രാഹുല്‍ മാങ്കൂട്ടത്തില്‍ കേസിലെ ഇരയുടെ ഐഡന്റിറ്റി വെളിപ്പെടുത്തും വിധം പ്രസ്താവനയുമായി ഡിവൈഎഫ്‌ഐ നേതാവ്; മൈക്കു കെട്ടി പ്രസംഗിക്കുന്ന വീഡിയോ അടക്കം തെളിവുകള്‍; ഒരു പരാതി സ്വന്തം നേതാവിന് നേരെയും കൊടുത്തേക്കെന്ന് ഡിഫിക്കാരോട് കോണ്‍ഗ്രസ് നേതാവ് സന്ദീപ് വാര്യര്‍
രാഹുല്‍ മാങ്കൂട്ടത്തില്‍ കേസിലെ ഇരയുടെ ഐഡന്റിറ്റി വെളിപ്പെടുത്തും വിധം പ്രസ്താവനയുമായി ഡിവൈഎഫ്‌ഐ നേതാവ്
തിരുവനന്തപുരം: രാഹുല്‍ മാങ്കൂട്ടത്തിലിനെതിരെ ബലാത്സംഗ പരാതി നല്‍കിയ പെണ്‍കുട്ടിയുടെ ഐഡന്റിന്റി വെളിപ്പെടുത്തുന്ന വിധത്തില്‍ സോഷ്യല്‍ മീഡിയയില്‍ പോസ്റ്റുകളും മറ്റും ഇട്ടതിനെതിരെ പരാതിയുമായി രംഗത്തുവന്നത് ഡിവൈഎഫ്‌ഐയാണ്. യുവതിയുടെ ഐഡന്റിറ്റി വെളിപ്പെടുത്തിയെന്ന പേരില്‍ കോണ്‍ഗ്രസ് നേതാവ് സന്ദീപ് വാര്യര്‍ക്കെതിരെയായിരുന്നു യുവജന സംഘടനയുടെ പരാതി. എന്നാല്‍ ഈ പരാതിയുമായി രംഗത്തിറങ്ങിയ ഡിവൈഎഫ്‌ഐക്ക് തന്നെ തിരിച്ചടിയായി കൂട്ടത്തിലുള്ള ഡിവൈഎഫ്‌ഐ നേതാവിന്റെ പ്രസംഗവും സോഷ്യല്‍ മീഡിയ പോസ്റ്റും.
ഇരയുടെ ഐഡന്റിന്റി വെളിപ്പെടുത്തുന്ന വിധത്തിലാണ് ഡിവൈഎഫ്‌ഐയുടെ ഒരു ബ്ലോക്ക് പ്രസിഡന്റ് ഈ വിഷയത്തില്‍ പ്രിതകരണം നടത്തിയത്. ബിജെപിയെ വിമര്‍ശിച്ചു കൊണ്ടുള്ള പ്രസംഗം പക്ഷേ, ഇരയുടെ ഐഡന്റിന്റി വെളിപ്പെടുത്തുന്ന വിധത്തിലായിരുന്നു. ഇക്കാര്യം ചൂണ്ടിക്കാട്ടി സന്ദീപ് വാര്യര്‍ ഫേസ്ബുക്കിലൂടെ രംഗത്തുവന്നു.
ഇരയുടെ ഐഡന്റിറ്റി ആദ്യമായും അവസാനമായും വെളിപ്പെടുത്തിയ സംഘടനയുടെ പേരാണ് ഡിവൈഎഫ്‌ഐ എന്നാണ് സന്ദീപ് വാര്യര്‍ ഫേസ്ബുക്കില്‍ കുറിച്ചത്. ഡിവൈഎഫ്‌ഐ ബ്ലോക്ക് പ്രസിഡണ്ട് ഇരയുടെ ഐഡന്റിറ്റി വെളിപ്പെടുത്തുന്ന രീതിയില്‍ ഇരയെ വിവാഹം ചെയ്തു കൊണ്ടുവന്ന വീടിനു പരിസരത്ത് മൈക്ക് കെട്ടി പ്രസംഗിക്കുന്നതിന്റെ വീഡിയോ ഉണ്ട്. ഇതേ ബ്ലോക്ക് പ്രസിഡണ്ട് ഫേസ്ബുക്കില്‍ ഒക്ടോബര്‍ മാസത്തില്‍ തന്നെ ഇരയുടെ ഭര്‍ത്താവിന്റെ രാഷ്ട്രീയം അടക്കം ചൂണ്ടിക്കാണിച്ച് അപമാനിക്കുന്ന നിരവധി ഫേസ്ബുക്ക് പോസ്റ്റുകള്‍ ചെയ്തിട്ടുണ്ടെന്നു അദ്ദേഹം ചൂണ്ടിക്കാട്ടി.
