ക്ഷേത്ര നടയിലൂടെ കൈയ്യിൽ പരിചയും വാളുമേന്തി വരുന്ന 'തെയ്യ'ത്തിനെ കണ്ടതും ഫുൾ എനെർജിറ്റിക്കായ യുവാവ്; ഒരാളുടെ മറവിൽ നിന്ന് ആർപ്പുവിളിച്ച് ബഹളം; കുറച്ച് നേരം നോക്കി നിന്ന ശേഷം പൂമാരുതന്റെ വക അനുഗ്രഹം; മുഷ്ടി ചുരുട്ടി കറങ്ങിയുള്ള ഇടിയിൽ ബോധം പോയി; ചർച്ചയായി വീഡിയോ
നീലേശ്വരം: വടക്കൻ മലബാറിൻ്റെ തനത് അനുഷ്ഠാന കലാരൂപമായ തെയ്യം കെട്ടിയാടുന്നതിനിടെ യുവാവിന് അപകടം. കാസർകോട് നീലേശ്വരം പള്ളിക്കരയിലെ പാലരെകീഴിൽ ശ്രീ വിഷ്ണുമൂർത്തി ക്ഷേത്രത്തിൽ പൂമാരുതൻ തെയ്യത്തിന്റെ 'തട്ടേറ്റ്' യുവാവ് ബോധരഹിതനായി വീഴുകയായിരുന്നു. സംഭവം കാണാനെത്തിയ നീലേശ്വരം സ്വദേശി മനുവിനാണ് പരിക്കേറ്റത്.
ക്ഷേത്രത്തിലെ തെയ്യം വെള്ളാട്ടത്തിനിടയിലാണ് അപ്രതീക്ഷിത സംഭവം അരങ്ങേറിയത്. വാളും പരിചയുമേന്തി ഉഗ്രരൂപിയായ തെയ്യം ഭക്തർക്കിടയിലൂടെ ചുവടുവെക്കുന്നതിനിടെയാണ് മനുവിന് അബദ്ധത്തിൽ തട്ടേറ്റത്. ശക്തിയായുള്ള ഈ തട്ടേറ്റ് യുവാവ് ഉടൻ തന്നെ ബോധരഹിതനായി നിലത്ത് വീഴുകയായിരുന്നു. ഇതോടെ തെയ്യം കാണാനെത്തിയവരുടെയിടയിൽ ഒരു നിമിഷം പരിഭ്രാന്തി പരന്നു. ബോധരഹിതനായി നിലത്തുവീണ യുവാവിനെ മറ്റ് കാഴ്ചക്കാരും ക്ഷേത്രം ഭാരവാഹികളും ചേർന്ന് ഉടൻ തന്നെ എടുത്തുയർത്തുകയും പ്രാഥമിക ശുശ്രൂഷകൾക്കായി സമീപത്തുള്ള ആശുപത്രിയിലേക്ക് മാറ്റുകയും ചെയ്തു.
ഈ അനുഷ്ഠാനത്തിൽ തെയ്യം, തൻ്റെ കയ്യിലേന്തിയ പരിച കൊണ്ടോ മറ്റുപകരണങ്ങൾ കൊണ്ടോ ഭക്തരെ തട്ടിമാറ്റുകയും അനുഗ്രഹിക്കുകയും ചെയ്യാറുണ്ട്. തെയ്യത്തിൻ്റെ ആവേശം വർദ്ധിപ്പിക്കാനും അനുഗ്രഹം നേടാനുമായി വലിയ ആർപ്പുവിളികളോടെയാണ് ഭക്തർ ഈ ചടങ്ങിനോട് പ്രതികരിക്കുന്നത്. ഇത്തരം അനുഷ്ഠാനങ്ങൾക്കിടയിൽ തെയ്യത്തിനോട് ചേർന്ന് നിന്നതിനാലാണ് മനുവിന് തട്ടേറ്റത്.
അപകടത്തിൻ്റെ ദൃശ്യങ്ങൾ സാമൂഹ്യമാധ്യമങ്ങളിൽ വ്യാപകമായി പ്രചരിക്കുന്നുണ്ട്. തെയ്യത്തിൻ്റെ തട്ടേറ്റ് യുവാവ് കുഴഞ്ഞുവീഴുന്നതും, തുടർന്ന് ആളുകൾ ഓടിക്കൂടി അദ്ദേഹത്തെ താങ്ങിയെടുത്ത് കൊണ്ടുപോകുന്നതും ദൃശ്യങ്ങളിൽ വ്യക്തമാണ്. സംഭവത്തെത്തുടർന്ന് താൽക്കാലികമായി തടസ്സപ്പെട്ടെങ്കിലും പിന്നീട് തെയ്യാട്ടം പുനരാരംഭിച്ചു.
സംഭവത്തെക്കുറിച്ച് ക്ഷേത്രം ഭാരവാഹികൾ പ്രതികരിച്ചത് ഇങ്ങനെയാണ്: തെയ്യത്തിൻ്റെ 'തട്ടേറ്റതിനെ' തുടർന്നാണ് മനുവിന് ബോധക്ഷയമുണ്ടായത്. എന്നാൽ അദ്ദേഹത്തിന് കാര്യമായ മറ്റ് പരിക്കുകളൊന്നും സംഭവിച്ചിട്ടില്ല. പ്രാഥമിക ചികിത്സകൾക്ക് ശേഷം അദ്ദേഹം ക്ഷേത്രത്തിൽ തിരിച്ചെത്തി, ശേഷിച്ച തെയ്യാട്ടവും കണ്ടതിന് ശേഷമാണ് വീട്ടിലേക്ക് മടങ്ങിയത്. അനുഷ്ഠാനത്തിനിടയിൽ ആകസ്മികമായി സംഭവിച്ച അപകടമാണിതെന്നും ക്ഷേത്രം അധികൃതർ വ്യക്തമാക്കി.