്യമന്ത്രിയും പൊലീസ് മേധാവിയും തയ്യാറാകണം. എനിക്കും എന്റെ ഭാര്യക്കും ഇടയിലെ പ്രശ്നം പരിഹരിക്കാന് വന്നു എന്നാണ് രാഹുല് കോടതിയില് പറഞ്ഞത്. അങ്ങനെ എങ്കില് എന്നെ കൂടി വിളിച്ചിരുത്തി സംസാരിക്കുകയല്ലേ വേണ്ടതെന്നും എന്ത് സന്ദേശമാണ് ഈ എംഎല്എ നല്കുന്നതെന്നും പരാതിക്കാരിയുടെ ഭര്ത്താവ് ചോദിച്ചു. രാഹുല് മാങ്കൂട്ടത്തില് തന്റെ കുടുംബം ജീവിതം തകര്ത്തെന്ന് ചൂണ്ടികാട്ടിയാണ് അതിജീവിതയുടെ ഭര്ത്താവ് മുഖ്യമന്ത്രിക്കും ഡിജിപിക്കും പരാതി നല്കിയത്. രാഹുലിനെതിരെ ബിഎന്എസ് 84 പ്രകാരം കേസെടുക്കണമെന്നാണ് പരാതിയിലെ ആവശ്യം.
നിയമസഭാ തെരഞ്ഞെടുപ്പില് രാഹുല് മാങ്കൂട്ടത്തില് പാലക്കാട് വീണ്ടും മത്സരിക്കുമോയെന്ന ചര്ച്ചകള് സജീവമായിരിക്കെയാണ് എംഎല്എക്കെതിരെ പരാതിക്കാരിയുടെ ഭര്ത്താവ് രംഗത്ത് വന്നത്. വിവാഹിതയാണെന്നറിഞ്ഞിട്ടും രാഹുല് തന്റെ ഭാര്യയുമായി വഴിവിട്ട ബന്ധം സ്ഥാപിച്ചെന്നാണ് പരാതിയില് പറയുന്നത്. തനിക്ക് വലിയ മാനനഷ്ടം ഉണ്ടാകുകയും കുടുംബ ജീവിതം തകര്ക്കുകയും ചെയ്തു. മാതാപിതാക്കളുടെ ഏക മകനായ താന് നാട്ടിലാണ് താമസിച്ചിരുന്നത്.
ഭാര്യ ജോലിയുടെ ഭാഗമായി ഒറ്റയ്ക്കായിരുന്നു താമസം. തന്റെ അസാന്നിധ്യം അവസരമാക്കി രാഹുല് പരാതിക്കാരിയെ വശീകരിച്ചുവെന്നുമാണ് പരാതിയിലുള്ളത്. ഭര്ത്താവുമായുള്ള ബന്ധം വഷളായ സമയത്താണ് യുവതിയെ പരിചയപ്പെട്ടതെന്നും പ്രശ്നം പരിഹരിക്കാന് ഇടപെടുകയാണ് ചെയ്തതെന്നുമായിരുന്നു രാഹുല് മാങ്കൂട്ടത്തിലിന്റെ വാദം.