ഡിവൈഎഫ്‌ഐ നേതാക്കള്‍ക്ക് അയച്ചുതരാം. ഒരു പരാതി സ്വന്തം നേതാവിനെതിരെ കൊടുത്തേക്ക്. ഏത് ബ്ലോക്ക് എന്നോ ഏതു നേതാവെന്നോ പറയാത്തത് പരാതിക്കാരിയുടെ സ്വകാര്യത സംരക്ഷിക്കാന്‍ വേണ്ടിയാണെന്നും സന്ദീപ് പറഞ്ഞു. പോയവര്‍ഷം യുവതിയുടെ വിവാഹത്തില്‍ പങ്കെടുത്തവരില്‍ ഒരാളാണ് സന്ദീപ് വാര്യര്‍. ഇതേക്കുറിച്ച് ഫേസ്ബുക്കില്‍ പോസ്റ്റിട്ടപ്പോള്‍ സന്ദീപിന് നേരെയും സൈബര്‍ ആക്രമണം ഉണ്ടായി. ഇതില്‍ വിശദീകരണവുമായി സന്ദീപ് രംഗത്തുവന്നിരുന്നു.
കഴിഞ്ഞ വര്‍ഷം പോസ്റ്റ് ചെയ്ത ഫോട്ടോ ആയതിനാല്‍ ഞാന്‍ ഡിലീറ്റ് ചെയ്തില്ലെങ്കില്‍ പോലും എനിക്കെതിരെ ഒരു നിയമപ്രശ്നവും ഉണ്ടാകില്ല എന്നുറപ്പുണ്ടായിട്ടും ലക്ഷ്മി പത്മ അടക്കമുള്ള ചിലര്‍ ശ്രദ്ധയില്‍ പെടുത്തിയപ്പോള്‍ തന്നെ അത് ഡിലീറ്റ് ചെയ്യുകയായിരുന്നു. ധാര്‍മ്മികതയുടെ പേരിലാണ് അത് ചെയ്തത്.
കോണ്‍ഗ്രസ് പാര്‍ട്ടി ഇക്കാര്യത്തില്‍ ശക്തമായ നടപടി എടുത്തിട്ടുണ്ട്. ആ നടപടി പാര്‍ട്ടി നേതൃത്വം ഒറ്റക്കെട്ടായി എടുത്തതാണ്. ആ തീരുമാനത്തോടൊപ്പം നില്‍ക്കുക എന്നുള്ളതാണ് ഓരോ കോണ്‍ഗ്രസ് പ്രവര്‍ത്തകന്റെയും കര്‍ത്തവ്യം. അതില്‍ക്കവിഞ്ഞ് ഇക്കാര്യത്തില്‍ ഒരു വാക്ക് പോലും പറയില്ല. സത്യം വിജയിക്കണം. നിയമം നിയമത്തിന്റെ വഴിക്ക് പോകട്ടെ. 'സൈബര്‍ ആക്രമണം രൂക്ഷമായ സാഹചര്യത്തില്‍ യുവതി എ.ഡി.ജി.പിക്ക് മുന്‍പാകെ സമര്‍പ്പിച്ച പരാതിയില്‍ ജില്ലകള്‍ തോറും കേസെടുക്കാന്‍ നടപടി കൈക്കൊണ്ടു.
അതേസമയം സോഷ്യല്‍ മീഡിയിയല്‍ അതിജീവിതയ്ക്കെതിരെ കടുത്ത സൈബര്‍ ആക്രമണമാണ് നടന്നുകൊണ്ടിരിക്കുന്നത്. കോണ്‍ഗ്രസില്‍ നിന്ന് സസ്പെന്‍ഡ് ചെയ്ത രാഹുല്‍ മാങ്കൂട്ടം എംഎല്‍എയ്ക്ക് വേണ്ടി പാര്‍ട്ടിയുടെ ഔദ്യോഗിക ഡിജിറ്റല്‍ പ്ലാറ്റ്ഫോം ആയ ഇമ്മിഡിയറ്റ് റെസ്പോണ്സ് ടീമിലെ അംഗങ്ങള്‍ തന്നെ സൈബര്‍ ആക്രമണത്തിന് ആഹ്വാനം ചെയ്യുന്ന തെളിവുകളാണ് പുറത്തു വരുന്നത്.