ട്രംപ് പേടിച്ച് നാടുവിടല്‍: ബ്രിട്ടീഷ് പൗരത്വത്തിന് അപേക്ഷിക്കുന്ന അമേരിക്കക്കാരുടെ എണ്ണം വര്‍ദ്ധിക്കുന്നു
ബ്രിട്ടീഷ് പൗരത്വത്തിന് അപേക്ഷിക്കുന്ന അമേരിക്കക്കാരുടെ എണ്ണം വര്‍ദ്ധിക്കുന്നു
ലണ്ടന്‍: അമേരിക്കയില്‍ ഡൊണാള്‍ഡ് ട്രംപ് അധികാരത്തില്‍ എത്തിയതിന് ശേഷം ബ്രിട്ടീഷ് പൗരത്വത്തിനായി അപേക്ഷിക്കുന്ന അമേരിക്കക്കാരുടെ എണ്ണത്തില്‍ റെക്കോര്‍ഡ് വര്‍ദ്ധനവുണ്ടായതായി ഹോം ഓഫീസിന്റെ ഏറ്റവും പുതിയ കണക്കുകള്‍ വ്യക്തമാക്കുന്നു. ഈ കണക്കുകള്‍ അനുസരിച്ച് 2024 ല്‍ 6,100 ല്‍ അധികം അമേരിക്കന്‍ പൗരന്മാരാണ് ബ്രിട്ടീഷ് പൗരത്വത്തിനായി അപേക്ഷിച്ചത്. 2023 ലേതിന്റെ ഇരട്ടിയിലധികം വരും ഇത്.
മാത്രമല്ല, കഴിഞ്ഞ വര്‍ഷം അവസാന മൂന്ന് മാസങ്ങളില്‍, കഴിഞ്ഞ 20 വര്‍ഷക്കാലത്തിനിടയില്‍, മൂന്ന് മാസക്കാലയളവില്‍ ലഭിച്ച അപേക്ഷകളേക്കാള്‍ കൂടുതല്‍ അപേക്ഷകളാണ് ലഭിച്ചത്. കഴിഞ്ഞ വര്‍ഷം ഒക്ടോബറിനും ഡിസംബറിനും ഇടയിലായി 1,708 അപേക്ഷകളാണ് ലഭിച്ചത്. നവംബറിലായിരുന്നു ഡൊണാള്‍ഡ് ട്രംപ് അമേരിക്കന്‍ പ്രസിഡണ്ടായി തെരഞ്ഞെടുക്കപ്പെട്ടത്. യുക്രെയിന്‍ - റഷ്യ വിഷയത്തില്‍ അമേരിക്കയും യൂറോപ്പും തമ്മിലുള്ള അഭിപ്രായഭിന്നത രൂക്ഷമാകുന്ന സാഹചര്യത്തിലാണ് ഈ കണക്കുകള്‍ പുറത്തു വരുന്നത്.