ഭീമൻ ചെടിക്ക് കീഴിൽ നിറയെ ഇണക്കുരുവികൾ; ഒരേ സമയം പരസ്പ്പരം ചുംബിച്ചത് 1,435 ദമ്പതികൾ; പ്രണയ നിമിഷത്തിന് സാക്ഷിയായി വാഷിംഗ്ടൺ ഡിസി
വാഷിംഗ്ടൺ ഡിസി: വാഷിംഗ്ടൺ ഡിസിയിൽ നടന്ന 'നാഷണൽ കിസ് അണ്ടർ ദി നാഷണൽ മിസ്റ്റ്ലെറ്റോ' എന്ന പരിപാടിയിൽ 1,435 ദമ്പതികൾ ഒരേ സമയം ചുംബിച്ച് പുതിയ ഗിന്നസ് ലോക റെക്കോർഡ് സ്ഥാപിച്ചു. ഡൗൺ ടൗൺ ഡിസി ബിസിനസ് ഇംപ്രൂവ്മെന്റ് ഡിസ്ട്രിക്റ്റ് സംഘടിപ്പിച്ച ഈ പരിപാടി ഡിസംബർ 13-നാണ് നടന്നത്.
മുൻപ് നിലവിലുണ്ടായിരുന്ന 480 ദമ്പതികളുടെ റെക്കോർഡിനേക്കാൾ മൂന്നിരട്ടിയോളം ദമ്പതികളാണ് ഈ സ്നേഹനിമിഷത്തിൽ പങ്കെടുത്തത്. ഡൗൺ ടൗൺ വാഷിംഗ്ടണിൽ ഏകദേശം 30 അടി ഉയരത്തിൽ സ്ഥാപിച്ച 10 അടി വീതിയുള്ള, മനോഹരമായി അലങ്കരിച്ച ഭീമാകാരമായ മിസ്റ്റ്ലെറ്റോ ഇൻസ്റ്റാളേഷന് താഴെയായിരുന്നു ഈ കൂട്ട ചുംബനം.
റെക്കോർഡിന് യോഗ്യത നേടാനായി, ദമ്പതികൾ മിസ്റ്റ്ലെറ്റോയുടെ ചില്ല കൈയിൽ പിടിച്ചുകൊണ്ട് കുറഞ്ഞത് അഞ്ച് സെക്കൻഡ് നേരമെങ്കിലും ചുംബിക്കണമായിരുന്നു. ഔദ്യോഗിക ഗിന്നസ് വിധികർത്താവിന്റെ മേൽനോട്ടത്തിലായിരുന്നു ചടങ്ങ്.
റെക്കോർഡ് സ്വന്തമാക്കിയെന്ന വാർത്ത പുറത്തുവന്നപ്പോൾ പങ്കെടുത്തവരും സംഘാടകരും വലിയ ആഹ്ളാദം പ്രകടിപ്പിച്ചു. ലോക റെക്കോർഡ് സ്ഥാപിക്കുക എന്നതിലുപരി, സ്നേഹവും സന്മനസ്സും പ്രചരിപ്പിക്കാനുള്ള ഒരു മാർഗ്ഗമായാണ് ഈ ആഘോഷത്തെ സംഘാടകർ കണ്ടത്. ഈ ചുംബനത്തിലൂടെ വാഷിംഗ്ടൺ ഡിസി സ്നേഹത്തിൻ്റെയും ഒത്തുചേരലിൻ്റെയും അവധിക്കാല സന്തോഷത്തിൻ്റെയും നിമിഷത്തിന് സാക്ഷിയായി.